Гьар сен, ноябрьни 4-чил’, йишди гьоIкуматыл’, Россияйл’, ешемишехьени миллетбышин садибын Йигъ алгъайгьи. Ман гьоIкуматни байрамыс гьыIсабехьи. Мани йигъыл’ инсанарше истирагьаIт гьаъа.
Россияйни миллетбыщин садибын Йигъ 2004 сенни декабрьни вуза Россияйл’ни динбышди мислягьаIтыква тасдикьау. Байрамна метлеб Россияйл’ ешемишехьен гьар миллетбы, гьар динбышис ыIбадат гьаъан халкьбы саджигеехъа савъуй ва манбышин сана-санкъукан алакьабы, мугьуIбатбы утIумауй вухьа. Къийна Россиейл’ аIсас ёкьни диныс ыIбадат гьаъан миллетбы (хачбаразар, мусурманер, ягьудер, будистар) ешемишехьи водунбы. Гьар диныхъадыд чин джурабы, мазгъаббы водунбы. Мани динбышис ыIбадат гьаъан инсанарыб джамаъаIтбышилхъа битIалоохьи. Гьаарункъухъабыб джуна адабиятна миз вобна. Манбышди гыргынкъухъаб са Ватан — Россия вобна . Россиейна гуджиб манбышди садибыйвалее ва мислягьаIтее вобна.
Йишди тезе таарыхе ман байрам цIедда 2005-ъэсди сенни 4 ноябрьни йигъыл’ алгъайгьи гидгъыл. Анджах мани байрамыхъад йиссейн таарых водун. Ман сабара асырбына гьихъа къейдаъа гидгъыл. Ман байрам гьаIмагьад джад деш мани йигъылхъа хъады. ХVII асырни кьома, 1612 сен МаскIавна шагьар полякаршике азадавъу. Эле гьаман байрам гьаманчиква алаакьа гьаы. Россиейл’ ман Йигъ 1917 сенилхъамее, революцие ихьесмее байрам хьинне алгъайги ыхьа. Анджах Совет гьоIкуматни девыре мани йигъыхъаб гьоIкуматни байрамна кьувва вухьа деш. Манчихъа гора , 4 ноябрь тезе байрам дешедун, ман йиссейн ва мед аIрайлхъа хъадыйн гьоIкуматын байрам водун.
Россияйни миллетбышди садибни Йигъын шас имкан гьооли са миллет хьинне вухьес, са оIлкайн инсанар хьинне вухьес, са ихтиярбыйий борджбы хьинненбы вухьес.
Россиейни тезе таарыхе Россияйни миллетбышин садибын Йигъ 2005-ъэсди сенни ноябрьни 4-чил’ цIедда Дагъайбни (Нижний) Новгород алгъайгьи гидгъыл. Мани йигъыл’ шагьарни йыIкьнее Кузьма Мининыс ва Дмитрий Пожарскийс къабсырна гьайкал гивхьу. Манчиле къийгъа, байрамбышда лапI быкырни Россиейлхъа еймишивхьа. МаскIав, Санкт-Петербург ва медни чIакIни шагьарбышее гьар сен чIакын иджласбы, байрамбы ва медын йигъынджагъбы илгъечIи. Мани йигъыл’ джурабаджур муIгьуббат артымишаъан, миллетбышин аIрабы утIумаъан йигъынджагъбы: ярмаркабы, гьагуйбы (выставкабы), гезентибы, спортын баIстбы, оIюнбы, концертбы илгъечIи.
Къийнийни йигъыл’ мани джуваббышихъаб: «Россияйни миллетбышин садибын йигъ» гьалеб хаIбна маIъна вобна. Гьайни сен февральни вузаке Украинее спецоперацие гидгъыл. Манчина метлеб вухьана — Донецкни, Луганскни республикабышее ешемишехьен урусаршин миллет укранацистаршике къорамишауй. Къийна ман республикабы джони раазиваликва , референдум гьауйле хъийгъа , Россиейни таркибеехъа эчIу водунбы. Анджах Украинайс манбы хылеле къайиккас ыккан деш. Манбышиле гъайре, Россиейни таркибеехъа Херсонна ва Запорожиейна вилаетбы джони раазиваликва эчIу. Анджах Украинайс манбы селлимаъас ыккан деш. ХаIм-йигъ манбыше Америкенче ва Авропенче хъооIни ярахыква маадын шагьарбы, хивар кьадахъаъа водунбы. 8 сен водун ман атыш таам дехьен. Гьел’бедти, Россияйн мааъад ешемишехьен миллет джони баляаква, уцIурыква, дагъамийваликва текда гьадсыр деш. Ман торпахбы нацистаршике ва фашистаршике темизяъасдимее, Донбассхъа йишин эскерар эбчIу вобунбы. ГьаIшде мааъад гуджнакван вурушбы аIл’гьаа водунбы. Мани эскераршини аIрее йишин джегьилерыб кIылба дешобунбы. Къийна манбыше мааъаб Россиейни миллетбышда садибийвалла гьаагва вобна. Са окопее мыгы-мыгайс гьуво урусар, бурятар, татарар, башкирар, чеченар, аварбы, цIаIхбы, табасаранлыбы, якутар ва медын Россиейл’ ешемишехьен миллетбы водунбы укранацистаршиква ва хаариджийле абыйни наемникаршиква вурушмишоохьи.
ЦIеббыйни джиге инсанаршини джанана сагъвалла вобна. Анджах ман истирагьаIт гьаъан йигъ водун. Байрам инсанарше хааъад, дачебышее, кIылба инсанар сабайлени джигее алгъагьас, няъас увгьее мункум вобна къирагъыле нягьаIкьын ишбы къаджес.
Ши меб гыргын Россиейл’ ешемишехьен миллетбы хъойтIаланбы саджигеехъа савалес, мислягьаIтбы гьоIкуматни хайирысын гьаъас. Шахъаб са хаIбна Ватан Россия вобна.
