«Нур» кIазетейхъа йигъыс хаIбба мигьманар абайли. Манбы ааIлимар, маъаIллимар, дохтурар, хивни тасарруфатын, маданиятыний адабиятын ишчер, телябабы, спортсменар вобунбы. Редакциейни ишчерше мигьманар хаIнни тентенейква къаршиламишааъа.
«Гьини элеесда мигьман Гыл’мецIни хивни администрациейни маджлисни депутатаршина садры, мактабна физикайнайий математикайна маъаIллим АIгьмадов МурадгьаIсил АIлигьаIджийна дих ыхьа. Мана цIерра кIазетни хааIрни редакторыква Байрам АIбдуллаевыка, гойнер коллективыква хъызаххы.Манкъве джуни ихтелете Гыл’мецIни хивни санихьыйни ва къийнийни йигъыке маIълумат гьуво.
МурадгьаIсил АIгьмадов Гыл’мецIни хивее, ЦIаIхыйни дерайл’, Рутул районее геер гьуIрматыквана инсан ворна. Мана джурабаджура ишбышил’ чалышмишхьана къуллухчий ворна. Манчини аIрайл’ манкъве энки хаIдда сенбы мактабыс къадсыр. МурадгьаIсил маъаIллим Гыл’мецIни хивни йыIкьнекни мактабее ишлемишехьена 42 сен водун. Мани сенбышее манкъве хаIбба ацIаал’нан шыгыртар гьаIзиравъу. ГьаIшде манбы югни къуллухбышил’ чалышмишоохьи.
Журналистаршиквани горушее редакциейни мигьмане джуна гаф вудж ишлемишехьени мактабыле гибгъыл. Манкъуни увгьойка, Гыл’мецIни мактабее 57 шыгырте хъаIдаххъа. Манбышис ацIаал’, тербие джони саIнаъатни устадарше гьели. Къийна шыгыртаршихъад югда хъаIдхъасдимее гыргын имканбы водунбы.
Гойне хьинне М.АIгьмадове Гыл’мецIни хивни гьаIкIее ва депутатарше гьааъани ишни гьаIкIеена хабаравъу. Манчиква саджигее аIхырейни сенбышее хивее ешемишоохьен инсанар растына хъавайлени дагъамийвал’бышикер манкъве са-кьоIбле кал’ма увгьо: «ГьаIшде хивее 100 авадкьурийн хайбы водунбыва 250 инсан ешемишехьи. КъыIлина манбышин сай кьоIни элеес хаIдхъехьи. Халкьына энки хаIбна дагъамийвалла илёгъани хьинекена вобна.
Хивейхъа хъооIн хьян 1984-ъэсди сен цIыцIауйн водун. Ман хивни къаршейни сувале хъадыйн водун. Хьян хъооIна дурба йиссе хъывхьа. Мана бадалааъас вуккан.Хивыхъаб вобна хьинекена кеситийвалла аIрейнче алябтIасдимее ши хаIдданани джигабышейхъа кагъызбы одкIун. Гьалекийс шавукенджад кумаг ыхьа деш.
«Нур» кIазетни хааIрни редакторе Б. АIбдуллаеве мана иш дурустни йаIххъылхъа абчесдимее арыйни мигьманыс гееб югна мыIслягьат къавджу. Манкъве хьинена хатI тезенчиква бадалааъасдимее республикайни чIакIынбышилхъа мурайиджат гьаъас ыкканва агъмишау. Манчиле гъайре, хивни инсанаршиныд мани карее кумаг ыкканнва, — кIазетни регьбере къейдау.
МурадгьаIсил АIгьмадове редакциейни ишчершис къийна хивни депутатарше къооджени ишни гьаIкIеенаб гаф гьавъу. Мани сардан манкъве увгьойн: «Гыл’мецIни хивни администрациейн депутатар сабара гагьна гьихъа сечмишавъу. Манбышин геллесынбы хивее ешемишоохье. Шахъад экIда-экIда сессиебы эхьи. Мааъад депутатарше хивееъад къаджесди ишбышди гьаIкIее, инсанаршини ешайиш-экономикайни суалбышди гьаIкIее ихтелетбы гьаъа. Манчиле савагьийда гьаIшде ши гьайни сен декабрьни вуза илгъечIесди сечкибышис гьаIзироохьи вобунбы. Манке депутатарше хивыс тезе администрациейна хааIрна сечмишаъас.
Горушни аIхырей М. АIгьмадове редакциейни ишчершис угъурбы аIрзау. Манбыше миллетна садибийвалла, цIаIхни мизена саламатийвалла гьувааджени гьарIакатбышис ахтына кьиймат гьуво.
Редакциейн, гидхьуйни аIдатыхъа гора, арыйни мигьманыс пайис китаббыйий журналбы гьуво.
