Шарааитбы ва суваабысын ишбы
Ватан инсанни йикIес эн аIзизын джига водун. Мааъар гъу едике ыхьа, едини мизел' ющенаъа гиргъыл', мааъад цIеддыйн атдымбы гьаъа гиргъыл', мааъаб йигъна ушахийвалла абкIын. Гъу няхъа аркIынейир, няаъар ешемишехьи ыхьейир ва нени къуллухыл' ыхьейир, Ватан йикIеенче гьаккалааъас вааIхас деш. Инсанын табият маIгьад къурмишхьа водун, ешбышеехъа гьийхьар летти, Ватанын гъу аIразаъа.
Ватаныл' йишди баба-дидершин рыIгь водун. Масалан, зы кьоIни йигъыс махъа гьаркынийнкъаI, джанан сенийн истираIгьат аляатIа. Манчихъа гора, ши борджлуба вобунбы Ватанни гьийб.
Ненкъвейи йигъна хив, йигъын хав, йигъни миллетын язы, адабият, маданият, аIдатбы, адаббы гьуваджи мана ватанпарас ворна. Йишди миллетыхъаб гьаммаше маIгьбын игитера вухьайнбы, вобунбы ва вухьесынбы. Манбы шокIле мысаджаб къавджес деш оIгунмишоохьи, чIакIни къуллухбышил' гивъур, миллетни дойиле джун, джуни хизанын, гогьарбышин суалбы гьаIллаъа. Ватан ва джун миллет ыкканни инсане «вукIул' кIебчу» хайирысда, суваабысда ишааъа ва манчикед гьидчуд гозетяъа деш. Гьар инсане гьааъана иш АллагьыкIле кьооджи вобна. АIхреени сенбыше миллетни хайирыс гьаъый ишбы. гыргынкъукIле ашкарда къеджи водунбы.
Садджу пашманыйвалла манчина цIыцIааъа, сен-сениле Сувал'ни дерайл' ешемишоохьени инсанаршин сай кIыл'хъехьи. Манаб эн хаIбна дагъамийвалла вобна. Инсанар аIл'гьаа гтбгъылле хъийгъа югда-писда шарааитбы Сувал'ни дерайл' яратмишаъа гибгъыл'. Шукур Аллагьылхъа, поштина йаIхъ МуIхаххъаме цIыцIавъу. Садджу Атталхъана поштина йаIхъ гьаIшдеб дешда. ТокIан ишыгъ ЦIаIхни дерайл'ни гыргыни хиварше водун. Ман аIсас вааджибын кар водун. ТокIван ишыгъ дена, гьаIшде ешайиш гьаъас шавукеджал аIхас деш. Хъийгъа телевизор хъабы. Сабара сенбышиле спутникна телефон хъабы. Къийна Сувал' гивгъур, дюнйейни диярылхъа зенг гьаъас эхьен. Манчин нимеехье ыIмыр вахарихъавъу.
ХХI асыр – интернетын асыр водун. Мани сарданыб Сувал'ни маIгьалыл' вазият писба дешобна. Къийна ЦIаIхни дерайл' хьебыдле телефонын алаакьабы: Мегафон, Билайн, МТС ишлемишехьи водунбы. Гьар хааъад интернет ишлемишехьи водун. Шас манчини гьаIкIеедын маIълумат Мишлешни администрациейни хаIрынкъве Ислам Иббрагьимове гьуво. Манкъуни увгьойква, къийна Сувал'ни маIгьалыл' ешемишоохьени гыргыни инсанаршихъад имканбы водунбы няхъа ва шавукайий ыккан алаакьа аххъас. Садджу, токIан ишыгъ адкIынийнкъаI манчиквана дагъамийвалла воохьи.
Манчиле гъайре, гьайни йигъбышее ЦIаIхни хивее мыраалийни ооъад гьар маIгьаллайлхъа садкIылыйн хьебыдле видеокамерабы гиххьы водунбы. Гъу няаъар ешемишехьи ыхьейир, ваке йигъни телефоненче ачухни эфире гьиджойий хивееъад эхьи къеджен. Садджу гъу цIерра регистрировать ихьес ыккан. Ман камерабы гиххьыйни джегьилершини увгьойква , цIеббыйна метлеб вобна йигъни хивее эхьен кар вакIле къаджей, кьоIдъэсыб хив къорамишавъуй ва аIгьтият вахтал' къавджей. Са вазна цIедда кьаIрад мааъад эхьен гьагвас, хъийгъа мункумобна мани шарааитыке кIылин пыл хъелес гиххьас.
Мана иш гьааъасын харджийбы джолхъа ЦIаIхни хивни джегьилершини фондын алетIу. Мана иш къулайква аIхреехъамее гьааъас Фируддин гьаIджий АIгьмадове ва АIбдураIгьим Алхасове кумагаъы. Манчини гьаIкIеена хабар шас ЦIаIхни хивни джегьилершини фондыни хаIрункъвее Фаик АIзизове гьуво.
Ф. АIзизовни увгьойква, гьалекий манчилхъа 16 абонет гирцIыл' ворна. Дёлесийвале манбышин сай хаIдхъаъасын.
Гьайни дёлесийвале сайид суваабысын ишбы Гыл'мецIни хивее ыхьа. Хивни имамни АIсадуллагь гьаIджийни увгьойква, хивна манзикна джил' бадалавъу ва медын ишбы гьаъы. ГьаIшде манзик кьуIмаъабкIына. Манчисын харджийбы хивни са чодже Ризван Мирзоеве джуни гьалалыйваликва гьаъы.
Сайиб вааджибна хабар мана вобна: цIаIхбышди доюквани шааире джуни китабна «Къарадагъна кьев» тираж масса гьевлес гивхьу ва манчике садыйн пыл хивни адын ишбы гьаъас гьувой. Манаб лап суваабысда иш ва шааирыке ахвасын едигар водун.
Къийна ман фонд темизда ишлемишехьи водун ва манчин хаIдда хивыс хайирысын ишбы къедже водунбы.
МаIгьбын джегьилера Аллагье гьуваадженбы ва гьар хивее вухьенбы. Ши гьар хиваршенчебыб вухье, йишда Ватан, йишин миллет, йишда миз са вобна. Месала вобна: «Дама чини архылхъа сивийкIална». Ши мысаджаб йишда Ватан кIеливханааъас вуккан деш.