Февральни 15-чил Афганистаныле Совет гьоIкуматын ярахын къошунбы хъигъечIуйн хьебцIале йигIыдле сен быкырехьи. Мани йигъыл’ йишди оIлкайни гыргынанкъаI Афганни гьаIдисабышее гьабтIуйн эскерар йикIел’хъаляаъа, йигъынджагъбы алгъайгьи.
Таарыхыле шакIле ацIанки, Афганистан хаIдданани кьувватнани гьоIкуматбыше джос таIъбы гьаъасын гьаракатбы гьагу. Амма джон гьаракатбы джосджад аху. Мани торпахыл’ еттыгъна эб кIявъуйнчиле хъийгъа, манче къел’бы алятIас маджбырувхьа.
Къадъэсди асырни йигIцIалесди сенбышее Афганистаныл’на вазият дагъам хъувхьа. Мааъаб ватандаш даIвъий гибгъыл. Мани оIлкайни чIакIынбыше Совет гьоIкуматыке кумаг гьеххъы. МаIгьад 1979 сенни декабрьни вуза йишди оIлкайн ярахнан къошунбы Афганистанхъа иккейчIу.
ЮчIни сеныле гьеххада советни эскерарше мааъад интернационал бордж хъели ыхьа. Мани даIвъийе хьодваIще хьоцIал’ аазыр офицере ва эскере иштыракау. Манбышике йицIуххьар аазыр инсане Ватаныле аIкьанани диярбышил’ джанбы гьуво. Манбышди сыранэй мишлешелий ГьаIйдаров ГьаIзратаIлий Джамалийна дих ва Кьасни хивеенчена Мусаев Муса МуртазаIлийна дих вухьа.
Афганни даIвъийе хьебыд аазырыле гьеххани дагъыстанныбыше, СССР-ни гыргыни миллетбышди игитершиква саджигэй, джона дирибашийвалла, джомардыйвалла гьаагу. Манбышди аIрее цIаIхни миллетын игит духйебыб кIыл’ба деш вухьа.
Афганистанни торпахылхъа интернационал бордж хъелес аттамишивхьайни эскераршини аIрее муслагъалий Баширов Идрис ШаIъбанна дихыр ыхьа.
И. Баширов 1960 сен Муслагъни хивее едике ыхьа. Мааъад молюдле сыныфнан мактаб таамау. Хъийгъа хъаIдхъий Мишлешни йыIкьнекни мактабе давамау. 1979-1981 сенбышил’ Афганистаныл’ къуллухавъу.
Идрис чоджее эскерийваллайни гьаIкIее гаф гьааъанкъаI увгьойн: « Йизын эскереедын цIеддыйн вузар Туркменистанни Кушка шагьарыка багълыда ыхьа. Хъийгъа зы Самаркандхъа механик-сюриджийн саIнаъат алятIасди меега хъаIдхъас къахову. Сабара гагьыле хъийгъа ши тревогайква къалхмишавъу, мееб Кушкайни сураххъа оIтиравъу. Манче 1979 сенни декабрьни 29-чил Афганистанхъа иккебчIу».
Идрис Башировни увгьойка, советни эскераршини меега Афганистанылин цIеддыйн сенбы энки дагъамынбы ыхьа. Манкъуни джуваббышихъа гора, эскераршихъаб аIдатыйна гьазирийвалла вухьейиб, амма афганни моджахедаршини тактикайле башта вухьайниме вахтний вуккан. Гьеле манчини аллаб цIеддыйни сенбышее хаIбба йишин эскерар гьабтIу.
Сержант И. Баширов мотострелковый полкни танковый баталённи таркибее Герат ва Мазаришариф шагьарбышее вурушмишхьа. Манкъуни игитийваллайс гьоIкуматын ахтыйни наградабышиква лайикьау.
Эскерейнче хъарыйле хъийгъа сабара себына мана едике ыхьайни Муслагъни хивее гуд’мишхьа. Хизан къурмишавъу. 2003 сеныле МаIгьачкъалайни шагьаре ешемишехьи ворна. Идрис чоджийна мураад гыргынанкъаI даIвъийбы явашхьай вобна. Манкъуни увгьойка, джокIле къаджейнбы архайле хооIни насылбышикIле къимеджеджен. ГьаIйифки, сабара алчахаршис ман баштада дешин. СВО ман субутаъан. Амма шакIле ацIан, ши гьаIхълыба вобунбы ва мутлякь ши гъамувхьесынбы!
Афганни даIвъийе вухьайни интернационал-эскераршис, Украине аIлгъаани СВО игитершис джанана сагъвалла аIрзуламишааъа. ГьоIкуматын ненкеджаб джон кьаIгьраманар кIеливханааъас деш. Ман гьаммаше ыхьайн , водун ва ихьесын!
