Гьар сен, апрельни 23-чил’, дюнйейл’ китаббышин ва автораршини ихтиярбышин Йигъ алгъайгьи. Мани йигъыл’ китабханабышее, джурабаджур майданбышее манчис къадсырыйн маджлисбы ва конференциебы илгъечIи.
Китабын шас садджу ацIаал’ джад деш гьели, манчиле гъайре манчин йишди санахьийни, къийнийни ва къийхъийни йигъын геледжагъ ашкараъа.
Совет гьоIкуматни деврее йишди оIлкайн миллет эн китаббы хаIдда хъаIдаххъан ыхьа. ГьаIр гьуIрматыквани инсаныхъад хааъад джун китабхана ыхьа. Китабханабы хиваршее, районбышее, шагьарбышее манке гуджнака ишлемишехьи ыхьа. ГьаIшде манчина мурват кыл’хъувхьа. Багьнаб интернет хъадый вухьа. Анджах мысаджаб китабна джига интернетын бадалааъас деш. Китаббышихъад гьар джурабы эхьи: адабиятынбы, ыIлимынбы, мактабни ушахаршин, маданиятын, лугъатбы, энциклопедиебы ва медынбы. Манчини гьаарынчихъаб чина джига ва чина йаIхъ вобна.
ЦIаIхбы гьаммаше ацIаалилхъа, хъаIдхъийлхъа гьавасыкван инсанар вухьа. Гьале оIгийл’ни вахтал’ джад шахъад китаббы ойкIанан инсанар вухьа. Манбы гьаIшде ыIлим марказбышди хылеква одкIунни фондбышее мейид водунбы. Анджах хаIддананбы таарыхни уммане батмышхьайнбы, гёхьанаыйнбы, дагъауйнбы, хъоIхъийнбы.
ЦIаIхни мизел’ мед китаббы ойкIан ХХ асырни аIхрее гибгъыл. 30-40 сенни аIрее шаке гьарджура китаббышда хазна къурмишааъас ваIвхы. Мани хазнее 100 агъаллан китаббы водунбы. Манчини аIрее ыIлимни, динни, мизени, адабиятни, лугъатын, маданиятни, методикайни гьаIкIеедын китаббы водунбы. Йишин бордж манбы гьуваджий, китабханабышеехъа еймишауй, йишди йыIкьале хъооIни архайлхъа гьихьараый водун.
ЦIаIхни мизелин мактабни шигыртаршисын китаббы ва маъаIллимаршисын пособиябы, лугъатбы, антологиебы ва ыIлимын китаббы С. АI. Джафарове, Гь. Х. Ибрагьимове, Н.Гь. ЫIсаеве, Кь. З. Омаханове, А. Гь. Ибрагьимове, М. Н. Шамхалове, Ш. ЫI. Къоджаевае, М. Дж. МаIгьарамове, З. Н. ЫIсаевае, М. А. ГьаIсановае, М. О. Ибрагьимовае Я. Г. Таибове, Ф. М. МаIгьаммадовае, Ф. М. Гьу1сейнове ва мебынбыше одкIун. ЦIаIхни адабиятыкен (поэзия, проза) китаббы йишди шааирарше ва язычерше: Дабузов Джаббаре (Дабыз Джаббаре), Шевкет Дабузове, Сафар АIбдуллаеве (АIшукь Сафар), Гьамзаев Мусе (Муса Фарух), ШейхаIлий ХанаIгьмадове, АIбдураIгьим Дадашеве, Эмирджан Мирзоеве, Хан-Алмазе, Валегь Гьамзаеве (Гьамзат), АIбдураIгьман ЫIмарове (УлуцIаIхий), Кьурбан Омаханове, Сиражуддин Кьурбанове, Элескер ГьаIджиеве, Ханпери Назировае одкIун.
ЦIаIхбышди зияратбышди гьаIкIеедын китаб Брянскни шагьаре ешемишехьени АIлим Султанове одкIун.
Чапыс гьазирхьайн ва гьазираъан цIаIхни поэзиейкен китаббы ВаIгьыд’ Мирзоевыхъад, Магьмуд Магьмудовыхъад, ДжуIма Мамедовыхъад, Нусрет ЫIсмаиловыхъад, Юсуф Юсуфовыхъад (Лекий Юсуф), Гул’бениз Рамазановайхъад (Наоми), Наргиз Раджабовайхъад, Айгул’ АIлиевайхъад ва мебынбышихъад водунбы.
ЦIаIхбышди шааираршин ва язычершин сабара асарбы урусни мизелхъа Фазил Дашлайе, Мурад Саиде, Ашура Кузиевае, ГьаIджи Ил’ясове, АIлий Эмирове, Камил’ Шамхалове ва мебынбыше сакIалаъы.
Гьайни сен Дагъыстанни хъаIдхъийни ва ыIлимни министерствайни кьарааликва Грозныйни шагьаре тезе хъаIдхъийн гьоIкуматын тIабалбышикван дагъайдни сыныфбышин китаббы: «Алифба», 1 сын.; «Адабиятын хъаIдхъий», 2 сын.; ва «ЦIаIхна миз», 3 сын. чапыке хъигъечIу. Манбы мактаббышеехъа йаIхъыляъы водунбы. 2026-2027 хъаIдхъийни сенике цIаIхна миз ва адабият мани китаббышиква аIлгъаа гивгъалас. Ахуйни сыныфбышисын китаббыд гьазираъа водун. Манчинимеега гьам вахт, гьам ааIлимаршин, маъаIллимаршин, методистаршин кумаг ыккан.
Гьел’бедти, гьоIкуматын бордж водун ман китаббы ойкIанни инсанаршини заIгьматыс кьиймат гьувой. Са китаб окIанасдимее сенбына ишлемишхьес лазымехьи. Хъийгъад, китаббы ойкIананбышин ихтиярбы гьуваджес ыккан. Сасса вахтал’ заIгьмат санкъвее гьааъа, амма добы мерынкъве аляатIа. Манчиле оойид гьоIкуматын назарат ыккейс ыккан. АIхреени сенбышее магьаIдни нягьаIкьни ишбышиква зараба-зараба хъызааха.
«Нур» кIазетни редакциейн китаббы ойкIананбы, китаббы ойкIананбышин ихтиярбы гозетяъанбы, китабханабышин, чапханабышин ишчер джони байрамыква табрикааъа! Манбышис джанана сагъвалла аIрзуламишааъа!
