Дюнйейл’ хаlдда джурабаджура санаъаlтбы растына хъайли. Санаъаlтбышихъад югунбыйий писинбы эйхьенбы деш. Къийнийна йизда гаф джон ыlмрена йаlхъ дагъамни пешейка автуlлни аилейни гьаlкlее вухьес. Мана Республикайни МЧС-на ишчий Рамиз МагьаIррамов ворна.
Рамиз МагьаIррамов 1986-ъэсди сен къуллухчыйни хизанее едике ыхьа. Манкъвее 2003-ъэсди сен Рутулни хивын садъэсын йыlкьнекин мактаб быкырауйле хъийгъа, санаъаlтбы Дагъыстанни девлетни маъаlллимар гьаlзирааъани университетни информатикайни факултетейхъа хъуво. Югни ацlааликва хъаlдхъый быкырауйле хъийгъа, сабара гагьна джурабаджура къуллухбышил’ ишлемишхьа. 2017 манкъве маъаlллимын санаъаlт МЧС-ни къуллухуква бадалаъу. Цlерра мана «112 службе»ишлемишхьа. Аlрейнче сабара сенбы адкlынийле хъийгъа, мана федерал пожарныйни службейхъа илгъечlу. Къийнийни йигъыл’ мана чlакlын пожарбы кlятхъаъани дестее чалышмишехьи.
Манкъуни увгьойка, мани санаъаlтылхъан аlшкь джухъад кlыл’валике ыхьа. Манке вуджее гьаммаше пожарныйбышди ишике марахный гьаъан. Нягьаlдый манбыше ялав экlда кlятхъаъа, дагъамийвалейхъа гябкlыйни инсанаршис кумаг гьели. Геледжагъыл’ вуджур манбышди джаргее эйхьива, манке фыкрейхъа хъадайли дешдий. Къийна са вахталийна Рамизна мурад быкырувхьана. Манкъве гьаlшде вудже дагъамийвалейхъа гаlбкlыйни инсанаршис кумаг гьели.
Къийнийна Рамизна иш республикее эйхьени чlакlни пожарбышиква багълыба вобна. Мана джуни гьамбазаршика саджигее гьаммаше цlа кlятхъаъас гьаlзирба вообунбы. Гойне хьинне, пожарный санаъаlт манмегаб сибыкба дешда. Манчин азыбы ацlахьесдимее инсаныхъад югун практика ихьес ыккан. Иш дешди вахтал’ манбышда детсейн джурабаджура гьаlзирийваллабы ыккека. Джохъад водун санаъаlтылхъан ацlаал’ сыкlылдад хаlдхъаъа. Гьааъани ишин къулайбы югда ацlахьесдимее джурабаджура курсбы илгъечlи.
Рамизни ихтелетике, са кар вод ацlахьес эйхьи, мана сечмишауйни санаъаlтыле нимеехьей разийра ыхьай. Манкъве эйгьен: «Пожарный ыхьай югда водун. Амма хаlнни цlайика растына хъарыйнкъаl, гъу гьаъани санаъаlтна гудж вацlоохьена. Манке вахъад фыкырашмишхьесда вахт воохьи деш. Манке гьаlракатаъан садджу инсанаршис экlда кумаг гьагвас. Манбышин хав-уджах ва я медын аваданийбы цlайике къаттихаъанас.
Гьаъани шике гаф гьааъанкъаl, Рамизе вудже сечмишауйни санаъаlтыхъад водни дагъамийвал’бишикер йишонхьана. «Йигъбышди са йигъыл’ джолхъа Магьаlчкъалайни шагьарее хав гёдхьанва хабар хъабы. Джигайлхъа хъабыйнкъаl, шакlле ацlахьайн мани хааъаб хьойре инсан аху ыхьай. Къуллеббышил’ юван магьаlджарбы ыхьа. юуван аккад ачмишехьи ыхьа деш. Зы гьамабазаршика къуллебышейдын магьаlджарбы гядхы, цlаейнче инсанар къаттивхьанавъуйнбы. Аlрейнче хаlбба вахт абкlынейиб, къийнаб манкийна гьадисе йикlел’ водун. Мани саягъылидын гьадисебы экlда-экlда йизди ишил’ растына хъайли».
Водни дагъамийвал’бышихъа ил’дяакы, Рамиз вуджее сечмишауйни санаъаlтыле нимеехье разийра ворна. Мани каре манкъус югун кумаг хааъабынбыше гьели водун. Мани каре манкъуна цlеррийна кумагчий джуна ыlмрена ёлдаш Джамиля ворна. Манар 2020-ъэсди сен адамийни санаъаlтна йихьа. Маlнкъейид Рамизее хьинне Дагъыстанын маъаlллимар гьаlзирааъан университет таамау. Джамиля информатикайнайий математикайна маъаlллима ворна. Амма манчихъа ил’дейкы, къийна маlнкъее адамейршин иш вуккекка вобна. Рамизыка саджиге ишлмешейхьи ворна. Джамиляйна иш пультылхъа хъадыйни зенгбышис джаваб хъувой водун. Маlнкъыни гьаlракатыке хаlдда кар аlсылыда водун. Нимее экlда маlнкъее хабар гьувое, са гьаманмегад пожар экlда кlятхъаъас.
Рамизихъабый Джамилейхъаб гееб уфтанна хизан вобна. Манбыше кьоlйре ушахар чlакlы хъааъа. Гадее ёкьудъэсди синыфе хъаlдаххъа. Ичий кlыл’на ворна. Мана ушахаршини бахчейхъа гьаейкlан. Рамизни увгьойка, геледжагъыл’ ушахар джони йаlххъын абкlынее шадра ихьес.
Апрельни вузани 30-чил’ Россиейл’ пожарныйни ишчерше йигъ алгъагьас. Йишди редакциейн мани санаъаlтыл’ чалышмишоохьенбы байрамни йигъыква табрик гьааъа. Манбышис джони ишил’ угъурбы аlрзаъа.
