Гьар сен йишди гьоIкуматыл’ октябрьни вузани хьебыдъэсди базарни йигъыл’ йаIхъбы гьаъанбышин, йыIгъар аляъанбышин байрам алгъайгьи. ГьаIдис вобна: « Ненкъвейий джамаъаIтысын йаIхъбы , гармабы, йыIгъар аляъы, манкъвее джусда йаIхъ дженнетехъана ачмишааъа вобна. Инсанар нимеега мани йаIххъыл’ ивийкырее ва мани гармайле хьян илёдгъее устадын суваббы хаIдхъехьи».
Йишин цIаIхбышин миллет сувабышил’ ешемишехьен ыхьа. КъыIлина манбы Сувал’ни маIгьалылхъа ейлягъыс хъабаали вухьа, кьыIд’мина АIранеехъа авайкIан вухьа, няъас увгьее манбы йишин чIиебы ыхьа. Гойне Советна девыр хъабымее, йишди миллетын АIранее ешемишоохьен инсанар Азербайджанни социалист республикайни таркибеехъа эбчIу, Сувал’ни дерайл’ ешемишоохьен цIаIхбы Россияйни социалист республикайни таркибее авху. Манке йишин оIлка са — СССР ыхьа. Сана-санбышсахъа гьабкIын хъабый раIгьатна иш вухьа. Манке хьебыдле гадиг – «Балякьада», «АIттагъай», «Диндидагъ» — ишлемишехьи ыхьа. Йигъыс манче караванбы шахъа- гьиняхъа ийкар ыхьа. Сенис имааджийбышис къаъадкIуйн йыгъбы, одкIулыйн йыIгъар хъаъас, селерше ыккыйн видирбы, мыIгъадбы хъаъас хиваршин джамаъаIтбы хъигъечIи ыхьа. Гьел’бедти, манбышди аIрейиб къаейн устадар вухьа. КьыIдимийсын кар балканаршиква, къатираршиква манчений тIашмишаъа АIраненче Сувал’ни дерайлхъа, гьинчед шахъа. Манке шахъаб ганзбы гьийкIваран устадарыб вухьайнбы.
Ман зы нишеехъане эйгьи, гьаммаше ши йаIхъбышиква, гадигбышиква алаакьан кочеедын миллет ыхьа. Манчиле гъайре, сенис имааджийбышиква хивни аIрайлин йаIхъбы, малкъара ийкаран вейхбы хъаъа ыхьа.
Совет гьоIкумат дагъылмишхьайле хъийгъа, йишин миллет сергьатбышиква кьоIна хъаъы ва гадигбы уIумаъыйнбы. Манчин йишин экономиква, маданиятын алаакьабы далыйлхъа ыIхы. Сабара сенбы водунбы гьалед ман ишбы дагъам хъыхьа. Нейисе гадигбышеенче, поштини йаIххъылеб хаIббананбышике вуIххъас вааIха деш.
ХаIбба умудний вобна Диндийни гадигеенче ачмишааъани поштини йаIххъылхъа. Къийна уфтанна , аIкьна поштина йаIхъ Россияйн Динденче Азербайджанни сергьатеехъаме цIыIавъу. Азербайджанни суракен атдым гозетяъа водун. Гьалекийс гьайни дёлесийвале манче поштини йаIхъ ачмишивхьесын умудбы къеджи деш.
ЦIаIхни маIгьалылхъа поштина йаIхъ ХХ асырни 70-ди сенбышее цIыцIааъа гибгъыл. Къийнаб сабара Сувал’ни дерайл’ни хиваршеехъана поштина йаIхъ дешда. Манчихъа ил’дяакы, мани сенбышди аIрее мани сардан хаIдда ишбы къадже. Маныд эгьес ыккан. Поштина йаIхъ хъабыйле хъийгъа , йишди джамаъаIтын ешайиш къат-къатна вахарий хъыхьа. Йишди миллетын Вочни хивеенче мал, пошт’ йыIкьал’, балканаршил’, аIмалершил’ тIашмишааъа ыхьа. Вочекгъанче наIвтен къаб йыIкьал’ Муслагъахъа, МыIхахахъа ва медни хиваршеехъаний тIашмишаъа. КьоIдле, хьебыдле йигъний йаIххъыл’ айкIан. Эн хаIбна заIгьматыб, аIзабыб йишди адерше, едяарше, хьунащерше, йичибыше манке цIыцIавъу.
Шукур Аллагьылхъа, гьаIшде маIгьабна дагъамийвалла дешда. РаIгьатыйвалла гьибхьырмее , хиварыд кIыл’хъехьи гидгъыл. ГьаIшде хиваршее ешли инсанар авху. Сабара хивар харабабышилхъа садкIыл.
