Сабара йигъбышиле быкырни дюнйейл’ хаIдын байрам — 9 МАЙ алгъагьас. ХаIбна Ватанна даIвъий таамувхьайн 81сен быкырхьа. Мана дюнйейни таарыхе эн хаIбна, эн писда, эн инсанар гьаIлакавъуна даIвъий вухьа. АIрайле манимеегана вахт оIт’мишивхьеейиб, манчин гьувойн уцIурбы, ярабы инсанаршини йикIбышее мейд водунбы.
Гьар сен 9 майил’ даIвъийе батмышивхьайн, хъийгъа ярабышике гьабтIуйн, гьаIшде сагъбанан ветеранар йикIел’ хъаваляаъа. ГьаIкIедад ман уле нагънан шадын йигъ водун. МаIгьабна хизан дешда, джони баба-дидерше мани даIвъийе иштырак гьидяуна. Ши къийна манбышди гьийб гьаммашийни борджее вобунбы. Манчихъа гора, ши, йишди республикайн, гьоIкуматын, быкырни дюнйейн авхуйни ветеранаршина гьуIрмат гьувааджес вуккан, няъас увгьее манбыше ши фашизмайке, нацистаршике къорамишавъу, гьувааджы.
Гьайни сеныд йишди республике Гъамувхьайни йигъыс къадсырыйн джурабаджур йигъынджагъбы, маджлисбы, оIлум дешин къатар илгъечIес. Манчисын гьазирыйваллабы республике гидгъылодунбы. АIсас парад Каспийскни шагьаре илгъечIес. Гьайни сен, увгьойбышиква, военныйбышин техникайн параде иштыракаъас деш. Садджу эскерар сыраныква илгъебчIес.
ХаIбни Ватанни даIвъийе цIаIхбышед хаIдын иштыракаы. Манчини вурушбышее эн уфтанын, эн гьаIракатукан, эн кьуватыкван, эн аIкIеликван цIаIхбышин джегьилер гьабтIу. Манбышди сабаранбышин горханабы гьаIшдед няаъад ыхьай ацIа дешодунбы.
Сабара сенбы водунбы «Нур» кIазетни редакциейн ХаIбни Ватанни даIвъийе батмишивхьайни цIаIхбышин сиягьийбы саъан. Мани ваджибни ишее хаIдын кумаг АIлиев Темрезе, Фазил Дашлайе, Самур ОIмарове шас гьаъы. Гьайни сен ши кIазетни нумрабышее даIвъийе батмишивхьайни цIаIхбышин сиягьийбы тезелемишаъа водунбы. Манбы хив-хивна гьелес.
Къийна сагъба авхъуйн мани даIвъийн ветеранар цIаIхбышихъаб авху дешобунбы. Гыргынбы раIгьматыххъа абкIынийнбы. Анджах манбышин едигар мысаджад джони духйебыше, невабыше кIелиханаъас деш.
АIхреени сенбышее, АIгьмадов НезирмагьаIммад (ХаIбни Ватанни даIвъийни ветеранна АIгьмадов Эфендий дайийна дих) ЦIаIхни дерайл’ни ветеранаршини ташкилатыс садрына сечмишауйле хъийгъа, хаIдда мани сардан югун ишбы къадже. Манкъуни гьаIракатыква ва хиваршини администрациейни, хиваршини джегьилершини фондбышди кумагыква ЦIаIхее, Мишлеше, Муслагъа, Михьейе, Хьойикке ХаIбни Ватанни ветеранаршини едигарыс гьаIйкалбы гиххьы ва йиссейнбы тезелемишаъы. Манчиле гъайре гьамувхьайни йигъыс къадсрыйн спортын оIюнбы( футбол, волейбол ) алгъавгьу. Гьел’бедти, ман ишбы къулайква гьаъасдимее харджийбыд ыхьайнбы. Манчис хыл’ авхъааъан ишкарарыб вухьайнбы.
Н.АIгьмадове кумаг гьувойн инсанарыб кIеливханавъу деш. Манбышис дагъыстанни ветеранаршини союзни дойиле грамотабы ва медалбы гьуво.
Гьайни сен ниятее алетIу водун Лекни (Къурдулни) хивее ветеранаршис къабсырна гьаIйкал ачмишавъуй. Мана майни 8-чил’ ачухааъас ва мааъад митинг илгъечIес. Ниятее алетIу водун, гьамани йигъбышее ЦIаIхни дерайл’ волейболын турнир джегьилершини аIрее алгъавгьуй. Майни 8-чил’ цIаIхбышди мактаббышейид Гъамувхьайни йигъыс къадсырыйн маджлисбы илгъечIес ва гьаIйкалбышилхъа мактабни ушахарше тIетIбышин тIуччер гиххьес.
Майни 9-чил’ Гъамувхьайни йигъыс къадсырыйн къатар Рутул районни марказее илгъечIес.
Майни 10-чил’ фыкрее аххъы водун МагьаIчкъалайни шагьарни Красноармейскни поселокени «Спарта» донани майдама футболын оIюн цIаIхбышди джегьилершини аIрее алгъавгьуй. Маныд ДР-ни муфтиятни мислягьаIтыква, «ЦIаIхбышин джегьилер» ташкилатни, «Инсан» фондни регьберийваликва ва кумагыква алгъагьас. Информациейкван кумаг «Нур» кIазетын, РГВК «Дагъыстан» гьелес.
«Нур» кIазетни редакциейн гыргын миллет, ветеранар гьар джура даIвъийбышин Гъамувхьайни йигъыква табрикааъа ва джанана сагъвалла, ачухын хаIйбы, саакитыйвалла аIрзуламишааъа.
