Гьар сен йишди республике октябрьни 21-чил маданиятын ва мизяаршин Йигъ алгъайгьи. Манчина метлеб республике ешемишехьени миллетбышди маданиятбышилхъа ва мизяаршилхъа фыкыр гьувой, водун дагъамийвал'бы ашкараъый, манбы гьаIллаъасын ва гьаIракатехъа адчесын мислягьаIтбы къаджей вобна. 

Дагъыстанна садибыйвалла, миллетбышди аIреедын муIгьуббат, алакьабы маданиятыний мизяарше маIгькамаъа. Мизяар, маданият гьар миллетын джурайнбы ыхьейид, анджах рыIгь са водун.
Мизяарый маданият ши акIанеъэ, ши дюнйейни таарыхни уммане батмишивхьесынбы. Манчиква югун аIдатбы ва аIдалатбыд таарыхехъа аIлгьаас. Шас ман гыргын лап югда къаммишехьи водун. Манбы гьуваджесдимее, гьоIкуматна программа вуккан ва еттыгъна хылявхъас вуккан. Сайигъыл' деш вуккан маIгьабна иш вуккейс, мана быкырын сенна гьааъас лазымба вобна.
Республикайни маданиятни ва мизяаршини Йигъыс къадсырыйн джурабаджур йигъынджагъбы, иджласбы, тамашебы республикайни шагьарбышди ва районбышди майданбышее илгъечIу.
Манчин сайид ыхьайн: «Дагъыстанни миллетбышди мизяаршилин диктант». Республикайни шагьарбышеени, районбышеени мактаббышее са вахтал' барабарда диктант ойкIан гибгъыл. Мани акциее садджу шыгыртаршейий телябабыше джад деш иштыракаъы, диктант ойкIананбышди аIрее маъаIллимар , ушахаршин деккярый едяар, къуллухчера ва едини мизяаршин ва маданиятын ватанпарасар вухьа. Манбы абыйнбы джон ацIаал' едини мизяаршикен ёхламишаъас ва джон гьавас едини мизелхъан, адабиятылхъан , маданиятылхъан гьагвас.
Эн хаIдын диктанбы ойкIанан майдам республикайни марказее,

(Хъигьнийн 3 с.)
Дагъыстанни девлет педагожи уиверситетни (ДДПУ) дагъыстанни филологиейни факультете ачмышхьа.
ОкIанасди диктантысын текстбы А.А. Тахо-Годийни дойил'ни ДНИИП гьазираъы. Гьар мизекен хьодле диктант гьазираъы. Комиссиейн манчин са къаIйиххы окIанас.
Ман байрам алгъагьасда гьазирыйвалла ДР-ни миллетбышди сиясатни ва динбышди министерствайн ва Расул Гьамзатовни дойил'ни ДДПУ къавдже.
Едини мизяаршилин диктант окIанас абыйнбышди джаргее цIаIхни миллетын эл'чераб вухьа. Гьайни сен диктант окIанас абыйнбышин сай шацыйнчиле хаIдда ыхьа. Амма миллетыс сикIы алетIее, кIыл'ба вухьа.
Едини мизелин диктант окIанас ва джон аIшкь, муIгьуб едилхъан, ватанылхъан, мизелхъан ва халкьни маданиятылхъан гьагвас йишди миллетни «Нур» кIазете, ушахаршини журнал «Лачыне» ишлемишоохьен, цIаIхни мизелин теле ва радиоверлишбы ГТРК «Дагъыстан», РГВК «Дагъыстан» ыккеккан журналистар ва мухбирар ; ДДУ-ни филологиейн факультет оIгийлни сенбышее таамъауйн телябабы, ДДПУ-те ишлемишоохьен цIаIхбышин маъаIллимар ва мааъад хъаIдаххъан телябабы ва миллетын джамаъаIтчера абы.
Абыйнбышди аIрее Къызларгъанче, МаIгьачкъаленче абыйн агъсаххъалар : мишлешелий КьурбанаIлий чоджий ва цIаIхийгъалий Сейран чоджий ва мебынбы вухьа. Диктант окIанас кIыл'ни ушахыква, «ЦIаIхбышин джегьилер» дестейс диб гиххьына Севил' Давудова ары.
