Къийна СВО иштыракаъани эскераршини гьаIкIее хаIдда макьалебы «Нур» кIазее чапыке хъигъечIи. Мааъад джаванаршини кьаIгьраманийвалике, игитийвалике, вурушбыше гьагуйни джомардийвалис гьоIкуматни сураке гьувойни наградабышике ойкIан.
Журналистарше манбышин хизанбыд кIелвиханаъа деш. Эскераршини хизанбышиква хъызааха. Манбышди вазиятыка дёлесийваленче танышоохьи. Мани сардан «Нур» кIазетни редакциейныд гееб хаIбна иш вуккекка вобна. КIазетни мухбирарше СВО иштыракчер редакциейхъа хъоотIал. Манбышикван горушбы алгъайгьи. Сафарейхъа хъигъебчIыйнкъаI, манбышди аилебышеехъа гьавайкIан.
Къийнийна йизда макьаале СВО иштыракаъани кьоIни чоджни гьаIкIеена вухьес. Манбы Тюбейни хивее ешемишоохьен Муслагъни хивейнчен АIшурый ГьаIджибег АIшуровар вобунбы. Чуба гьайни йигъбышее редакциейн мигьманар вухьа.
Игитершикваний гафыс кьувват гьевлесее гьихъа, зас эгьес ыккан, гьаIшде Муслагъни хивейнчен СВО хаIбба джаванар вобунбы. Манбышди аIрайл’ геллесда Миноборонайн, Росгвардиейни эскерар вобунбы.
ГьаIджибек чубабышди аIрайл’ хааIрна ворна. Мана 2022-ъэсди сен цывлихъа СВО аркIан. Манкъуни увгьойква, вудж махъа джуни гьамбазаршиква саджигее гьаркIын. Мана Краснодарни шагьарее Миноборонайни ракетный кьуввабыше контрактыква ишлемишехьи ыхьа. Хьебыдле сен мааъаб къуллух вуккуйле хъийгъа, Курскни вилаетылхъа бадалхьа. Мааъар ГьаIджибек артиллериейни частыква контракт одкIун. Тезе хъарыйни частыл’ сабара вахтна ишлемишхьамее, СВО гидгъыл. Манчиле хъийгъа, мана мааъар ворна. ГьаIшде ГьаIджибек джуни командираршикайий гьамабазаршиква саджигее Сумни вилаетыл’ воохьи.
КIыл’на чодж АIшур СВО-хъа хъийгъа аркIан. Манкъвее «Ахмат» батальоныква 2025-ъсди сен февральни вуза контрак одкIун. Манкъуни увгьойка, вудже контракт обкIунна сабаб чоджуква ва авхуйни мааъаб воохьени джаванарше хьинне Ватан миллетчершике къорамишавъуй вухьа. Контракт одкIунни сабара вузаршике мана СВО йаIххъыляъы. Манкъвее батальонни эскераршиква Запорожьейни вилаетыл’ адкIынни вурушбышее иштыракаъы. Гьинччиле сабара вазбына гьихъа мана яраламишхьана. Хил’дже гагьна госпиталей маалидже алятIуйле хъийгъа, мана мер частылхъа саркIыл’.
Гьинчиле сабара йигъбына гьихъа, ГьаIджибегни хаабынбы вудж сулажить эйхьени частни командирарше шадавъу. Манбыше манкъуни деккиний едни доюлхъа миннатарийвалла агъмишааъан кагъыз оIтираъы. Мааъад манбыше, ГьаIджибег хьинне дирибаш дих хаIрхъауйхъа гора, миннатдарийвалла агъмишавъу. Кагъыз манкъуни хизанеехъа Тюбейни администрациейни ишчерше гьихьарау.
АлятIуйни кагъызыке гаф гьаъанкъаI, ГьаIджибеге увгьойн: «Хааъабынбышди доюлхъа балгодарственный кагъыз хъады ыхьай, закIле истираIгьатыс хъарыйнкъа ацIахьа. Манкийлхъамее захъаб хабар вухьа деш. Мана хабар къавуххьу зы геер шадхьа»
АIшуре йишди ихтелетыс кьувва гьооленкъаI увгьойн: «Къийна йишди хивейнче хаIбба СВО джаванар вобунбы. Ши нимее сана-санкъуке аIкьана вухьейиб, аIрейна алаакьа авакIанаъа деш. Вахт вухьайнкъаI зенгбы гьаъанбы, гьамабазаршина вазият ваацIоохьена. Гьихъа мани сардан сыкIыл’на дагъамийвалла вухьана. ГьаIшде сибыкба телефоныква йишонохьенбы. Джуква саджигее мебын цIаIхбышин джаванарыб вобунбы. Гьаммаше девхьейиб, аIрабирда манбышиквар хъызаххана.
Чоджаршихъад СВО ыккеккани вурушбыше гьагуйни дирибашийвалис сикIы, алятIуйн хаIдда джурабаджура наградабыд водунбы. Манчилеб манбы гуянмишоохьенбы.
ГьаIджибегейий АIшуре къийна юххьанийн джаванаршин эскерейхъа хъобтIулуйка багълыда Россиейл’ вуккеккани ишикеб гаф гьавъуна. Манбышди увгьойква, эскерийвалла адамейршин мактаб водун. Манчихъа гора, 18 ешейхъа гьирхьыл’на джаван мани мактабейнче илгъечIес ыккан. Гьихъа джаванаршина эскерийвалла кьоIдле сеннаний авайкIан. ГьаIшде манбы са сенийс авайкIан. Нишиледжаб хъаIвакънас вуккан деш. Адамеерше хьинне Ватанни гьийд бордж хъувой, йишди гыргынкъун бордж водун.
Йизын, чоджаршикван горуш, югун дилягбы гьеххъыйква таамхьа. Зы гьаммаше увгьойн, ман ихтелет гьаIшдед текрар гьаъас ыккан: «Россиейни эскерарше СВО вуккеккана иш гьаIкIена вобна. Манбыше йишди хаIнни оIлкайна садибийвалла гьувааджесдиме нацистаршика вурушбы ыккекка. Манбыше Авропайни оIлкабышиква саджигее аххъыйн фыкырбы ишилхъа адчес гьайсар деш. Гьищуйий гьаIкIени йаIххъыл’, мана гьаммаше гъамхьесда.
ГьаIджибегысый АIшурыс вахт тIабалавъу редакциейхъа абыйхъа гора, джурайда саъул, эйгьи. Манбышиква саджигее СВО воохьени эскераршина джан сагъда ихьен. СВО таамхьа хайбышейхъа савалес кьисматхьен. Манбы гыргыба йишди заманайн кьаIгьраманр вобунбы.
