Октябрьни 30-ле ноябрьни 1-чилхъа меега Дагъыстане, МагьаIчкъалайни ва Каспийскни шагьарбышее Россиейни гунайни миллетбышин маданиятын ва идманын Фестиваль илгъечIу.

 Ман Россиейни миллетбышди садибы­йвал’ни йигъыс къадсырыйн фестиваль республикайни маданиятни ва идманни министерствабыше гьаIзираъу ыхьа.

Фестивалын ачылыш ва идманыс къадсырыйн тадбырбы Каспийскни шагьаре, АIли AIлиев донани идманни комплексе илгъечIу.
Амма маданиятын тадбырбы МагьаIчкъалайни шагьарни Сулейман Стальский донани парке илгъечIу. Мааъад гьар миллетын майданбы ачмышаъу ыхьа. Мани майданбышее гьар миллетыс аидын фольклор, маIънийбы, хорагбы ва сабара медын карбы гьагваъа ыхьа.
Рутулни районенче рутулбышин ва цIаIхбышин майданбы мааъад къурмышаъу ыхьа. Мани майдамбышее йишди миллетбышди зурначерше, маданият марказбышди ишчерше югун иштыракбы гьаъу.
Мааъад рутулбышин ва цIаIхбышин хорагбы (богъалеер, кьуцеер, кьавут, хъодхьурыйн ва къурухъаийн чурубы, ниссе, сюзма, аIйран, тандурын гней) ва сабара медын йишди миллетбышис аидын одхьунийбы ады ыхьа.
Медни миллетбышди майданбышихъа иляккыйнкъаI, йишин майданбыы геед тентенейква ва уфтанда ыхьа. Махъа абыйни инсанаршис йишин хорагбы геед къабыл’хьа. Манбышин хаIббананбы туристар вухьа. Манбышди увгьойква, джос Сулейман Стальскийни парке алгъавгьуйин маданиятын байрам геед кьабыл’хьа.
Йишин майданбы Дагъыстанни маданиятни министрыс Зарема Бутаевайс ва джекасана абыйнбышисыд геед кьабыл’хьа. МанкъыIни увгьойква, Рутулни районни маданият марказни ишчерше гьар вахтал’ МагьаIчкъале ва медни джигабышее алгъайгьени тадбырбышее иштракбы гьаъанбы ва манбышис маIнкъее ташакукрийвалла агъмышавъу.
Рутул районни маданиятни, идманни ва джаванаршди управлениейна хааIрна Саид Cулеймановни увгьойква, рутулбышди ва цIаIхбышди майдамбышеехъа саджу сувал’ни маданиятни клуббышин ишчерджаб деш, Бабаюртни тасарруфатбышее воохьен ишчерыб абы вухьа.
«Ши чалышмышоохьенбы гьар вахтал’ инаIгьдни байрамбышее иштыракбы гьаъас ва йишин фольклор, одхьунийбы, республикайни медни миллетбышикIле гьагвас. Къийна йишди майданбышеехъа министр Зарема Бутаева ары ва манкъыIква сана уфтанна гаф вухьа. МанкъыIс йишин майданбы геед къабыл’хьа. Ши гьаммаше инягьдын тадбырбы уфтанда алгъагьа», - С. Сулейманове шаквани гафе увгьо.
Мани йигъыл’ республикайни маданиятна министр гыргыни миллетбышди майданбышиква танышийхьа ва манбышди одхьунийбышди дадыхъа илеекы.
МагьаIчкълайни марказни парке дагъыстанни миллетбышди фольклорный дестебыше, эстрадайни артистарше джон маIънийбы, миллетбышин мыкIаара, палтарбы, выставкабы гьагу.