Сентябрьни 2-чил, АцIаал’ни йигъыл’ , шыгыртаршиниме чин аккабы шарааитбышиквани, къийнийни тIалаббышис уйгъунни  тезе 21 мактабын аккабы аахъы. Мани мактаббышейхъа йигIни аазырыле гьеххан ушахар хъабы. Манчиле гъайре са тезе ушахни бахчейн ачылыш ыхьа. АIхреени вахтал’  манмееган цIедын мактаббы Дагъыстанэй ачмишаийнбы дешдий.

Мани шадни маджлисбышее Дагъыстанни ГьоIкуматни Садреэ АIбдулмуслим АIбдулмуслимове, республикайни вице-премьерарше, муниципалитетни чIакIынбыше, министерствабышдийий ведомствабышди вукIлелинбыше, Халкьни Маджлисни депутатарше иштыракау.

Тентенейнани линейкабышиле хъийгъа видеоконференцсвязьни усылыка мактаббышикан  марафон ыхьа. Мааъад республикайни чIакIынбышди доюле Дагъыстанни премьер-министре АIбдулмуслим АIбдулмуслимове  мураджият гьаъу.

Хьебыдле мактабый са ушахаршин бахче МаIгьачкъалэй ачмишхьа. Манчиле гъайре тезе мактаббы Кизилюртни, Табасаранни, ЦIумадайни, Дохъузпарайни, Курахни, Казбековни, Ногъайни, Силейман-СтIални, Хасавюртни, Къарабудахкентни, МаIгьаррамкентни, Левашийни  районбышее ачмишхьа. Гойне хьинне ушахар тезе мактаббышика Каспийскни ва Кизилюртни шагьарбышее шадавъу.

Социал объектбы «Образование» , «Демография» ва Респуликайни инвестиционни программабышди кумагыка аляу.

Тезе хъаIдхъыйни сен республике партабышилхъа  486 аазырыле гьеххан ушахар гювъур. Манбышике 50 аазырыле гьехханбы цIеббыйни сыныфейхъа хъабыйн шыгыртар вобунбы. «НУР» кIазетни редакциейн маъаIллимар , шыгыртар хъаIдхъыйни цIедни сениква табрикааъа ва джони дагъамни заIгьмате угъурбы аIрзуламишаъа.

 

Камиль Шамхалов