Гьайни сен Дагъыстанын китаб чапхана ишлемишехьен 100 сен быкырхьа. Октябрьни 23-чил’ республикайни марказе , М. Горькийни дойил’ни Урусни драмтеатырни КIыл’ни утагъее Дагъыстанни китаб чапханайни са асыр быкырхьайс къабсырна маджлис илгъевчIу.
Мани шадни маджлисее республикайни гьаIкимарше, чIакIни къуллухчерше , язычерше, шааирарше, чапханайни ишчерше (редакторарше, корректорарше, художникарше, дизайнерарше), адабиятни устадарше, гьаваскарарше, журналистарше иштыракаъы.
Маджлис гивъалассе гьихъа утагъеехъа сабыйнбышис Дагъыстанни китаб чапханайни таарыхни гьаIкIеедын кино гьагу.
Республикайни гьуIкумни дойиле Китаб чапхана юбилейиква табрикааъан чыхыш ДР-ни Правительствайни садрыйни маIъвыне Рамазан ДжаIфарове гьаъы. Манкъвее Дагъыстанни китаб чапханайни ишчершис ахтыйна кьиймат гьуво. Р. ДжаIфарове маджлисее чIакIын гьоIкуматын наградабы гьуво. Расул Гьамзатовни дойилин медаль чапханайни директорыс Марина ЫIмаровайс гьувы. Республикайни гьуIкумни эл’чийе чапханайни ишчершис- Тамара Галбацовайсий Виктория Абукаджиевайс мани йигъыл’ «Заслуженный работник культуры РД» звание гьуво. Орденыс «За заслуги перед Республикой Дагестан» Дагъыстанни китаб чапханайна хааIрна редактор Лариса Голубева лайикьайъы.
Р. ДжаIфарове мани маджлисее авхуйни ишчершис дипломбы ва грамотабы гьуво.
Дагъыстанын китаб чапхана юбилейиква Дагъстанни маданиятни Министерствайн, Дагъыстанни маIълуматнийий чапни Агенствайн, ДР-ни язычершини Союзын табрикавъу ва манбыше джони ведомствабышин грамотабы, дипломбы китаб чапханайни ишчершис гьуво.
Чини асырни таарыхе Дагъыстанни китаб чапханайн йицIыд аазырбышикван 14 дагъыстанни миллетбышди мизяаршилин адабиятын китаббы къайиккы. Манчини аIрее тезеба оокIанна (адабиятна) миз’ яратмишавъуйн миллетбышди — цIахураршини, рутулбышди , агъуларшини мизяаршил’ одкIунийн китаббыд врдунбы.
АIхреени йицIни сенни аIрее Дагъыстанни китаб чапханее гьоIкуматни харджийква цIаIхбышди язычершин, шааираршин ( Муса Фаррухын, Валегь Гьамзатын, Кьурбан Омахановын, Ханпери Назировайн ) адабиятын китаббы чапыке къайиккы.
Ниятеехъа алетIу водунбы геледжагъыл’ мани чапханее АIбдураIгьим Дадашевын, ВаIгьыд Мирзоевын, АIшукь Сафарын, Юсуф Юсуфовын китаббы къайиккый.
Мааъад къеккани китаббышихъаб хаIбна кьувват вобна. ЦIеддыйке , мааъад къеккан китаббы гыргыни республикайни китабханабышеехъа оIтираъа. Адабиятни гьаваскараршихъаб, ааIлимаршихъаб, мункум вобна, манчиква танышивхьес ва манчин анализ гьаъас, ыIлимын ишбы ойкIананкъа ишлемишаъас. КьоIдъэс, манбы саIгьфбы дена, грамматикайн, стилистикайн, адабиятын усулбы гьуваджы одкIунийн китаббы водунбы. Хьебыдъэсыб, манбы йишди таарыхна , мизена, адабиятна, маданиятна хазна вобна. ЙыIкьале хъооIни архайн миллетни гьаIкIеедын маIълумат, ацIаал’бы манченче алетIас. Месала вобна : « Кьаламыква одкIунийн , къылынджиква гьаккалаъас аIхас деш».
Маджлисни аIхрее маданиятни устадарше дагъыстанни миллетбышди мизяаршил’ маIънийбы хъаIдхъы ва миллетбышин мыкIар тамашейс гьагу.
«Нур» кIазетни редакциейн Дагъыстанын китаб чапхана 100 сенийни юбилейиква табрикаъа. Югун-югун китаббы дагъыстанни миллетбышди мизяаршил’ къайиккас аIрзаъа !
