Гьар сен Россиейл’ январьни вузани 25-чил телебайн йигъ алгъайгьен аIдат водун. ШакIле ман гьамыд Татьянайн йигъ хьинне ацIа. Мани йигъыл’ аали мактаббышее, техникумбышее, колледжбышее хъаIдаххъанбыше хаIдда марахукван йигъынджахбы, тадбырбы алгъайгьи.

Телебайн сенбы гьар инсанни ыIмырее энки шадынбы ва хошунбы эйхьи. Мана джаванийваллайна гумрагьна вахт вобна. Манке гыргына югун билиг, ацIаал’ алятIас, геледжагъылисын саIнаъат хъаIдхъихьес чалышмишехьи.
ГьаIшде йишди эл’ни джаванаршини аIрайл’ хаIбба институтбышее, университетбышее хъаIдаххъан джаванар вобунбы. Манбы садджу Дагъыстанейджаб деш, Россиейни джурабаджурайни регионбышейиб растына хъавайленбы. Телебабыше джони югни хъаIдхъыйбышиква саджигее миллетын дойид ахтыхъаъан.
Къийнийна йишда гаф Дагъыстанни девлетни техник университетни компьютерни технологиейни ва энергетикайни факультетни 4 курсни телебайни МагьаIммад-Руслан РаIгьимовни гьаIкIеена вухьес.
МагьаIммад-Руслан МагьаIчкъалайни шагьарее едике ыхьейир, манкъуна кок ЦIаIхыйни хивейнчена вобна. Мана халкьни аIрайл’ доюква ыхьайни, хаIдда сенбына хивни тасарруфатни ва менни ташкилатбышди ахтыйни къуллухбышил’ ишлемишхьайни РаIгьимов Надир дайийна нева ворна. Манкъуна дек’, Расим, къийна МагьаIчкъалайни шагьарее джурабаджура къуллухбышил’ ишлемишехьи. Ед’ ,Ал’бина, маъаIллима ворна.
МагьаIммад-Руслане МагьаIчкъалайни шагьарее 3№ йыIкьнекин лицей-мактаб югни кьийматбышиква быкырауйле хъийгъа, хъаIдхъий давам гьаъасдимее саIнаъатбы ДДТУ хъуво. Гьаманиджар сен махъа кьабыл’хьана. ЦIеддыйни курсейнче манкъве хъаIдхъийс фыкыр гьуво. Гыргын сессиебы югни кьийматбышиква хъелес чалышмишхьа.
Манкъуни увгьойка, телебайн сенбы джунимее геед шадынбы водунбы. «Университетей хъаIдаххъани ёкьни сеней зы хаIббанани телебабышиква танышхьа. Къийна йизда макьсад югда хъаIдхъий водун. Диплом алябтIыйле хъийгъа, IТ пешейн саIнаъат гьаъас. Манчихъа гора, йизда хаIббанна вахт хъаIдхъийква багълыба.
МагьаIммад-Руслан универститете геер камалукана телеба ворна. Манкъуни гьаIракатыс, хъаIдхъийс маъаIллимарше, джуни гьамбазарше гьаммаше ахтына кьиймат гьооли. Манкъве хъаIдхъийква янашеда университете хъаIдаххъани телебабышди Советыс хаIбвалла гьааъа. Гойне хьинне манкъве джаванаршини аIрайл’ тербиейн ишбыд ыккекканбы. Гьар сен МагьаIммад-Руслане вуджее хъаIдаххъани аали мактабе 10 чIакIын тадбырбы алгъайгьи. Манчиле гъайре ДДТУ Къузайл’ни Кавказни университетбышиквайий институтбышиква югун алаакьабы гьувааджи. Манчиква саджигее алгъайгьен тадбырбыд МагьаIммад-Русланыхъад кIылда эйхьи деш.
Гьар телебайхъад хьинне, МагьаIммад-Русланыхъадыд джун девиз водун. Манкъве эйгьен: «КIыл’ра йишонхьай – хаIбба иш къавджуй» йизын кредо водун.
МагьаIммад-Русланыхъад спортылхъан хаIдын аIшкьыд водун. Мана кIыл’валике футболна гьаваскар ворна. Манкъве университетын алгъайгьени гыргыни спартакиадабышее иштыракаъан. Гьайни сен ДДТУ телебабыше джони аIрайл’ алгъайгьени супер-лигэй иштыракаъас гьаIзироохьи. МагьаIммад-Русланни фыкрее гьамыд геледжагъыл’ югна футболчий ыхьай водун.
Активист, ватанпарвар РаIгьимов МагьаIммад-Русланни фыкрее къаджесын хаIдда ишбы водунбы. Манчини аIрайл’ кьомана джига хъаIдхъийн авххъааххъа. Ши манкъус джуни фыкырейдынбы быкыраъас аIрзаъа. Манкъуква саджигее ши гыргын телебабы джони байрамыка табрикааъа!