1952 сен, Кавказна даIвъий аIл’гьаани вахтал’ йишин хивар гёхьанаъы, инсанарыб сургунавъуйнбы. Сабара сенбы адкIынле хъийгъа, меб дедергунавъуйн инсанар йыIкьахъа сабкIыл хивар тезел’дан аляъы ешемишоохьи гибгъыл. Иням гьаъан , йишин хивар къелилхъа сугъоцасынбы. Дама чини йиссейни архылхъа сивийкIалнаки. Мана мебна гаф.
Гьел’бедти, поштина йаIхъ хъабый, алявъуй, дешди джигеехъа цIыIцавъий мани тасарруфатее ишлемишоохьени инсанаршин гьунар водун. Гьаммаше шахъаб йаIхъбы гьаъан устадар, йаIхъбышиква багълыданани районни, республикайни ташкилатбышее ишлемишоохьен инсанар вухьа ва гьаIшдеб вобунбы. ХаIдданан йаIхъбышиква багълыданан ишбы манбышди гьунарбышиква ва гьаIракатбышиква гьаIллаъа водунбы.
Зас йикIел’ вобунбы поштини йаIхъбышил’ ишлемишоохьен устадар цIаIхийгъалий Давуд дайий, мишлешелий Джамалий дайий, мишлешелий НуIгьий дайий, гыл’мецIалий Зейнал дайий ва мебынбы . Къийна манбы гыргынбы раIгьматыххъа абкIын вобунбы. АIхреени сенбышее Сувал’ни йаIхъбышда хааIрна устад Назим Сулейманов ыхьа.
ХаIдда сенбына районни йаIхъбышди управлениейс хаIбвалла цIаIхийгъалий ГьаIджиев АIбдураIгьман дайийе гьавъу. Манбы гьаIракатыква ишбы гьаъан сенбы ыхьа.
Манкъуле гьихъа мани ташкилатыс хаIбвалла мебни миллетни инсанаршеб гьавъуна.
ГьаIшде районни йаIхъбышихъа иляккани ташкилатна хааIрна къений ШаIфий АIбдуллаев ворна. Эгьес хъодкуда , Манкъвейиб йаIхъбы гьаъа хаIбба иш, заIгьмат гьааъа вобна. Манкъвее гьам ДР-ни Халкьни Маджлисни депутатее хьинне , медын хайирысын ишбыд гьаъа водунбы. Масалан ХыIягъни хивеехъана поштина йаIхъ алхъившу, Калел’ни хивеехъа тезеба йаIхъ гьавъу, Лекани хивеехъана йаIхъ хъавъу, йыIгъ алявъу, Мишлешни мактабни маIгьаллехъа джил’ кIявъу ва медын хайирысын ишбы къадже.
Къийна чIакIын ишбы гьаъасдимее чIакIын пылбы, заIгьматбы гьаъас ыккан. АIхреедын сенбы йишди гьоIкуматни, республикайни хазнайни меега йыIкьынбы ыхьейид, Рутул районеехъан, ЦIаIхни дерайлхъан цIыцIаъан йаIхъбы, аляъан йыгъаIр даянмишхьа деш. Маныд, шакдена, республикайни Автодоре ишлемишоохьени чIакIни къуллухбышил’ йишди чоджаршин гьунар водун. ХаIдда сенбына мани ишбышиква ташкилатни хаIрункъуна маIъвын РаIгьимов ХанмагьаIммад МаIгьаммадна дих маIшкьулхьа. Манкъвее эстафета Умаханов Замир ГьаIджиуIмаханни духайсахъа хъуво . Къийна З. УIмаханов ДР-ни Автодорни ташкилатни хаIрункъуна цIеррыйна маIъвын ворна. Манъус ыккийкан деш джуни гьаIкIее увгьой, одкIуний, амма манкъвее вуккеккана ва гьааъана хайирыквана иш йишди джамаъаIтыкIле , районыкIле республикайкIле ваацIа вобна. Республикее йаIхъбышиква багълыданан проектбы манкъуни регьберийваликва гийгъал ва таамехьи. Къийна манкъухъаб хаIбна гьуIрмат ва дараджа вобна.
Дагъавтодорни управлениее ва чини ташкилатбышее ишлемишоохьенбыб къийна вобунбы: АIлиев Бахтияр, РаIгьимов Джагьангир, Сафаров Ферман ва мебынбы. Мани ташкилатее гьихъа АIзизов ДжуIма , раIгьматеехъа абкIынийн ГьуIсейнов ГьаIсан, РаIгьимов МагьаIммад ишлемишебхьа. Манбышди гьаарункъвее джуке аIхан кумаг миллетыс гьаыйн.
«Нур» кIазетни редакциейни дойиле гыргын поштини йаIхбышиква багълыданани ташкилатбышее ишлемишоохьен йишин цIаIхбы джони ишини байрамыква табрикааъа , джанана сагъвалла ва ишил’ угъурбы аIрзуламишаъа!
