ДжаIмаъаIте, миллете, хиве гьуIрмат къазамышавъуй вахарийн кар деш водун. ГьуIрмат къазанмишаъасдимее хайирыкван ва лайикъыкван ишбы къаджес ыккан. Йишди миллетыхъаб маIгьбын инсанар кIылба дешобонбы. Манбышда сайир Къызларни районни Мирный донани хивна имам Ислам Юсуфна дих Шихбиядов ворна.
Хилдже сенбы водунбы мана мани хивеехъа кочмишхьайн ва мааъар имамна ишлемишехьен. Исламни хаIбваликва Мирныйни хивее 1921-ъэсди сен цIебни маздикын ачмишавъуй илгъечIу.
Манкъвее имамийвалла гьавъуйле саваийда хивни джаванаршди, чIакIынбышди аIрее диныс ааидни ишбышиле савагьийда, идманыс, маданиятыс кадсырийн тадбырбыд алгъайгьенбы. Манчиле савагьийда мактабни ушахаршис къыIлина динни гьаIкIедын курсбы алгъайгьи ва манбышис Кьуран хъаIбхъас хаIбхъааъа. Ислам-гьаIдже гыргыни цIаIхни милетыс къадсырни маджлисбышее иштыракаъан ва манбы алгъагьас аIхан кумаг гьеле.
ОIтмишхьайни уIл’джумее манкъвее Мирныйни хиве тенисын турнир алгъавгьу ва мани идманни маджлисе садджу джаванаршеджад деш, ешлибышед иштыракаъуйин. Манчилхъа тамаше гьааъас хил’дже джаIмаъат махъа ады.
Турнирехъа сабынбышди гьийр Къызларни районни ва Къызлярни шагьарни джаванаршда хааIрна Тинамагьммад ТинамагьаIммадов ющенхьа. Манкъуни увгьойква, вахтале-вахталхъа маIгьдын маджлисбы алгъавгьуй джаванаршди садибивал’ниме геейд югда водун.
Къызларни шагьаре ва районе алгъайгьени гыргыни маджлисбышди ва турнирбышди иштракчийни КъурбанаIлий Ибрагьимовни увгьойква, Ислам Шихбиядов джун ишбы къаледчу чалышмышехьена джаванаршис хайирекван маджлисбы ва инягьдын турнирбы алгъагьас. Манчиле савагьида манкъвее ушахаршис Кьуран хаIбхъааъа, Шинад шаке аIхан манкъус кумагбы гьаъанбы ва гьаъас гьазирба вобонбы, -манкъве увгьо.
Тенисни турнире гъамебхьайнбы:
— Кьасымов Умалат.
— АIчлеев МагьаIммадзефир.
— Ибрагьимов КъурбанаIли.
Манбышис Ислам Шихбиядове медальбы ва грамотабы гьуво.
Манчиле савгьийда манкъвее Мусаев Элдар МагьаIммадни духайс турнир алгъагьас кумагауйхъа гора? ташакурийвалла агъмышавъу. Cабара иштыракчеершис спонсорашди сураке ташакурийвалин кагъызбы ва пайбы гьуво.
Манбы:
— АIчлеев АIгьмад Джалална дих.
— АIчлеев Саид Джалална дих.
— Магьмудов Магьмуд Раджабна дих.
— Сафаров МугьаIммад Садыкьна дих.
Турнир алгъагьас хаIдын кумаг гьувойхъа гора, Ислам Шихбиядове ГьаIджимусаев ГьаIджимуса ГьуIсейнаIлийни духайс ташакурийвалла агъмишавъу ва тенисын турнир гьар сен алгъагьасва, джуваб гьуво.
