ХаIбна Ватанна даIвъий таамувхьайн 81 сен быкырхьа, анджах манчин гьувойни ярабышин уцIур асырбына цIыцIахьесын. ДаIвъийн баляа, кIаарна хабар итдябыйн, зиян гьидёвойн хав гьассыр деш. Мани даIвъийн милйонбышиква инсанар гьаIлакавъу. Хивар, шагьарбы веранау. Манчин милйонбышиква инвалидар, сипIырер, етимар дюнйейни акьвалхъа яратмишавъу. ДаIвъийн мысвалла, мыкIаалла турамишавъу. Манчихъа ил’дяаку, йишин миллет’ даIвъийенче фашистаршиле гъамхьа хъигъечIу, няъас увгьее ши хъобкуба вухьа. Ши гьуIджум деш гьавъу, ши къорамишивхьайнбы. Писди фыкреква абыйни хочейна вукIул’ эзмишааъанаки. Йишди миллетиныд мани даIвъийе хаIдын иштырак гьау. Хылехъа тифанг алебтIас вааIхана адамершина Ватан фашистаршике къорамишааъас фронтейхъа аркIын. Авхуйнбыб хаIм-йигъ гьидяу тылыл’ ишлемишивхьа. ДаIвъийехъа чуру, ниссе, хьыняал’, турусбы, хьахьалийбы, ухаран папахбы (кьаччийбы) оIтирау.
Фронтейхъа абкIынийнбышин хаIббананбы сабкIыл деш. Манбыше джон джанбы Ватаныс багъышау, йишда ыIмыр шадна, аазадна вухьесдимей. Манчихъа гора манбышда игитийвалла кIеливханааъас вуккан деш. Вахтале-вахталхъа раIгьмат къахивлес вуккан, манбы кIел’хъаляаъас вуккан, манбышди гьаIкIее окIанас ыккан. Рутул районни джамаъаIтын, менни миллетбыше хьинне, манке ыхьайн гьааIдисабы кIелиханаъа деш. Гьар сен районни хиваршее 8-9 майил’ Гъамувхьайни байрамыс къассырыйн йигъынджагъбы илгъечIи. ЦIедда хиваршее алгъайгьи, хъийгъа районни марказее.
Гъамувхьайни йигъыс къадсырыйн тадбырбы йишди районни гыргыни хиваршее тентенейвка илгъечIуйнбы. Мани байрамбышее йишди редакциейни ишчершед гьаIракатукван иштыракбы гьаъуйнбы.
Майни 8-чил’ Мишлешни хивее ман байрам мактабыссе гидгъыл, хивни майдама тентенейквани маджлисыква таамхьа. Мааъад Мишлешни хивни администрациейни хааIрынкъве Ислам Ибрагьимове, «Нур» кIазетна хааIрни редакторе Байрам АIбдуллаеве, хивни имаме Сабир-гьаIджий Ибрагьимове, Дагъыстанни Джамиятни палатайни уIзве Сабир Сайдумове, мактабни директоре Элескер Лачинове, хивни клубни директоре Мустафа Рамазанове ва мебынбыше иштракаъу. Манбыше махъа сабыйнбы Гъамебхьайни Йигъыка табрикавъу. Гойне мактабни ва «Настенька» донани бахчейни ушахарше даIвъийс къадсырыйн сабара тамашебы гьагу, шечIбы хъадIхъыI.
Гьаманиджад йигъыл’ Лекни (Къурдул) хивее ХаIбни Ватанни даIвъийе иштыракаъуйнбышис къабсырни гьаIйкалын ачылыш ыхьа. Махъа абыйни мигьманарше хивын джаIмаъат къаджейни хайирхагь ишбышиква табрикавъу. ГьаIйкални ачылышей Дагъыстанни Халкьни Маджлисна депутат ШаIфи АIбдуллаев, «Нур» кIазетна хааIрна редактор Байрам АIбдуллаев, Дагъыстанни Джамиятни палатайна уIзву Сабир Сайдумов, Дагъыстанни хаIрынкъусанейни кьаIсынбышди Cоветейна йишди миллетыкена уIзву Айдын Бабаев, Сувал’ни дерайл’ни ветеранаршина садры НезирмагьаIмад AIгьмадов, Рутулни районни хаIрынкъуна кумагчий ЫIбадуллагь ГьаIджиев, Рутул районни маданиятни, спортни ва джегьилершини ишбышди управлениейна хааIрнна Саид Сулейманов, Гыл’мецIни хивни администрациейна хааIрна Гъейбуллагь ЫIмранов, Сувал’ни дерайл’ни «Инсан» донани фондна хааIрна АIсадуллагь Рамазанов, хивын инсанар Гъариб АIлиев, ЫIсмаил ЫIсмаилов, Адил Давудов ва мебынбы йишонувхьа. Манбыше махъа сабыйнбы 9-май байрамыква табрикавъу.
Айдын Бабаеве ва НезирмагьаIммад AIгьмадове Лекни хивеена гьаIйкал аляаъас кумаг гьаъуйнбышис ва вудж алявъуйнбышис грамотабы гьуво.
ГьаIйкалын ачылыш ыхьайле хъийгъа хивни манзикее хивни джамаъаIтын югун садакьа гьуво. Аллагье кьабыляъан!
Гъамебхьайн Йигъыс къадсырыйн йыгъынджагъбы ЦIаIхни, ДжинаIгъни, Муслагъни, Гыл’мецIни, Миххьейни, Хьойикни, хиваршее илгъечIу. Мани хиваршини джамаъаIтын джони ветеранаршилхъа раIгьмат къахову. Хиваршеедын гьаIйкалбы абрелхъа хъаляу.
Сувал’ни дерайлин Гъамебхьайни Йигъыс къадсырыйн тадбырбы майни 9-чил «Мишлеш-Хьойик – ЦIаIхий – Хиягъ — Михьег автопробегыква таамхьа. Гойне Гъамувхьайни Йигъыс къабсырна тентенайквана маджлис Рутулни марказеени майдамыл’ илгъевчIу. Мааъад Рутул районни хаIрункъун сабара гагьна ишбы къедженкъве Ширин ОIмарове, Дагъыстанни Халкьни Маджлисни депутате ШаIфи АIбдуллаеве иштыракаъу ва махъа сабыйнбы байрамыква табрикавъуйнбы.
