Майни хьебцIалинчи’ Рутулни районени цIаIхбышди Мишлешни хивее шейхни, динэгьлийни СултIан Шейх-эмир ал’-Мишлеши едигарыс къабсырна маджлис-мавлид илгъевчIу.
Гьайни сен 463 сен быкырхьа СултIан Шейх-эмир раIгьматыххъа аркIынийн ва гьаIкIени дюнйелхъа кочмишхьайн.
Мани Шейхын до хаIдданани ааIлимаршини китаббышее растына хъадайли. Манкъуни гьаIкIеедын маIълумат джуни китабее «Табакат» Шуайб-эфенди ал’-Багине гьели водун. Манкъвее эйгьи водун: «..джони вахталийни ааIлимаршина султIан…».
Мани баракатнани маджлисе Дагъыстан Республикайни Муфтиятенче абыйни ааIлимарше, гунайни Дагъыстанни районбышеенче абыйни имамарше ва гьихъийаллани хиваршенче абыйни джамаъаIтын иштыракаъы. Маджлис Кьуране одкIунийн аятбы хъаIдаххъа гибгъыл. Абыйн мигьманар саламыква къаршламишааъа, маджлис «Ас-Салам» кIазетни хааIрни редакторе ГьаIсан Магьмудове ачмишавъу. Манкъвее джун чыхыш Дагъыстанни Муфтийе АIгьмад АIбдуллаеве къахувыни саламыква гидгъыл.
Гь. Магьмудове Мишлешни хивни югни аIдатни гьаIкIее Усман- эфендий ал’ – ЦIаIхе одкIунийни китабеенче хъаIдхъы.
Маджлисее иштыракаъани динни ааIлимарше СултIан Шейх-эмирни хъобкуба вуккуйни ыIмрени гьаIкIеедын маIълумат, манкъуна исламни диныква ва ман еймишауйква багълыбанана заIгьмат юшенавъу; тасавуф ыIлимыкен ихтелет гьаъы ва манчина джига исламни динее гьаагу.
ЦIаIхни дерайл’ни имаме Эл’дар-гьаIджий Сулейманове джуни чыхышее увгьойн: «СултIан Шейх-эмир исламын дин кIорааленче ацIана ааIлим ыхьа. Джун ацIаал’ ваIъазбышиква джамаъаIтылхъа еймишаъа ыхьа. Манкъухъаб хаIбба джуни йаIххъын аIлгьаан гьар хиваршенчен телябабы вухьа. СултIан Шейх-эмирна дараджа гьаммаше кьома вухьа….»
Чыхышбышди аIреени манзилбышее абыйни мигьманарше ва джигайл’ни джамаъаIтын аIрабни ва цIаIхни мизяршил мавлид ва нашидбы хъаIдхъы.
Джуни чыхышее Мишлешни администрациейни хаIрункъвее Ислям Ибрагьимове маджлисыс ахтыйна кьиймат гьуво ва манчини ваджибыйвал’ни гьаIкIее увгьо. Манкъуни джуваббышихъа гора, маIгьадни маджлисбыше инсанаршин дин утIумаъа, мугьуIббат гуджлемишааъа, таарых йикIелхъа хъаляъа, джегьилершис тербие гьели.
ДР-ни Муфтийни Гунайлни Дагъыстанеени эл’чийе МуIгьаммад- рамазан Раджабове Мишлешни манзикни имамыс Сабир- гьаIджий Ибрагьимовыс ташаккурийвалла гьоолен кагъыз гьуво.
Маджлис таамувхьайле хъийгъа, хивни джамаъаIтын Шейхни рыIгьыле маджлисеехъа абыйнбышис садакьа гьуво. Мана Аллагьыс кьабылёохьена заIгьмат волонтерарше хивни хаIрункъуни И. Ибрагьимовни регьберийваликва гьавъу.
Абыйн мигьманар СултIан Шейх-эмир бастурауйни нюкьнелхъа зиярат гьаъас гьабкIын.
Маджлис таамувхьайле хъийгъа, манчини гьаIкIеедын ихтелетбы Мишлешни админстрациейни хаIрункъве Ислям Ибрагьимове, Мишлешни йыIкьнекни мактабни директоре Элескер Лачинове, Мишлешни хивни Маданиятни хавни директоре Мустафа Рамазанове, агъсаххъал маIъаллимарше: ЫIсмаил Мамедове, Джаббар Мамедове, ГьаIфиз Къубалыеве, къонши хиваршенче абыйни мигьманарше Мустафа Бабаеве, ХанаIгьмад Гераеве, ГьаIджиэфендий Камазове ва мебынбыше. Манбышди гыргынбыше маджлисыс югна кьиймат гьуво ва маIгьдын маджлис-мавлидбы зарада-зарада медни цIаIхбышди хиваршейид алгъагьас лазымда водунбыва увгьо.
