Садакьа йикIеенче темизни фыкырбышиква гьувой хаIдын сувааб , сунна вобна. Исламни динее эйгьи водун: «Сагъни хылеква гьелен садакьва , солни хылекIле къаджес ыккан деш». Манчина маIънаа мана вобна, гьелен садакьа дюгленда гьелес ыккан, манчини гьаIкIее мед- мед агъмишаъас ыккан деш.
Хил’дже сенбы водунбы ЦIаIхни дерайл фонд «Инсанын» филиал ишлемишехьен. Манчина иш Гыл’мецIни хивни манзикни имаме АIсадуллагь-гьаIдже вуккекка вобна. Манкъус мана ваджибна иш вуккейс хиваршини чIакIынбыше, ЦIаIхни дерайни хааIрни имаме Эл’дар Сулейманове кумагаъа.
АIхреени сенбышее манбыше гьавъуна иш, хылени акьвал’на хьинне, джамаъаIтыкIле къоодже вобна. Фондын джурабаджур хайирысын акциебы алгъавгьу: касиб хизанбышис одхьанни каран (хоI, чей, макIакаранбы, хьыняал, зетий, чуры ва мед.) кумагбы гьуво; тезеба мактабеехъа аIлгьааIни шыгыртаршисда кьочIе савъу; спортын оIюнбы джегьилершини аIрее алгъавгьу; чIырыни инсанаршис маалидже гьаъасын кумаг гьуво; хав-уджагъ гёдхьунни инсанаршис пылыкван кумаг гьуво; маджлисбы, мавлидбы, чIакIын динни ва Ан-Низамия медресейс къадсырйн форумбы алгъагьас кумагбы гьаъы; горханабы абрелхъа хъаляъан имааджийбы гьаъы ва медын хаIдда миллетни сардан хайир ишбы къадже.
Ман мизека эгьес раIгьатын кар водун, амма ман ишбы быкыраъый хаIбна заIгьмат вобна ва хаIбба хусусы вахт алебатIа. Ман ишбы гьаъыйс доннух гьели деш. Анджах ман ишбы гьаъый Аллагье суваабыс ойкIан. АIхратыл манбы шагьадна илёзарас.
Гьелбедти, ман ишбы гьаъасдимее пыл лазымехьи. Мани каре кумаг хыл ачухни ишкарарше, мерд , рагьаIнани инсанарше гьели. АIсадуллагь-гьаIдже ватсапе «Добро в пятницу» десте ачмишавъу вобна. Инсанарше джуни кьул’пенче вааIхана шигьий махъа оIтирааъа. Гьар уIлджумаIни йигъыл’ нимееган пылый сады ва шавусый кумаг гьуво АIсадуллагь-гьаIдже хабар гьоолена. Манкъуни йикIена темизийвалла, темизин напс, ачухна хыл’ гыргынкъукIле лап югда ацIа водун.
2025 сенни аIхрее, 2026 сенни кьома хайирхагь акциебы Гыл’мецIни, Миххьейни, ЦIаIхни хиваршее илгъечIу. Гьайни элейс Ман акциебы алгъагьас тезера ЦIаIхни администрациейс хаIбвалла гьааъас сечмишауйни Рамазан Шихамирове кумагаы. Мыцбышихъа, мыкIаалихъа, къидгъырыйбышихъа илдяакы, манбышда кьоIйре аманат джигалхъа гьихьараъас мани хиваршини хизанбышее вухьа. Гьайни элейс манбыше одхьанни каракван кумаг чIырын инсанарнани хизанбышис гьуво.
АIсадуллаг-гьаIдже эйгьен:«ЧIырынкъулхъа ал’джахвас гьаркIыний, мана шадаъый, манкъус кумаг гьувой — сунна вобна…»
ЗаIгьмат гьавъуйни инсанаршис, кумаг гьувойни ва гьелени инсанаршис Аллагье баракат, сувааб гьелен! ЦIаIхни администрациейни хаIрынкъус Рамазан НезирмагьаIммадни духайс ши угъурбы аIрзуламишаъа. 
