Сентябрьни санчил’ йишди гьоIкуматыл’ АцIаалин Йигъ алгъавгьу. Мани йигъыл’ шыгыртаршини, телябабышди гьийд мактаббышин аккабы ва колледжбышин, техникумбышин, институтбышин, университетбышин дарвазабы ачмышхьа.
Мани йигъыл’ тезе хъаIдхъийн сен гийгъал. АIсас фыкыр 1 сыныфеехъа хъабыйни шыгыртаршилхъа ва 1 курсеехъа хъабыйни телябабышилхъа хъаIдхъийни ташкилатбыше гьооли. Гыргыни мактаббышее ва колледжбышее мани йигъыл’ АцIаал’ни Йигъыс къадсырыйн линейкабы, маджлисбы ва тамашебы илгъечIи. ХъаIдхъийни ташкилатбышди чIакIынбыше, районни хъаIдхъийни управлениенче ва хъаIдхъийни ва ыIлимни министерствеенче абыйни эл’черше ушахаршини, джегьилершини гьийд тербие ва хъаIдхъийни гьаIкIеедын маIълумат гьелен чыхышбы гьаъа, ушахарше концертна программа (мыкIар, маIънийбы) тамашейс гьагва.
1 сентябрыл’ мактабни маIгьаллэе Россиейн, Дагъыстанын байдахбы къалхмишаъа ва гимнбы хъаIдаххъа. Гьаманиджад йигъыл’ ватанпарасыйвал’ни, игитийвал’ни гьаIкIеедын дарсбы илгъечIи. Гьел’бедти, ман гыргын йигъынджагъбы цIаIхбышди ушахарше хъаIдаххъани хъаIдхъийни ташкилатбышейид илгъечIенбы.
Дагъыстанее цIаIхбышди ушахарше хъаIдаххъан мактаббы аIсас Рутулнийий Бабаюртни районбышее водунбы. Рутул районее хьодле йыIкьнекин мактаббы (ДжинаIгъын, Мишлешин, Муслагъын, ЦIаIхын) водунбы; Бабаюртни районее хьебыдле цIаIхбышин мактаббы (Калелин, Теземуслагъын, Камбулатын) водунбы. Маани мактаббышее цIаIхна мизиб илгъоочIена. ХаIббанани цIаIхни миллетни ушахарше гьаIшде МаIгьачкъалайни мактаббышее хъаIдаххъа водун. Анджах мани мактаббышее цIаIхна миз илгъоочIи деш. Манаб йишди миллетна девхьаалла ва башара девхьай вобна. Мани карее хаIдын тахсир къуллухчершин, джаIмаъатни палатее гюъурни уIзвыйн, депутатаршин водун.
Гьар сен, сентябрьни 1-чил йишди мактаббышее маджлисбы илгъечIенбы. Гьайни сенид ман аIдатбы гьуваджийнбы.
Гьайни аIхреени сенбышее четинна вазият яраммишивхьа. Манаб ушахар девхьайква. мактаббы багъламишауйква багълыбанана вобна. АIхреени 2-3 сенни аIрее МиххьегIын йыIкьнекин мактаб, Коршын, Атталын, Хьойикин, ХыIягъын дагъайдни сыныфбышин мактаббы, Лекын быкырдехьайн йыIкьнекин мактаб утIумхьа. Манчина сабабыб мактабеехъа хъооIн ушахар девхьай вухьа. 25-30 сенна гьихъа ман мактаббы ушахаршиква гяцIыний. Мактаббы утIумаъэй, хиваршеедын иш джигабы айкIананбы. Иш дешданкъаI, доннухыд эхьи деш. ГьаIшде малкъара гьидваджени джигее, доннухыд аляатIан джига дешхьее, хизанбы доламмишааъас аIхас деш. Манчихъа гора , джегьилера хиваршее аахва деш.
Къийна ЦIаIхни йыIкьнекни мактабее 5 маъаIллим, 10 ушах ворна.
