Дагъыстане ыхьайни фалякатбыше республикайни хаIдданани шагьарбышис ва районбышис зиян гьуво.
Йишди цIаIхбышис МагьачIкъалайни шагьарни Пальмира, АТП-5, Хушет сабара джигабышее ещемишоохьени инсанаршис хаIдданан зиян ыхьа. Манчихъа гора йишди кIазетын ва сабара мебеликва маIшкьулоохьени йишди ишкараршиква саджиге зиян хъетIуйнбышис кумагбы гьелесва «Фаляакатыке зиян хъетIуйнбышис мебель» донан акция ачмишаъу. Ман акция ачмишаъас цIерра йишди миллетна игит ишкар Арсен АIбдуллаев гиргъыл. Манкъуни социал саифабышеенче аазырбышиква инсанаршикIле Дагъыстанна вазият ваацIавхьа ва кумаг гьелесва гьаIзирба вухьа. Гойне мани йишди акциейни гьаIкIее социал шебакабышее ацIахьа, дагъыстанлыбы ва Россиейни медни вилаетбышенче инсанарше кумагбы гьели гибгъыл. Шимал Осетия, Кабардино-Балкария, Абакан, Хабаровск ва медни шагьарбышенче кумагбы оIтираъуйнбы. Мани кумагбышин хаIдданан ши республикайни фаляакатбышике зиян ыхьайнбышис кумаг гьелени штабеехъа оIтираъу.
Шас кумаг гьувойнбышда сайир топыква гьувагана хоккейчи Россиейна ва дюнйейна чемпион, Хабаровскни СКА «Нефтяник» командайна оIйинчий Алан Джусоев ыхьа. Манкъуна дек’ Абаканни шагьаре ешемишехьени йишди йихъыйква Азер Мамедовука достра ворна. Манкъуни кумагыква Алане йишди акциейс пылыкен кумаг гьуво. Манчихъа гора ши Алан ДжусоевыкIле, джуни декикIле ва Азер чоджийкIле сагъулва эйгьи. Сайир йишди акциейс кумаг гьувона Ибрагьимов Александр Гьарунна дих ыхьа, Москвайни шагьаренче. Мана йишди кIазетна цIеррыйни редакторна Гьарун Ибрагьимовна дих ворна. Кумагаъуйнбышди джаргей Саратовни шагьаре ешемишехьена ишкар Кьудрат ГьаIджимагьаммадов, Пермьни шагьарена АIзиз Сафаров вухьа.
Акциейс мебель къийиккынбышди аIрее Талиб Мурадов, ДжуIма МагьаIммадов, Мурад Раджабов, Магьмуд ГьыIсейнов, Ил’гар Кьасымов ва сабара мебынбы вухьа. Гьаман эгьес ыккан, сабара йишди мебеликва маIшкьул вооххени ишкарарше джоджад джон мебель зиян ыхьайнбышис битIалаъу. Манбышди аIрее Хушет воохьен ишкарар Радик АIлиев, МагьаIммад ОIмаров ва мебынбы вухьа. Масалан, йишда ишкар ШаIъбан Кьасымове джуни мигьманхане 5 хизан кьаIраб гьувааджу. Манбышди хайбышенче хьянбы акIанас меега манбы «Горный долина» донани мигьманхане аахвас.
Акция алгъагьани вахтал’ ши мебель ва медын кумаг садджу цIаIхбышис джад деш гьуво. Хушет ва МагьаIчкъалайни менни джигабыше зиян хъетIуйни джурбаджур миллетбышди хизанбышисыд гьувойн. Эгьес эйхьи ман кумаг 50 хизанылхъа гьидхьыр эйхьи, манбышин сурабы цIаIхбы вухьа.
Гьелбетти фаляакатыке зиян хъетIуйнбышис кумаг гьувойнбы йишди миллетыхъаб хаIбба вухьес. Масалан Сувал’ни дерайл’ни «Инсан» донани фондын мани сардан чина иш къооджи вобна. Манбыше кумаг саъа водон ва йиджид хаIббанани инсанаршилхъа гьихьараъасын. Мани фондыс кумагаъуй йишди гыргынкъун бордж водон.
Къийна ши сана-санкъус хыл’ джувабыква, пылыква, карака авхъас вуккан. Ман йишди джамаъаIтбышди эбеедын кар водун.
Шавае йишди акцие иштыракаъу ва дагъамийвалее авхуйни инсанаршис кумаг гьуво джос Аллагье кьоIдле къатна сакIалаъан.
Фаляакатыке зиян хъетIуйни инсанаршикIле зы гьаман эгьес ыккан: «Саакитба гювъарас вуккан деш, лазымни ташкилатбышеехъа мураджиятбы гьаъас ыккан ва вахтал’ гехьан гьоIкуматын, фондбыше гьелен кумаг алятIас ыккан. Мани сардан йишди кIазете ва социал шебакабышее ши аIтрафлыда маIълумат гьели водун. Ненаджар зиян хъетIуна кумаг гьидидхьыр ахвас ыккан деш. Лазымхьени шалхъа окIне, аIхан кумагбы ши гьаъасынбы.
