Гьайни сен ХаIбна Ватанна даIвъий таамувхьайн 80 сен быкырхьа. Манчиле гъайре Президент Владимир Путинни амрыква оIлкее 2025 сен Ватан къорамишааъанбышин сен эълан гьау.
Совет гьоIкумат фашист Германиейле гъамувхьайни юбилейис къадсырыйн хаIдда парадбы, йигъынджахбы, иджласбы, концертбы илгъечIу. ГьаIшдед Россиейл’ маIгьдын тадбырбы таамхьа дешинбы.
Дагъыстанейид Гъамувхьайни 80 сенни юбилейиква алаакьанан югун тадбырбы илгъечIи водунбы. Къийна шас ачухын дюнйе гьадсырыйн ветеранар ши йикIел’ хъаваляаъа, манбыше гьагуйни игитийвалис ахтына кьиймат гьооли, манбышди едигарыс гьайкалбы гийхьи.
Гьайни сен ЦIаIхыйни дерайл’ни хиваршее йишди ветеранаршис къадсырыйн хаIдда ишбы къаджы. Мани сардан ЦIаIхыйни хивее СВО гьалакхьайни кьаIгьраманыс Ренад АIгьмадовыс гьайкал гивхьу, МиххьегIни, Муслагъни хиваршее ХаIбни Ватанни даIвъийни иштыракчершин абидабы тезелемишау, Хьойикни хивее фронтейхъа абкIынийнбышис абида алявъу.
Гыргыда ман джамаъаIтни кумагыква къаджыйн ишбы ыхьа. Тикинтийн ишбы ыккейсдимее югун кумаг хиваршее ишлемишехьени фондбыше, мани хиваршейнче хъигъебчIыйни ишкар инсанарше гьуво. ДжаIмIъатни увгьойка, абидабы тезелемишаъас ва аляъас районын са манат пылна гьуво деш. Ишбы ыккейс кумаг гьувойнбышин сиягьый хаIдын водон. Манбышди сабаранбышди гьаIкIее ши «Нур» кIазетни гьийдни нумрабышее материалбы гьувойнбы.
Хиваршее тикинтийни ишбышис кумаг гьувойнбышда сайир ДР-ни Халкьни Маджлисна депутат АIбдуллаев ШаIфи Кьафланна дих ворна. Хиваршее ешемишоохьени инсанаршини увгьойка, манкъве ишбы ыккекканкъаI хаIбна хыл’ авхъу.
Гьайни йигъыбышее мана республикайни ветеранаршини ташкилатни доюле ХаIбна Ватанна даIвъий таамувхьайни 80 сенийс къайиккыйн медалысый таъIрыфни кагъызыс лайикьра къаджы. Наградабы депутатысхъа ЦIаIхыйни дерайл’ни ветеранаршини ташкилатни хаIрынкъве НезирмагьаIммад АIгьмадове хъуво. Манкъве Ш. АIбдуллаевыс Дагъыстаннни ветеранаршини ташкилатни хаIрынкъуни АIлиджан МагьаIррамовни доюле депутат табрикау, къеджени хайирхагь ишбышис миннатдарийвалла агъмишавъу.
МаIгьадни ахтыни наградайс лайикьра къаджыйнбышда сайир ЦIаIхыйни хивее ешемишехьена агъсаххъал ГьаIджиев МагьаIммад Нуриддинна дих ыхьа. М.ГьаIджиев хивна, халкьна ватанпарвар ворна. Мана ешбышее ыхьейир, гьар вахтал’ хивни джамаIтыква саджигее ворна.
«Нур» кIазетни редакциейн Ш.АIбдуллаев ва МагьаIммад ГьаIджиев алятIуйни медалбышиква табрикааъанбы. Манбышис джанана сагъваллайий хылийна ыIмыр аIрзааъа!