Директорни АIбдулгьаIмид ГьаIджиевни увгьойква, 1 сентябрыл’ мактабее АцIаал’ни Йигъыс къабсырна маджлис вухьа. Махъа хивын джамаъаIт, администрациейн ишчера сабы. Директоре сабыйнбышди гьийд мактабни ишин, вазиятын ва оIгее гиххьыйни месалабышди гьаIкIеедын чыхыш гьаъы. Абыйни мигьманарше джони чыхышбышее маъаIллимаршис ахтына кьиймат гьувы ва ушахаршис хъаIдхъее угьурбы аIрзуламишаъы. Мактабни ушахарше шечIбы хъаIдхъы ва тамашейс мыкIара гьаъы. АIхрее едигарыс саджигеедын шикыл’бы цIыцIаъы. Мани йигъыл’ цIеддыйн дарс ватанпарас тербиейс къадсырыйн ыхьа. Ушахаршис ветеранаршини ва СВО иштыракаъани хивни джегьилершини гьаIкIеедын маIълумат гьувы.
Мишлешни йыIкьнекни мактабее нягьаIдый цIеддыйн хъаIдхъийн йигъ гидгъыл завуче Элескер маIъаллиме хабар гьувы. Манкъвее шаквани гафее увгьойн: « ОIт’мишхьайни 2024-2025 хъаIдхъийни сен йишди мактабын 15 ючIудле сыныф таамаъуна , 1 йицIыссад сен таамауна шыгырт къайиккы. Мани хъаIдхъийни сенее мактабын югун натийджабы гьагу. 15 сана ушахее гыргын ОГЭ-бы югда хъувы ва манбы колледжбышеехъа, техникумбышеехъа ва училищебышехъа иккебчIуйнбы. 11 сыныф таамауйни джегьилейид ЕГЭ-бы дагъамийвал’бы дена хъувойнбы. Манар хъаIдхъас эчIуна. Манчиле ши шадеебаххьенбы. Манбы йишди маъаIллимаршини ишин екунбы водунбы. Къийна йишин маъаIллимар гьалеб гуджнаквани гьавасыква ишлемишоохьи вобунбы.
Гьайни сен йишди мактабеехъа 10 ушах 1-ъэсди сыныфеехъа хъары. Гыргыба саджигее мактабее гьайни сен 65 ушахее хъаIдхъас. Манбышис ацIаал’, тербие 17 маъаIллимарше гьелес.
Ши гьар сен АцIаал’ни Йигъыс къабсырна маджлис 1 сентябрыл’ алггъаагьа. Мани йигъыл’ мактабее ватанпарас тербиейс къадсырыйн дарсбы илгъечIи, горушбы СВО-ка багълыданан алгъайгьи, ушахарше тамашейс концертна программа гьаагва, ушахаршис тезе китаббы битIалаъа ва медын йигъынджагъбы алгъайгьи…»
ДжинаIгъни йыIкьнекни мактабее нягьаIдый АцIаалин Йигъ илгъечIу шас хабар мани мактабни директоре ГьаIджиев Нажмудине ГьаIджийни духее гьувы. 1 сентябрыс къабсырна маджлис Россияйн, Дагъыстанын байдахбы къалхмишауйква ва Россиейни, Дагъыстанни гимнбышиква гибгъыл. Махъа хивын джамаъаIт, администрациейн ишчера сабы. Директоре сабыйнбышди гьийд мактабни ишин, вазиятын ва оIгее гиххьыйни месалабышди гьаIкIеедын чыхыш гьаъы. Абыйни мигьманарше джони чыхышбышее маъаIллимаршис ахтына кьиймат гьувы ва ушахаршис хъаIдхъее угьурбы аIрзуламишаъы.
Гьайни сен ДжинаIгъни мактабни 1 сыныфеехъа тезеба 2 ушах хъабы.
Н. ГьаIджиевни увгьойква, джохъадыд авхуйнбышихъад хьиннен дагъамийвал’бы водунбы: ушахар кIылба, джегьил’ маъаIллимар хъооI деш, тезе китаббы еттыгъда мактабеехъа хъадайли деш ва медынбы.
Гыл’мецIни йыIкьнекни мактабее нягьаIдый АцIаалин Йигъ илгъечIу шас хабар мани мактабни маъаIллиме Тарлан Дадашеве гьувы:
— Гьар сен йишди мактабее АцIаалин Йигъ гейдни марахыква илгъечIи. Мани йигъыйс ши мактаб беземмишаъа. Мактабеехъа хивни администрациейн чIакIынбы, ветеранар, СВО иштыракчер, спортсменар ушахаршиква горуш гьаъас хъооIтал. Гьайни сен йишди мактабеехъа ЦIаIхни дерайна имам Эл’дар-гьаIджий ары. Гьале къыIлина тербиейни гьаIкIеедын, динни гьаIкIеедын дарсбы гьелес мана арайли ыхьа хивеехъа. Хивни имамыква, мактабни пионервожатыйква АIсадулла Рамазановыква саджигее манбыше тезеба мактабеехъа хъооIни ушахаршис шыгыртна чантей гьувы. Манбы спонсораршини кумагыква фонд «Инсанын» алищу.
