Гьар сен сентябрьни 15-чил' Дагъыстане миллетбышин Садибийвалин Йигъ алгъайгьи. Ман Йигъ алгъагьасда кьарар 2010 сен илгъечIуйни Дагъыстанни миллетбышди 3-ди гурултайл’ кьабылявъу. Ман Йигъ алгъайгьи 2011-ъсди сениле гидгъыл ва гьйни сен 15-ди элейс къейдаъу.

  Байрамыхъад хаIдын таарых дехьейид, дагъыстанын миллетбы гьаммаше югни –писди вахтал' санаб-саджигее вухьа. ШакIле ацIан республике 30-ле агъаллан миллетбы ешемишехьи. Манбышди гьаарункъухъаб джона миз, джон таарых, джон адабият, джон маданият водун. Анджах манбышихъад са хасиятбы, акаран аIдатбы, гювъур - сугъоцый водун. Ватаныс къорхунанкъаI, манбы гьамбаше мислягьаIтее воохьи. Са миллетин уцIур, шениса миллетин водун; са миллетын шадлыгъ, шениса миллетын водун. Дагъыстанни миллетбышди таарыхе хаIдда гьаIдисабы ыхьа. Манбы гьаммаше саджигеехъа сабы къабни душманаршиква вурушмишивхьа, республикайна абыр, ламус, сифат гьувааджы. Помпейн, Надир шагьна, къошинбы дагъылмишау. Кавказыл' НикIалайка аIлгьааIни даIвъэ садибба душманаршиква вурушмишивхьа. Манчиле гъайре дагъыстанлыбы медни локальный вурушбышее саджигеехъа сабы душманаршис джаваб хъуво. Мысаджад дагъыстанни миллетбышди аIрее сана-санкъукан чIакIын къалма-къалбы ыхьа деш. Гьел'бедти, аIрее ледж адчес вуккананбы оIгийлиб, гьаIшдеб вобунбы. Анджах, йишди меега йишди архабыше, агъсаххъаларше, баба-дидершин гьувойн ваъаIзбы, тербие шас гыргыни кьаанунбышиле агъалла водунбы. Манбыше ши хъобтIулыйнбы Дагъыстанее суIл'гь гьуваджес ва мугьуIббат утIумаъас.

Садибни йигъыс къасырыйн аIсас йигъынджагъбы театрбышди утагъбышее, швгьарбышди ва районбышди майдамбышее илгъечIу.

Мани маджлисее маданиятни министерствайни фольклорный дестебыше, дагъыстанни эстрадайни артистарше джон маъаIлийбы, миллетбышин мыкIаара, палтарбы, гьагуйбы (выставкабы) гьагву.
МагьаIчкъалайни шагьаре мани Йигъыс къадсырийн тадбирбы шагьарни марказни майдамее, Сулейман Стальскин донани паркэ ва сабара медни джигабышее илгъечIу.
Байрамыс къадсырни тадбырбышее дагъыстанехъа арыйни Россиейни Федеральный Иджласни Садре Валентина Матвиенкое, республикайни хааIрынкъве Фёдор Щукине ва мебынбыше иштракаъу ва майданбышее вухьа.
Дагъыстане миллетбышди Садибийвални Йигъын екунбы шагьарни марказни майдамее хаIдни гала-концертыква таамыхьа. Ман концерт гигъалассе гьихъа Валентина Матвиенко ва Фёдор Щукин йишонувхьа ва гыргын дагъыстанлыбы мани байрамыква табрикавъу.
Гойне мааъад Татарстаныле, Хакасиейле, Донбассыле, Калмыкиенче адыйни фолклор дестебыше, дагъыстанни «Лезгинка» ва «Берёзка» донани ансамбльбыше иштракбы гьаъу.
Мани йигъыс къадсырни тадбырбышин сайид быкырнидюнйен фестиваль «Хранители традиций» (АIдатбы гьуваджий) илгъечу. Мани феститвале 100 метрына хыллийвалена 300 хорагбышиквана истол хъавъу вухьа.
Садибыйвал’ни Qигъыс къасырийн тадбырбы Дербентни шагьарни «Нарын-Къала» донани къалейид илгъечIуйнбы. Мfаъад «Девочонка из Дербента» донан Жасминын концерт илгъечIу.
Cентябрьни 15-чил гыргыни республике джурабаджур ярмакабы, спортын оIюнбы, горушбы илгъечIес.
Манчин сайид МагьаIчкъалайни шагьарни «Труд» донани стадионе илгъечIу. Маъад Дагъыстанни гьоIкумматни органбышди аIрейдын футболын турнир илгъечIу. Мани турнирее 28 командайн иштракаъу.
ЦIеббыйна джига Дагъыстанейни УФНС-н авхъу, кьоIдъэсда джига дагъыстанни МВД –н ва хьебыдъэсда джига дагъыстанни МЧС-н авхъу.
Мани оIйинбышее гъамебхьайнбышис медалбы Дагъыстанни Правительствайни Садрее МагьаIммад Рамазанове гьуво.