Диктант окIанассе гьихъа «Нур» кIазетни редакторе Байрам АIбдуллаеве абыйн мигьманар саламыква къаршламишавъу ва манбы кIазетын гьааъани ишиква танышавъу. Кьурбан Омаханове мани акциейна метлеб агъмишавъу нишилхъайий фыкыр гьевлес вуккан ва гьиджо ишбыйий миз , адабият , маданият йишди халкьын гьуваджесдиме гьаъы, увгьо. Къийна нишил оойий ишлемишоохьи агъмишаъы. КъурбанаIлий чодже ва Севил' Давудовае телеканалбышис интервьюбы гьуво.
Гьайни сенийни диктантни текстын до «ХаIбни Ватанни даIвъийн ярабы» ыхьа.
Ман текст цIаIхни мизелин теле ва радиоверлишбы ыккеккани мухбире Гул'нара Керимовае хъаIдхъы.
ЦIаIхбыше диктант ойкIанни аудиториехъа Дагъыстанни миллетбышди сиясатна ва динбышди ишбышда министр Темирлан АIбуталимов, ДДПУ-йн проректор: Ибрагьим Дибиров, Руслан Гереев, ФДФ-на декан Зайнаб УIмарова ва мебын къуллухчера саламыс эбчIу ва цIаIхни мизеква, маданиятыква багълыданан чыхышбы гьаъы ва гьавъуйни ва гьааъани ишис ахтына кьиймат гьуво.
Гьаммашийнбы хьинне, маIгьадни миллетыква багълыданани ишбышее йишди миллетни къуллухчерше, депутатарше, хиваршини администрациебышди чIакIынбыше ,сабара ааIлимарше, динэгьлерше , мактаббышди директорарше, едини мизел' гьоокIанбыше, шааирарше иштырак гьаъа деш. Манбышис едина миз', миллет садджу къуллух алебтIасдимее лазымехьи. Хъийгъа манбышис гыргын кIелийханан. Гьассарас ман манбышди ламусыл'.
ОIгийл' маIгьадни миллетыква багълыдан йигынджагъбы алгъайгьенкъаI, цIеббыйни джаргее манбыний воохьи. Ши гыргынкъус соцсетьбышенче, «Нур» кIазетенче хабар гьувона. Шас ыккийкынийн югда алгъагьас, амма ыхьайн гьаммашийнхьинне.
Манчихъа ил'дяакы, ши шаке аIхан ва гуджхъооIн ишбы миллетиква багълыданан гьаъыйнбы, гьаъа водунбы, медыд гьаъасынбы нишихъа джаб ил'дяакы.
Диктантыле хъийгъа абыйни мигьманаршис университетни адни ва къадни майданбыше югын дагъыстанни хорагбышикван охьанасын кар гьуво ва тамашейс концерт гьагу, едигарыс саджигеедын шыкыл'бы цIыцIаъы.
ЦIаIхни мизелин диктантбы Рутулни ва Бабаюртни районеени мактаббышее илгъечIу. Мааъад ушахарше, маъаIллимарше, ушахаршини деккярше ва едяарше иштыракаъы.
Шалхъа гьибхьырни хабарыква, ман диктант ойкIанан акцие ЦIаIхни, Гыл'мецIни, Калел'ни, Камбулатни йыIкьнекни мактаббышее уфтанда, чини къайдайл' илгъечIу. Диктант окIанассе гьихъа мактаббышди директорарше, агъсаххъал маъаIллимарше, едини мизелин дарсбы ыккекани маъаIллимарше миллетни мизена, маданиятна, адабиятна, таарыхна ваджибыйвалла ющенавъу.
Шас аахвана гьааъас са умыд, асырбына йишда миз дюнйейл' аахвасда ва мана ющенаъанбыб , Аллагьни кумагыква, сен-сениле хаIбхъувхьес. Гьаъас ва гьуваджесдехьен кар дюнйейл дешин. Садджу гьавас ва гьаIракат ыккан.