Кьурбанын ХаIдын йигъ мусурманни уммайн хаIдын байрам водун. Ман Рамандини ХаIдни йигъыле хъийгъа, йигIцал’ йигъ илгъечIуйле хъийгъа, алгъайгьи. Гьайни сен Кьурбанын ХаIдын йигъ дюнйейл’ мусурманарше июльни ючIунчиле йицIыссанчилхъамее алгъавгьу.
Манчихъад кIоран аваала заманайле хъооIн таарых водун. Кьурбанни хаIдни йигъыл’ даварар, чаврабы, девабы гяатIа. Ман аIдатыд Ибрагьам пейгъанбарыква алакьада водун. Манкъвее кьурбаныс Аллагьни йаIххъеххъа джуна тек дих ЫIсмааыл’ гекIанкъаI, Аллагье хаIйбышеенче маляикыква дихни джиге гивкIас къарг къахову. Манчиле хъийгъа, кьурбан гивкIуй сунна вухьа. Манчини гьаIкIеедын аIтрафлы маIълумат динэгьлершикIле югда ацIа водун.
Кьурбанын ХаIдын йигъбы гигъалассе Маккайлхъа, Мадинеехъа гьаIдж къилмишааъас гьавайкан. ГьаIдж къилмишавъуйиб, агар оIххъасда имкан вобхьее , мусурманийн бордж водун. Гьайни сен гьаIдж къилмишааъас гьабкIынийнбышди аIрее йишин цIаIхбыб вухьайнбы. Манбышин сабарабы джони харджийбышиква гьабкIун, сабаранбы Сулейман Керимовее джуни пылыке йаIххъылявъу. Ненкъуни гьаIджихъаб нена дераджа вухьай, садджу АллагьыкIле ацIа.
Шахъабыб Аллагьни йаIхъеехъа садакьа гьелен инсанар вобунбы. Манбышда сайир муслагъалий ГьаIджимуса ГьуIсейнаIлийна дих ворна. Мана МаскIав ешемишехьи ва маайир хаIбни къуллухыл’ ишлемишехьи ворна. ГьаIджимуса ГьаIджимусаеве хаIдда хайирхагь ишбы сенис къеджи. Манкъвее йаIхъбы, гармабы, зияратбы хъаъас, истирагьаIт гьаъан джигабы аляъас гьар сен джуни халкьыс кумаг гьели. Маныд джуни вар-девлетикен хъелен закат водун. Гьайни сен манкъвее закатыс кьурбаныс гятIасын 65 къарг Сувал’ни маIгьалыл’ни Муслагъни, Хьойикни, ЦIаIхни , ХыIягъни хиваршее хаас-хаас битIалау. ОIгилийни сенбышее манкъвее гятIасын кьурбанбы алидни дерайл’ни цIаIхбышди хиваршее битIалау. Манкъуни ниятее водун хъалесди сенбышее кьурбанбы ахуйни Сувал’ни магьаIлыл’ни хиваршеехъа гьувой.
Кьурбанбы гяатIани йигъыл’ залхъа ЦIаIхни хивни джамаъаIтын зенг гьау. Манбыше хааиш гьауйн гьайин джуваббы кIазетеенче ГьаIджимуса ГьуIсенаIлийни духайлхъа гьихьараий: « ГьаIджимуса чодж, гъу шас садакьайс гьувойни кьурбанбышиле Аллагь разийра ахванана ва ман йигъын гьаIракат суваабыс окIанан. Вас, йигъни дёлесинбышис джанана сагъвалла гьевлена! Йигъни кисайс барака гивхьена…» Умуд гьааъана, гьаIмагьдын джад алхышбы Муслагъни, Хьойикни, ХыIягъни джамаъаIтбыше гьаы ихьес.
ьес.
