ьуIрматукан цIаIхбы!
«Нур» кIазетын 2026-ъэсди сенийсын одкIуний (подписка) гидгъылыйн. КIазет миллетын акьва водун, ва ман гьар хаахъа иккечIес ыккан. КIазетни одкIунее гыргыни джамаъаIтын иштырак гьаъас ыккан. Къийна ши гыргынкъве эйгьен шахъад район, депутат, ахтыни къуллухейбын инсанар дешва. Ман карбы шахъад ихьесдимей, цIебба ши сана-санкъве авхъас вуккан, лазымни джигей кумагбы гьелес ыккан, миллетын до къеджени ишбышиква ахътыхъаъас ыккан. Ман кар шахъад дехьее, шахъаб районе, республикайл гьуIрмат вухьес деш.
ГьоIкуматын йишди миллетыс «Нур» кIазет, джамаъаIт саджигейхъа саъасва гьуво. Миллетын до ахтыхъаъасдимее, йихъбы гьишубы вухьай дюнйейни акьвал’ ацIаляаъасдимей «кIазетын хаIбна иш вуккейка вобна. ГьаIшде кIазетни кумагын манбы няаъаб ешемишувхьай, гьиджо ишбы гьаъа ыхьай, шахъаб няхуIбын ацIаал’нан ааIлимар, шейхар вухьай хаIббананабышикIле ацlа водун ва йихъбышин до дюнйейлхъа еймишау водон. Мааъад ойкlанан хаlдданан материалбы йихъбышди таарыхыс, манбышди къийнийни йигъыс, гьаъани ишбышис, экономикайс кьадсырыйнбы водунбы. Манчиле савагьийда, кIазетни сайфабышее йихъбышди аалимаршис, ишкар инсанаршис, заIгьматкараршис, джаванаршис, шаираршис къадсырыйн материалбы гьеххаалика растына хъайленбы.
«НУР» кIазетын ишчера, чалышмишоохьенбы аIхани къайдайл’ йишди миллетни гьаIкIеедын маIълумат гьелес, манбышин сес республикайни, гьоIкуматни регьбераршилхъа гьихьараъас, йишди халкьыни югни ва писди гьаIдисабышди гьаIкIеена хабар хъобкуба шолхъа гьивхьарааъас. Манчиле гъайре ши гьаракат гьаъан йишди халкьын аIдатбы, адабият, миз, маданият саламатда гьивааджес ва Дагъыстанейий Азербайджан ешемишоохьени цIаIхбышин алаакьабы маIгькамаъас. Йишди ишис кьиймат садджу шоке гьевлес вааIхас, няъас увгьее йишда иш шокIле къоодже вобна. КIазетыс кьиймат манчин акьва къидеджуйни инсанарше гьооли. Гьел’бедти, шахъадыд саIгьвбы эйхьенбы. Вахтал’ гыргыни джигеехъа вуIххъас усылоохьи деш. Сабара инсанаршис, ишбышис хъобкуна кьиймат гьевлес вааIха деш. ГьуIрматыс лайикьын инсанар, фагьам гьидёву аахва. Шу шакIле йишин нукьсанбы эгьес ыккан, шакасана гаф джигайл’, ваяхуд редакциехъа абы гьааъас вуккан. Манке ши хъобкуни мислягьаIтеехъа хъавалесынбы.
Редакциейна энки хаIбна макьсад — ед’на миз’ гьувааджий, манчис инкишаф гьаъас имканбы яратмишауй воб. Имканбы шахъад гьаманке ихьес, шу кIазет одкIунее ва манчис кумаг гьувее. Россиейни джурабаджура джигабышее ишлемишоохьени ищкар инсанарше кIазетна иш юг хъааъасдимее джоке ахаIн кумаг гьелен. Анджах манбышин сиягьый манмеегад хаIдын дешодун. Мани ишее авхуйнбыб къырагъыл’ илёозарас вуккан деш. Йишди халкьын къийхъыйн йигъ югун ихьесдимее джоке ахаIн кумаг гьелес ыккан. Водни дагъамийвал’бышихъа ил’дяакы, «Нур» кIазетын гьар сен мактаббышее хъаIдаххъани ушахаршини аIрайл’ ед’ни мизекен конкурсбы алгъайгьи. Манбышди аIрайл’ ед’ни мизелхъан аIшкь, гьавас хаIдхъаъа. Югун билиг гьагуйни шыгыртаршис пайбы гьели.
Гьар сен подписка гидгъылыйнкъаI, редакциейн ишчер сабара четинийвал’бышика растына хъавайли. Манбы акка-аккана ивийкыр подпискабы гьаъа. ХаIббананбыше подпискабы гьаъа деш. Манбыше джурабаджурайн багьнабы тIабалаъа. Сениле-сенилхъа подписка гьаъанбышин сай кIыл’хъехьи. Къийна манчина иш сибык хъааъасдимее редакциейхъар подписка гьаъана ишчий ворна. Мана шу увгьойни джигеехъа айрес гьаIзирра ворна. Шохъаб подписка гьааъасда вахт дешхьее, редакциейка алаакьа аххъе. АIзизын йихъбы, гьуIрматукан йишин халкь, дора «Нур» кIазетыс хъооIни сенийсын подписка гьаъас! Манчин гьар хаахъа, хизанейхъа ишыгъ ыккекка. Ман йишин, йишди миллетын акьва водун.
Дора йишин акьва нуруква гьуваджесдимее саджигейхъа савалес, кIазетыс подпискабы гьаъас.
Ненкъусе кIазет окIанас ыккан, гьайни адресылхъа ва телефонбышилхъа мураджият гьаъас аIхаI: bayram67@mail.ru, 89604120183, 89604200661.
