АIхырейни сенбышее цIаIхни халкьни маданиятын гуджнаква инкишаф гьаъа. Мани сардан хаIбна иш йишди миллетни шааирарше, язычерше къооджи. Манбыше гьар сен тезе-тезе цIаIхни мизелин шечIбышин, асарбышин китаббы чапейнче къекка.
Гьайни йигъбышее «Нур» кIазетни редакцией цIаIхни халкьына доюквана шааир, Россиейни язычершини союзна уIзву АIбдураIгьим Дадашевыкан тентенейкван горуш илгъечIу. Мааъад шааире редакциейн ишчер джуни тезе чапейнче хъигъечIесди китабыква танышавъу, мааъад одкIунни шечIбышди аллан аIтрафлы маIълумат гьуво. Манкъуни увгьойка, тезе китабейхъа хаIдда шечIбы, поэмабы, къошмабы иккечIу. Манчиле савагьийда мааъад хаIдда Дагъыстанни, Россиейни ва сабара хаариджи оIлкабышди шааирарше одкIунни шечIбышин тарджумабы гядкIу водунбы.
Шааире одкIунни шечIбышис кьиймат гьооленкъаI «Нур» кIазетни хааIрни редакторе Байрам АIбдуллаеве увгьойн: «Йишди шааирарше джони одкIунийбышиква ши шадааъанбы. Къийна манбыше одкIунийн шечIбы Россиейни чIакIни шагьарбышее къеккани антологиебыше растына хъадайли. Гьинчиле сабара вахтна гьихъа МоскIавни шагьаре чапейнче хъигъечIуйни антологиейни китабейхъа АI. Дадашевын, В. Гьамзаевын, Кь. Омахановын, С. АIбдуллаевын, Д. Шавкатын ва менни йишди шааираршин шечIбы гядкIу.
Къийна ед’ни мизен китаббы къайиккас хаIдын кумаг «Нур» кIазетын гьели. АIхырейни сенбышее редакциейни кумагыква ёкьцIалиле агъаллан йишди шааираршин, язычершин тезе китаббы чапейнче хъигъечIу. Редакцие геледжагъыл’ китаббы ойкIананбышис кумаг гьелес гьаIзирда водун. Амма ши гьувойни кумагыква иш хъоохьи дешда. Китаббы хаIдни тиражыква къайиккасдимее, спонсорар вуккан. Мани карее йишди эл’ни ишкар инсанарше ойкIананбышис кумаг гьелес ыккан. МагьаIбна таджруба менни Дагъыстанни миллетбышди аIрайл’ растына хъабайлена. Геледжагъыл’ къайиккасди тезе китаббышди ыIмырее манбышед иштырак гьаъасынва зы умудааъана.
Россиейни язычершини союзна уIзву, «Нур» кIазетни отделна редактор Кьурбан Омаханове ва джавабдар катиб Камил’ Шамхалове джони чыхышбышее шааирыс югун дилягбыйий угъурбы аIрзау.
Кь. Омаханове джуни ихтилете увгьойн: «АI. Дадашев цIаIхни адабиятна классик ворна. Манкъун до къизлени гьаIрфбышиква цIаIхни миллетни, Дагъыстанни таарыхейхъа одкIун. Манкъве одкIунийн шечIбы, джурабаджура мизаршилхъа сакIалау водунбы. «Уста РаIгьымна хаIне», «Сувабы верыгъени авуд» ва менни китаббышей одкIунийн шечIбы, поэмабы инсанаршикIле аIзбарда ацIа. Мана цIаIхни халкьын тезе адабият къурмишаъанбышда са ворна. Ши манкъуле гуянмишоохьенбы. Умудааъана, геледжагъылид манкъве ши, адабиятын гьаваскарар, джуни кIорани маIънааквани асарбышиква шадааъасынбы».
Горушни аIхырее «Нур» кIазетни хаIрынкъве редакциейхъа арыйни мигьманыс хаIдда сенбына «Нур» кIазетыква алаакьабы аххъыйхъа гора, цIаIахна миз, адабият артмишхьайниме гьаIракатбышихъа гора миннатдарийвалла агъмишаъан кагъыз гьуво.
АI. Дадашеве джуни ихителете кьейдауйн: «Зы гьаммаше «Нур» кIазетна гьаваскар ыхьа. Редакциейн йишди миллетна садабийвалла гьувааджи. Шу вуккеккани ишихъаб сергьадбы дешинбы. Миз вобхьей, халкьыд водун. Агар ши йишонаъана миз аIрейнче абкIынее, миллетыд ахвас деш. Шоква саджигее зынар чалышмишехьена йишди халкьна миз, адабият, маданият гьуваджес. Зы ненкеджад йизди шечIбышис, асарбышис кьиймат гьоолена деш. Манчис кьиймат гьооленбы китаббы хъаIдаххъанбы вухьес вуккан. Къийна йизди заIгьматыс гьувойни ахтыйни кьийматын сыкIыл’рар гьавасейхъа хъаляас.
