Аlхырейни сенбышее дюнйейни еймишивхьайни коронавирусни чlырываллайн инсанаршина саакитийвалла пызмишавъуна. Пандемиейн гьокуlматбышис хаlдын зарал гьели. Садджу Россиейл’ мани азарыке гьар йигъыс аазырыле гьеххана инсан хъекlа. Мана гьиджо баляа вухьай садджу начахувхьайнбышикlле ваацlа.
ЫIсмаилов Гьаlсане, больницейхъа къаляаъассе гьихъа, са уlл’джумна хааъад маалидже гьау. Манкъве къыздырма даахъа хъаъасдимее джурабаджура маалиджебы ыккы. Амма нишикеджад кумаг ыхьа деш. Манкъуна вазият йигъ-йигъыле дагъам хъоохьи гибгъыл. Чараа къабтlымее, хаахъа дохтурар хъобтlул. Больницее хъувойни анализбышин манкъухъаб коронавирусна чlырывалла ашкаравъу.
Гьаlсане больнице къалле йигъ гьау. Манкъуни увгьойка, энки дагъамын нафас алятlас даlхый ыхьа, манчини алла мана ИВЛ аппаратылхъа хъау. Дохтурарше манкъус лазымын маалидже гьауйн. Къийна Гьаlсан сагъра саламатра хизаныка ворна. Амма манчихъа ил’дяакы, мана темизра джулхъа хъары дешда. Коронавирусни чlырываллайке югра хъуваркасме, манкъве алава маалиджебы ыккекка, дохтурарше гьагуйн алава профилактик ишбы къеджи.
Заквани ихтилете Гьаlсане увгьойн: «ЗакIле къаджыйн, меринкъукIле мысаджад къидеджен. Коронавирусыке начахехьива мысадджад йизди фыкрейхъа хъады деш. Мана азар залхъа наlгьаб салавтIувхьай ацlа деш. Дохтурарше гьагуйн гыргын профилактик ишбы къедженбыний. Садджу са карее зы саймазыйвалла къавукку. Чини вахтал’ вакцина гьавъу деш. Вейба гьидявъуна сабабыб инсанаршини аIрайлин джурабаджура ихтилетбы ыхьа. Манбышди гьаlкь дешди гафын йизда фыкыр бадалавъуна. Манбышис кlыры гьидёву, чини вахтал’ вакцина гьаъасный вуккан».
Гьаlсан хьинне вакцина гьидявъу йигъыс начахоохьенбы хаIбба вобунбы. Дохтураршини увгьойка, къийна мани дагъамни азарыке садджу вакцинациейн къорамишааъас. Амма хаlббананбыше мани сардан саймазыйвалла гьааъа. Вакцина гьааъас телесмишоохьи деш.
Дагъыстане коронавирусыке чlыры хъидехьесдимее, цlебба вакцина гьааъанбышди аlрайл’ зынар ыхьана. Манчика зы йизда аlгьтият гозетявъу. Йишда сагъламийвалла садджу ши чини вахтал’ гьавъуйни вакцинайке аIслыба
Къийнийни йизди макьаале зы ненаджар вакцина гьааъас хъоотIал деш. Къийна коронавирусна чlырывалла, увгьойбышика, садджу вакцина гьавъуйке явашааъас ваахаlс. Гыргына сагъра ихьена. Чlырынбы девхьенбы! Агар маIгьбынбы вобхьей экIба хъувабканбы!
