Мартни аIхрее, апрельни цIеддийни уIл’джумее Дагъыстанылхъа абына фаляакат аIхрейни 100 сенни аIрее вухьа деш. Шавусджад маIгьдын гёгъийбы ва селера йикIел’ дешинбы. Табиятни фалякатни гьийб илёзарас шаке вааIхас деш, няъас увгьое баляа бирданхьессе абайли. Манчин хаIдданан зиян МаIгьачкъалайс ва чини гьихъийаллани поселокбышис, Хасавюртни, Дербентни районни сабара хиваршис гьуво. Амма мани хиваршди аIрее хаIдданан зиян Дербентни районни Мамедкъалайни хивыс хъетIу. Мааъад 300 хаас зиян ыхьа, гойнед 6 инсан хъикIу, джона хьебыйре, ущахар вухьа.
Дагъыстанылхъа абына фаляакат быкырни дюнейлхъа еймишувхьа ва шас кумагыс Россиейни хаIдданани вилаетбышиле инсанар, волонтерар абы, гойнед гуманитарын ва пылын кумаг гьуво ва гьаIшдед гьели водун. Республикайни шагьарбышенче, хиваршенче инсанар Мамедкъалехъа кумагбы гьаъаc гьабкIын. Мани дагъамни йыгъбышее йишди миллетбышда садибыйвалла гьагу.
Мани фаляакатбышике зиян хъетIуйнбышис кумагбы гьеленбышди аIрее, гьабкын кучебы, хайбы батагъыке темизаъанбышди джаргее йишин цIаIхбыб вухьайнбы.
Масалан, Хушетни поселеке йишди джаванарше имааджий гьавъу. Маадын кучебы ва хайбы хьинеке ва баттагъыке темизяъу. Гойне мана гьаIш камазбышейхъа аливгьу. Манчиле савагьийда, йишди джаванарше пылбы саъу мани йигъыл’ мааъаб ишлемишоохьенбышис ва зиян хъетIуйнбышис хьейибле хааIбна кIумкIум пулавна битIалавъу. Йишди джаванарше къаджейни гьунерыс ахтына кьиймат Хушетни манзикни имаме гьуво. Манкъуни увгьойква, цIаIхбышин джаванар гьаммаше поселоке къеджени ишбыше гьаIракатыква воохьи ва манбыше джона инсанийвалла къийнийни йигъыл’ гьаагуна. Имаме манбышис миннатдарийвалла агъмышавъу. Зы манбы текба-текба агъмышааъас вуккан деш, няас увгьое мани имаадже хаIббананбыше иштыракаъу.
Гойне Мамедкъале кумагбы гьеленбышди джаргее йишди миллетин нумаендебыб вухьайнбы. Джони аIрее йизын духйебы ва хыдылаар вухьа.
Гуманитарын кумаг гьеленбышди аIрее Астархан, Волгоград, Брянск, Благовещенск воохьени йишин ишкарар вухьа. Масалан, Астарханни шагьарени «Шукур» донани компаниейн Дагъыстанейхъа хьян хъыгъаъан насосбы, токIан генераторбы, кураукбы, чекмабы ва медын материалбы къаховы.
Волгоградни шагьарее воохьени дагъыстанлыбыше оIтираъани кумагыс машинбы йишди йыхъее ДжуIма АIгьмадове ташкилаъы ва хьян, макIаронбы ва медин тадарукбы оIтираъу.
Благовещенск воохьены цIаIхбыше 100 аазыр манатыле гьеххада пыл саъу кумаг гьелес гьаIзирба вобонбы. Мана иш мааъаб йишди ишкаре Адил’ Давудове вуккейка вобна.
Мани ыхьайни фаляакатын хаIббанани инсанаршини хайбышедын мебел’, паласбы, палтарбы ва техника харабаъы. Манчихъа гора, йишди миллетни мебеликва маIшкъулоохьени ишкарарше пылдена сабара магьаIдни хизанбышис мебель пайис гьуво. Ман акция цIаIхбышди блогере Арсен АIбдуллаеве ыккекка водун ва йишди мебельшикIаршед иштыракаъа водун. Масалан, ДжуIма МагьаIммадове, Радик АIлиеве, Мурад Раджабове ва мебынбыше.
Сайид гьаман эгьес ыккан йишди кIазетын зиян хъетIуйнбышис чини бюдженче аIхан кумаг «Надежда» донани фондехъа алгъавгьу.
Гьелбетти гьиняа агъмышавъуйнбышиле савагьийба кумагбы гьувойн мебын цIаIхбыб вобонбы, амма шакIле манбышин добы ацIа деш.
Шавае джоке аIхан кумг мани инсанаршис гьуво манбышикIле сагъулва эйгьи ва джона киса бараканана вухьена.
Къийна ши сана-санкъус хыл’ джувабыква, пылыква, карака авхъас вуккан. Ман йишди джамаъаIтбышди эбеедын кар водун. Гьасре мана фаляакат йишин иман, адаб ёхламишаъас къахувына вухьеджен. Аллагье сабыр гьелен ненкъусый мани фалякатыке зиянбы хъетIу, хайбы батмишхьа, малаке, девлетике вухьа. Гьеленар, аляатIанар Аллагь ворна. Манчиле писди мисийбатбышике гьуваадженбы ши.
