Октябрьни 26-чил машнени авариее Дагъыстанни едаршини Союзна садры Мамутаева Интизар АIсадуллайна йиш раIгьматыххъа аркIын.

Мамутаева И.АI. 1951 сенни июльни 27-чил Рутулни районни Йигьракни хивее едике йихьа. Дагъыстан девлет педагъожи институт быкыр гьаийнчиле хъийгъа джурабаджурайни къуллухбышил’ ишлемишийхьа. Манчини аIрее — Рутул районни кIамсомолна кьоIръэсда каатиб, Йигьракни мактабна маIъаллима. 1994 сениле 2003 сенилхъа меега Дагъыстанни ГьоIкуматни Советни едаршини, хизанни ва демографиейни Комиссиейни джавабдар каатибни къуллухыл’ заIгьмат гьавъу. Гойнехьинне кьоIд аазырий йицIийхьаръэсди сенилхъаме республикае ушахаршин ихтиярбы гозетяъана Вакил йихьа. 2016 сениле Дагъыстанни едаршини Союзни садрыйни къуллухыл’ний ишлемишейхьи. МаIнкъыс «ГьоIкуматни къуллухна лайикьна ишчий» звание гьуво.
АIхреени сенбышее мана гьаракатука джамаIъатни ишбышикваний машкьулехьи. Мани сардан республикайниме ваджибын проектбыний ишекечирмишаъа. Интизар Мамутаевае СВО иштыракчершис ва манбышди хизанбышис хыл’ авхъуйни ишис хаIбна фагьым гьооли вухьа.
И. Мамутаевайни гогьарбышис, дёлесынбышис Дагъыстан Республикайни хаIрынкъве Сергей Меликове башсагълыгъийвалла гьуво.
«Мана ачухна, кьувватнана гьаIкIена сувабышда йиш йихьа. МаIнкъе джена ыIмыр аIзизни Дагъыстаныс ва мааъад ешемишехьени халкьыс къадсыр. АIсадуллагьна йиш Интизар хаIдни йикIеквана инсан йихьа. МаIнкъыка танышбани инсанарше маIнкъыни дирибашийвалис, кумаг гьелес гьазирра йихьайс хаIбна кьиймат гьооли вухьа», — Сергей Меликове къейд гьау.
Дагъыстанни башчийни кьарарука Интизар Мамутаевайс хъийкIуйнчиле хъийгъа Дагъыстанни Республикайн цIеддыйни дараджайнан Шараф орден гьуво.
«Нур» кIазетни редакциейн раIгьматтыгъни гогьарбышис, дёлесынбышис башсагълыгъийвалла гьооли ва джига дженнете хъааъанава эйгьи. Интизар Мамутаева мана ейцIа-хъивеецIанбышди йикIее гьаммашийс эйхвасда.