1 сентябрыл’ мактабее игитийвалин дарсбы илгъечIу; ушахарще цIаIхбышди шааираршин шечIбы хъаIдхъы; абыйни мигьманарше тербиейква ва хъаIдхъийква багълыданан чыхышбы гьаъы.
Гьайни сен мактабни 1 сыныфеехъа 6 ушах хъары. Гыргыба мактабее 54 шыгыртее хъаIдаххъас. Шинаб, маъаIллимар, чалышмишивхьесынбы манбышин хъаIдхъий гьаIракатеехъа адчес. Гыл’мецIын йыIкьнекин мактаб таамауйни гьаарни джегьилее хъобкуна ыIмреехъана йаIхъ тIабалааъас вуккан. ЦIедда джус, хъийгъа хизаныс, чихъадхъигьнад хивни джамаъаIтыс хайир гьелесда инсан манкъуке хъигъечIес ыккан…»
1сентябрыл’ ярашугъыквана АцIаал’ни Йигъыс къабсырна линейква Муслагъни мактабейиб илгъевчIу. Мана маджлис Россияйн, Дагъыстанын байдахбы къалхмишауйква ва Россиейни, Дагъыстанни гимнбышиква гибгъыл. Сабыйнбышди гьийд чыхыш мактабни директоре Мустафа МагьаIррамове гьаъы. ЦIедда манкъвее шацыйни сенийн екунбы ыIхы. гойне тезе 2025-2026 сенни гьийд гиххьыйн метлеббы ва месалабы агъмишаъы. Манкъвее маъаIллимаршини ишис ахтыйна кьиймат гьувы. М. МагьаIррамовни увгьойква, эн хаIбна дагъамийвалла къийна мактабеехъа хъооIн ушахар девхьай вобна. Манчин йишин гыргын фыкреедын пIланбы пызмишаъанбы. МаIгьабна дагъамийвалла гыргыни мактаббышее вобна….
Гойне игитийвалин дарсбы илгъечIу ва Афганистан вухьайни даIвъийни ветераныквана ва СВО иштыракчийкван горуш ыхьа ва манбыше ушахаршис хабарбы гьаъы.
Къийна Муслагъни мактабее 6 ушахее хъаIдаххъа водун. Манбыышис дарсбы 10 маэъаллимее гьели. 1 сыныфеехъа хъооIн ушахар гьайни сен вухьа деш.
ХаIбна АцIаал’ни Йигъыс къабсырна маджлис Бабаюртни районеени Калел’ни йыIкьнекни мактабее илгъевчIу. Ман йишин, цIаIхбышин, гьаIракатыква ишлемишехьен мактаб водун. Мактабни завучни ТIагьир Джанаевни увгьойква, 2025-2026 хъаIдхъийни сенее Калел’ни мактабыхъад 10-11 сыныфбы дешинбы. ХаIббанан ушахар 9 сыныф таамаумее. хъаIдхъас шагьарбышеехъа авайкIан. Гьайни сен Калел’ни йыIкьнекни мактабни 1 сыныфеехъа 12 ушахар хъабы. МаъаIллимараб гьаIзирба вобунбы ушахаршис тезе ацIаал’бы ва тербие гьелес. Вахтале-вахталхъа маIгьдын йигъынджагъбы, маджлисбы, конкурсбы, олимпиадабы мани мактабее илгъечIенбы. Мани карее манбышихъад хаIдын къулай водун.
Камбулатни, Теземуслагъни йыIкьнекни мактаббышее нягьаIд АцIаал’ни Йигъыс къадсырыйн маджлисбы илгъечIу ыхьай шахъаб хабар дешда.
«Нур» кIазетни редакциейн маъаIллимар, мактабын ушахар тезе хъаIдхъийни сениква табрикааъа. Манбышис угъурбы аIрзуламишаъа.
