Исламни диныс ыIбаадат гьаий, манчилхъан инам йикIеенче ыхьай, динни гьаIкIеедын кIорааленчен ацIаал’ алеетIуй ва ман еймишауй хаIдын сувааб водун. Гьайни гунагьбынани дюнйейл’ ешемишехьенкъаI, гьар инсане гьаммашийни дюнйеехъана джига гьазирааъас вуккан.
Ши, цIаIхбыб, мусурманаршини уммайнбы вобунбы, манчихъа гора Исламни диныс ыIбаадат гьаий йишин бордж водун.
Мусурманни уммайн сенее кьоIдле вааджибын, исламни диныква багълыданан байрамбы кечирмишаъа. Манчин са Ураза байрам, шенсад Кьурбан байрам водунбы. Рамандини ХаIдни йигъыкIле аIрабна мизяаъани оIлкабышил’ Ид ул’- фитр эйгьи.
Рамандини вуза Аллагьыс джуни къуларше хаIм-йигъна ыIбаадат гьаъа. ХьебцIал’ йигъна манбы сиваадженбы. Йигънийигъын не кар ойхьан деш, не хьян илёгъа деш Мани вуза гьаIкIени мусурманее вудже вудж нягьаIкьни ишике, напсыке къорамишаъа. ЙикIеехъа темизин ниятбы аляатIа. Миз темиз’ба гьувааджи, гьаъан ихтелет’ гьор дешин, саламатын эйхьи. Мани вуза сана-санккъуни хатрес хъоотIа деш. Рамандини вуза гьеххъыйн ниятбы, доъаIбы АIллагье зарада кьабыляъа. Мани вуза инсаныс ыIмыр темизни варакьыле гивгъаласда имкан гьооли. Агар гъу гьауйни гунагьбышиле йикIеенче пашманехьихьее, сайид гьидяъас гъуджад вакIле эйгьихьее, манке гъу гунагьбышике азадаъана. Рамандини вуза джегьенняммын дарвазабы утIумехьенбы. Садджу дженнетин дарвазабы аахъы эйхьи. ВаъаIз’ вобна: «Агар инсанаршикIле Рамандини вазна кьуват, батIраалла, гудж ваацIавхьанахьий, манбыше эгьесынний: «ЫIмырволли Рамандина вазхьий вухьа».
ГьаIшде Рамандина ваз йыIкьнеехъа гьивийхьаробна. Кубаршиле, сиваршиле гъайре мани вуза динни гьаIкIеедын маджлисбы, ифтарбы саджигее сабы алгъавгьуй суваабыквана иш вобна. Мани маджлисбыше мусурманаршин сана-санкъулхъан муIгьуббат, ыIгьтибар, раIгьамийвалла гьалеб гуджлемишааъана. Гьел’бедти, саджигее гьахувыйн сивар Аллагьыс аIзизда хъадайли.
АIхреени сабара сенбышее маIгьдын маджлисбы, ифтарбы йишди цIаIхбыше гьаIракатеехъа адчу. Саджжу хиваршееджад деш, гьаIшде манбы шагьарбышеейид йишди имамаршини, динни чоджаршини гьаIракатыква шагьарбышеейид алгъайгьенбы. Сабара йигъбына гьихъа Рутулни районе ешемишехьени миллетбышин ифтар тезеба аляаъани ЫIса пейгъанбарни дойил’ни манзикее вухьа. Манчини гьаIкIее ши одкIунийн.
Къийна йишин хаIббанан цIаIхбы Урсиятни шагьарбышее ешемишоохьи. Мааъад манбыше хизанбы къурмишау. Гьел’бедти, манбышикван динни аллан алаакьабы гьуваджес ыккан. Манчихъа гора, Рамандини вуза йишин имамар, динэгьлер Дагъыстанни динни управлениейни мислягьаIтыква Исламни динни гьаIкIеедын ваъаIзбы хъаIдхъас , ифтарбы гьаъас махъа гьавайкIан.
Гьайни сен цIеббыйна сафарий МаскIавни шагьареехъана вухьа. МаскIавни шагьарее ешемишоохьени цIаIхбышиква саджигее ифтар ЦIаIхни дерайни имаме Эл’дар гьаIджее джуни динни чоджаршиква ифтар алгъавгьу. НягьаIбый мана маджлис илгъевчIу, интернетее, ватцапее, группабышее видео водун. Маджлис Кьуръанеени джузбышиква гибгъыл. Эл’дар гьаIджее сабыйнбышис ваъаIз динни гьаIкIеена хъаIбхъы ва суалбышис джаваббы хъуво. Абыйни мигьманарше чыхышбы гьау. Гойне сивар ачмишау ва хаIнелин кубар гьаъы. Маджлисеехъа абыйн мигьманар разийба авху. МаскIавгъанчена сафарий Эл’дар гьаIджийна Уралылхъа вухьа. Уралыл’ни шагьарбышее хаIдда къуIванан мебель гьаъан цIаIхбышин цехбы водунбы. Гьел’бедти , мааъаб ишлемишеебахьенбы хаIббананбы йишди миллетын чубара, йичибы вобунбы. Садджу Берёзовскни шагьарее джад 3-4 мебель гьаъан цехбы водунбы. ЦIеддыйн ифтар АIгьмадов Малладавудни цехее алгъавгьу. Махъа медни цехбышеенчен мигьманараб абы. Гьаманиджад шагьарее кьоIдъэсын ифтар ГьаIджиев Юнуснийи цехе илгъечIу. Имамее аIтрафлы динни гьаIкIеедын маIълумат мааъад гьуво. Мааъад ыхьайни ифтарын видеоверлиш интернетехъа Эл’дар гьаIджее гиххьы водун.
Хъигьнийни йигъыл’ хаIбна маджлис ва ифтар Челябинскни шагьарее, Мурадов АIбутIалибни фабрике «Майа» илгъечIу. Ман къуIванан ва утIумын мебел’ гьаъан хаIдын фабриква водун. Мааъаб ишлемишоохьенбыб хаIбба вобунбы. Имам Эл’дарни увгьойка, Челябинскеейиб маджлис шадба, марахыква илгъевчIу.
Гьалекийс хыллийна сафарий Эл’дар гьаIджийна джуни динни чоджаршиквана таамувхьа дешобна. Манкъуни увгьойка, джо ифтарбы алгъавгьуй Саратовни, Волгоградни, Ростовни, Астарханни шагьарбышее ниятее аххъы водунбы.
Апрельни 23-чил’ цIаIхни миллетна садибна динна маджлис ва ифтар МаIгьачкъалее, «Горная долина» донани шадлыгъбы алгъайгьени утагъее алгъагьас. Махъа гыргын чубара, йичибы хъоотIал.
