Февральни 24-чил’ Россиейн Украинайл’ СВО гидгъылыйн са сен быкырхьес. Къийнийна йишда мигьман, Джинаlгъни хивейнчена контрактник, оператор наводчик Балаев Натик Ширинна дих ворна.
— Натик, дора гаф аlдат гьуваджы, танышийвалика гивгъалас.
-Цlебба зы йизди, гойнехьинне гьамбазаршини доюле редакциейхъа хъортулуйхъа гора, миннатдарийвалла агъмишааъа. Зы едике Рутул районни Джинаlгъни хивей ыхьа. Мааъад йыlкьнекин мактаб быкырау, эскерийвалейхъа аркlын. Манче хъарыйле хъийгъа, контракт одкlун, ватаныс хидмат гьааъа. Гьайни сен мааъар ишлемишехьен 15 сен быкырхьес. Мани сенбышее зы Къузайл’ни Кавказе ыхьайни сабара операциебышее иштырак гьау. Гьаlшде СВО иштыракаъа. Гьайни элейсын махъан кьоlдъэсын гьаркlыний ыхьа. Цlеддыйни элейс зы мааъаб кьоlбле ваз гьавъу. Гьини элейс йизын махъана йаlхъ хьобле вазна цlыцlавхьа.
— Къаджейнчикена гаф гьееъэ.
— Зы йизди гьамбазаршика саджигее Запорожьени вилаетыл’ вухьа. Мааъаб ши къийна саакитийвала гьувааджи. Манчиле савагьийда, Энергодарни шагьарее ишлемишехьен АЭС къорамишааъа. Манчин ёкь сура гьаlлкьейхъа алятlу водун. Махъа гьашуджар иджаза дена къекка деш, няъас увгьое кьоlни хьебни элейс Украинайни сураке мана шагьар джони хылехъа сааъасва Днепр дамайле илгъебчlес гьlаракатау. Амма ши манбышин оlги аххъыйн. Манчихъа ил’дяакы, къийнаб манбы явашоохьи деш. Дамани шениса сураке шалхъан атыш гьаъа.
— Сабара вахтале са сен быкырхьес Россиейн СВО гибгъылыйн. Къийна мааъаб вазият нени гьаlлейий?
— Вазият писба дешда. Гьихъа ВСУ аххъыйн хаlдданан торпахбы йишди суралхъа илгъечlу. Йишди кьуввабыше манбы кlылда-кlылда темизяъа гьихъа ал’гьааl. Гьелбетди, гьар са шагьар вая район темизяъанкъаl, ши гуджнакван вурушбы ыккекка, командирарше гьувойн амырбы быкыраъа. Чалышмишоохьенбы, мааъад ши йишин баджарагъ гьагвас. Дущманыс нафас алятlас имкан гьооли деш. Гьаlшде манбыше гьийгъанче гьихъа аххъыйн джигабы гьалсыр гьебахаъанбы.
— Къийна соцсетьбыше ши хаlдда гьаlкьдешди ихтилетбышика растына хъавайли. Мааъаб йишди эскерарше, аляъасди палтарыкейий охьанасди карани кеситийвалике гаф гьааъа…
— Гыргыда манбы наlгьакьын ихтилетбы водунбы. Къийна СВО иштыракаъани эскерершихъаб нишикенаджаб кеситийвалла дешда. Манбышихъаб гьеххаалика лазымын карбы водунбы. Кок дешди ихтилетбышилхъа кlыры гьелес ыккан деш. Къуlмани хааъаб гювъур, гьаlкьдешин гафбы гьаъанбы гьаммаше вухьайнбы. Манбыше мани саягъыл’ни ихтилетбышиква хайирыле хаlдда зиян гьели. Масалан, шас йигъыс хьебни элейсын къуlман одхьуний гьели ыхьа. Гойне хьиннед, эскерарше гьар йигъысыйн къуруни одхьунийбы алятlанбы. Палтарбышикенайий къелилинбышикена ненкеджад кеситийвалла вухьа деш. Манбы ши гьар элейс тезенчика бадалаъа ыхьа. Россиейни джурабаджура джигабышейнче хъадайлен кумагбыд шасахъа гьийхьар ыхьа. Маlгьдын пасылкlабы оlтираъанбышис джурайда сагъулва эйгьи. Къийна СВО иштырак гьаъан эскераршис, гьокуlматын гьар суракен кумаг гьелен.
-Натик, азад гьауйни шагьарбышее авхуйни инсанаршикван алакьабы водунбыне?
— Манбышика шахъад геед югун алаакьабы водунбы. Манбы наlгьбый ешемишоохьи, гьаlмагьбыб ешемишоохьи вобунбы. Йишда оlдж манбы динджиба ешемишувхьес гьидясарни миллетчершиквана вобна. Хаlдда сенбына гичlыква ешемишехьен халкь къийна ачухни дюнйейлхъа хъигъечlы. Гьаlшде манбышис нишикенаджаб къорху дешда. Манбыше ши вуккеккани ишис ахтына кьиймат гьооли.
-Гъу къуллух гьааъани частыл’ йишди элин мебын эскерар вобунбыне?
— Вобунбы. Манбышика ши экlба-экlба хъызааханбы. Сана-санкъуке хъидгlынбы гьаъа. Манбышда вазиятыб писба дешобна. Манбыше Дагъыстанейхъа хаlдда саламбы йlххъыляу.
— Йизын валхъан аlхырейдын суал: СВО мысыйсий таамхьес?
— Гьинаlгьад адкlынее, ман хылийвалис цlыцlахьес деш. ВСУ вазият йигъ-йигъыле дагъам хъоохьи вобна. Сабара вахтаке манбыше джо аххъыйн джигабы таргаъасынбы. Ши гъамувхьесынбы. Манчихъад са-кьоlдле дешин.
— Натик, вахт тlабалавъу арыйхъа гора, сагъра ихьена. СВО экlда таамхьа, йишин авхуйн эскерарыб хайбышейхъа савкlаласын дилегбы гьеххъа.
— ИншаАллагь
