Августни 20-чил Дагъыстанни башчийни Сергей Меликовни хаIбваликва таIгьсилни ишчершина Августыл’на маджлис илгъевчIу.
Манчини ишее ГьоIкуматни Думайни ва республикайни парламентни депутатарше, мактаббышди чIакIынбыше, маIъаллимарше, журналистарше иштыракау. Иджласе хъаIдхъыйни сферайс ааидни вааджибни суалбышли гьаIкIее гаф вукку.
Сергей Меликове джуни чыхышее хаIбна фагьым СВО-ни темайс гьуво. Манкъве маIъаллимаршике шыгыртаршис СВО иштыракаъани кьаIгьраманаршини игитийвал’ни гьаIкIее гьаммаше хабаравъуй хайишау. Манчиле гъайре «Вааджибын гафбы» донани тадбырбышейхъа даIвъийе иштыракааъанбы хъоотIалас лазымба. Ши ушахаршис джон джанбы хъидийккы Россиейн марахбы гозетяъани кьаIгьрамаршини гьаIкIее йишонааъас лазымба. Дагъыстанэй энки хаIббанан кьаIгьраманар вобунбы. Манчин йишди еррыбышда игитийвалла, джомардвалла гьаагва. Умудааъана, хъобкуба иш вуккей, шаке къийнийни тIалаббышис уйгъунын шыгыртар хаIбхъааъас вааIхасынбы, регионни башчийе агъмишау. Джуни чыхышни аIхрее манкъве маIъаллимаршини дагъамни ишис миннатдарийвалла агъмишавъу ва тезе хъаIдхъыйни сенее угъурбы аIрзуламишау.
Августыл’ни маджлисени хъаIдхъыйни сферайни ишчершилхъа оIлкайни просвещениейни министре Сергей Кравцове мураджият гьау. Манкъве йикIел’хъаляуйнки, гьайни сенни мартни вузее сыныфни маIъаллимаршис ва колледжни дестейни куратораршис гьелен пылбы кьоIникъатна хаIдхъау. Манчиле гъайре, сентябрьни санчиле мактаббышди ва колледжбышди директораршини мыIслягьатчерше гьар вузее хьод аазар алава пылын алятIас. Манкъуни увгьойка, гьайни сенейид маъаIллимни саIнаъатна дараджа ахты хъавъуй, маъаIллимаршис хыл’авхъуй йишди аIсасни месалабышда са вобна. Ши маIъаллимна кагъыз-кугъузыкана иш кIыл’хъааъасда. Федерални министре маIъаллимарше шаца вуккуйни ишис миннатдарийвалла агмишавъу ва гьайни сен югун натийджебы гьагвас аIрзуламишау.
Россиейни КьаIгьрамане Темирлан Абуталимове ыIмрее маIъаллимни вааджибыйвал’ни гьаIкIее юшенау. Манкъуни джуваббышихъа гора, маIъаллиме вас геледжагъысда хъобкуна йаIхъ гьаагва. Зас маIъаллимаршис миннатдарийвалла агъмишааъас вуккан. Агар йизди ыIмрее маIъаллимар девхьайнбыхьий, захъаб Къизлена ХаIне вухьес дешдий. Манкъве ушахаршилхъа маIъаллимаршис гьуIрмат гивхьуй, манбышилхъа кIыры гьувой мураджият гьау.
Гьар сенийна Августыл’на маъаIллимаршина маджлис югба иш къавджейнбышис гьоIкуматын ва ведомствайн наградабы гьувойка чIаIвувхьа.
