Оlлкайни Хааlрынкъве В. Путине гьайни сен сентябрьни вуза СВО иштыракаъани эскераршис алава кумаг гьелесдиме сейракни мобилизациейни гьаlкlеена кьарар гьуво.
Мобилизациейква хьебыдваlщ аазыр инсан хъортул’. Манбы частбышилхъа оlтирааъассе гьихъа, гьаlзирийваллабы илгъечlу. Къийна манбыше Россиейн торпахбы украинайни миллетчершике азаадаъа. Мобилизациейхъа гlябкlыйнбышди аlраее цlаlхни халкьын джаванарыб кlылба дешинбы. Манбыше джони гьаlракатыкайий баджарухука цlаlхни миллетин до ахты хъаъас чалышмишоохьи. Игитерше хьинне Ватанни гьийдын джон бордж хъели.
Бабаюртнни зонайл’ни Цlаlхни бинайл’ ешемишехьени Сулейманов Аlббас дайийн кьоlйре духйебы СВО иштыракчер вобунбы. Гадебышда кlынна Мавлидин хаlдда сенбына Мурманскни шагьарее контрактыкана эскер ыхьа. Кантракт быкырхьайхъа гора, мани ишиле аркlына. Украинее СВО гидгъылмее, джуни хайишиква махъа аркlын. Кьоlръэсда дих — Аlлий мобилизациейхъа гирхьу. Къийна манбышда кьоlйирсана СВО иштыракчер вобунбы. Манбышда са Запорожье, сайир Луганск вобунбы.
СВО иштыракаъани эскераршина вазият вааlцlавхьесдимее зы гьайни йигъбышил’ Аlббас дайийна мигьман ыхьа. Манкъве заквани горушее гадебышике, джуни ыlмрыке гьар суракена гаф гьавъу. Манкъуни увгьойка, эскерейни духйерше вахт вухьамее зенг гьаъан. Манбыше джоке хабар гьоолена, йизынбыд хъидгlын гьаъанбы. Аlхирейни элеес манбы заква гьинчиле са-кьоlдле йигъна гьихъа йишонебхьа. Манбыше саламатийвалла вобнава увгьо.
Манчиле хъийгъа Аlббас дайей манбышди хизанбышис гьокуlматын гьелени кумагыке йишонхьа. Манкъве джусахъа арыйна инсан ыхьа дешва агъмишау. Амма манбышди хизанбышис гьокуlматни ташкилатбышенче зенгбы гьаъанбы, бале аахванбы. Манбышис геххьен кумагбыд гьихьараъанбы. Мани сардан аилебышихъад наразийвалла дешда.
Аlббас дайийке СВО иштыракаъани гадебышда гьалзугар вацlавхьайле хъийгъа, джуни ыlмырике гаф вукку. Наlгьырый вудж сувале Бабаюртхъа хъары, хизан къурмишавъу, хивни тасарруфате ишлемишехьи гиргъылийнчике ихтилетау.
Манкъуни увгьойка, вудж махъа тезеда сувал’ни хиваршис торпахбы гьелени сенбышил’ хъарына ворна. Молюдъэсын сыныф хивее быкырауйле хъийгъа, Магьаlчкъалейхъа хъаlдхъас хъары ыхьа. Манке джуна хааlрна чодж Сабир мааъар ешемишехьи ыхьа. Чоджанкъаl кумагыс ары ыхьа. Эле гьамарыр ахуна. Сабара гагьна тасарруфатее чалышмишхьа. Манчиле хъийгъа эскерийвалейхъа аркlын. Эскерейнче хъарыйле хъийгъа, хизан къурмишавъу, меер махъа саркlыл’.
Аlббас дайий мани сенбышее хаlдда джурабаджурайни ишбышил’ ишлемишхьа. Манкъве цlедда шофирын, гойне трахторчийн санаlънат гьау, манчиле хъийгъар малкъара гьуваджени фермайс хаlбвалла гьавъу. Манбы тасарруфатбы тезеда къурмишехьен сенбы ыхьа. Манке маlгьсулбы саъани вахтал’ хиваршейнче инсанарный абайленбы. Манбышди гьавъуйни заlгьматыс сакlы югун эмек гунний ойкlан.
Заквани ихтилете манкъве трахтор ишлемишаъасын гьавас раlгьматтыгъ Гъази дайийке хаlдхъыхьава увгьо: «Манке зы тезера эскерейнче хъарына джегьилний.
Машин гьаъайкасын правабыд ыхьейид, трахторулхъан хаlдын гьавасний. Манке Гъази дайей цlедда зы трахторулхъа гюъарау. Манкъве зас манчин гыргын сирбы хаlдхъауйнбы. Аlрейнче сабара вахт аьбкlынийле хъийгъа, заке гьаlкlена трахторчий ыхьа».
Гьихъа Цlаlхна хаlбна бина вухьа. Мааъар миххьейбы, цlаlхбы, хьойикбы са тасарруфатее чалышмишувхьа. Хъийгъа-хъийгъа тасарруфатбы джурахьайнбы. Хъийгъа-хъийгъа манбы джурахьайнбы. Тасарруфатбы джурахьейид, инсанар джуравхьа деш. Манбы са хизанын инсанар хьинне ешемишувхьа. Манбы югни- писди йигъыл’ саджигейхъа савайли вухьа. Джохъад водун мисалабы санад аlрейнче алятlасын ишбы къеджи ыхьа.
Къийна са вахталийни хаlнни бинайке кlыл’на хив хъувхьа. Гьаlшде мааъаб йихьыбле хизан авху. Сабарабы кочмишувхьа абкlын, сабаранбыше хайбы таргау абкlын. Аlббас дайийна хизан манче хъигъевчlес телесмишоохьи деш. Манкъве эйгьен гадебыше ши шагьарейхъа хъоотlаланбы. Амма ши мани карее телесмишоохьи деш. Шас гьин джига къабыл’да.
Саныхьийнийий къийнийни йигъбыщди гьаlкlее гаф гьааъанкъаl Аlббас дайей эйгьен: «Тасарруфат гьуваджесдме гьин джигабы лап югда водунбы. Заlгьмат гьаъани инсаныс гьиняъад гьарджура имканбы водунбы. Манчис сакlы уфтанын доланджагъ ихьесын. Зы къийна ешбышейхъа гьирхьыл’на инсан ворна. Аlхирейни вахтал’ джананыд имкан гьооли деш. Начахра эйхьи. Джаванаршихъадыд тасарруфатыл’ ишлемишувхьесын гьавас аху дешод. Амма зы шокlле эйгьен, мееб гьийбна вахт хъавалесда. Инсанар кlылба-кlылба гьиняхъа савкlаласынбы. Тасарруфатбы гьаlракатейхъа
Горушни аlхирее манкъве гыргынбышис джанана сагъвалла аlрзавъу. СВО экlда таамхьа, эскерар сагъба-саламатба хайбышейхъа хъавалесын дилегбы гьеххъы. Зынад манкъуни ихтилетыс кьувва гьооленкъаl увгьойн: «Сагъвалла вухьена эскерейбынбы сагъба саламатба хайбышейхъа савкlаланбы».
Аlббас дайийкан хъийгъыйн горуш духйер эскерейнче хъабыйнкъаl ихьесынва мыlслягьатейхъа хъабы. Умуд гьааъана, ман горуш геджвалейхъа ахвас деш!
