Спорт суIлгьын эл’чий водун. Мани джуваббышихъаб кIорана маIънаа вобна, няъас увгьее Олимпиейн оюнбы аIлгьаани вахтал’ гыргынанкъаI даIвъий-гьыIджатбы явашехьенбыний. Манчиле гъайре, спортухъаб инсанар делес хъааъан гуджуб вобна.
Iхбышди джегьилершини арайлин вуккуле ох айгьен турнир илгъечIу. Мана спортна маджлис халкьыни баба-дидершини едигарыс къабсыр. Манчилхъа тамаше гьавъуйниме хил’дже джаIмаъат ады. Джегьилершиква янашеба ешли гьаваскарараб вухьа.
Турнирын иштыракчер йицIыссад командабышилхъа битIалувхьа. Гьар командее хьебийре инсан ыхьа. Финалэхъа 3 команда хъигъевчIу. Манбышди арайл’ цIеббыйна джига авхъас Мирное хивенчени командайс кьисматувхьа (Мурад Шихбиядов, Тимур Къубалыев, Руслан Къаратов). Финалэхъа хъигъебчIыйн иштыракчер Шарафни грамотабышис ва медалбышис лайикьавъу.
Хъийгъа спортни маджлисехъа сабыйнбышди гьийр Къызларни районни динэгьлершини ташкилатна къуллухчий Магьмуд Хизриев юшенхьа. Манкъве вудж турнирехъа хъортIулуйс миннатдарийвалла агъмишавъу. Манкъуни увгьойка, Мирное хивни имамни Ислам Шихбиядовни гьунарыква алгъайгьена цIеббыйна маджлис дешобна. МаIгьадни маджлисбыше инсанар делес хъааъа, сана-санкъулхъан аIшкь артмишаъа, доствалла, танышийвалла итIум хъааъа.
Манчиле гъайре, М. Хизриеве Дагъыстанэ ва гьихъийаллани джигабышее Исламын дин ЦIаIхыйни медресейни кьуватыка еймишхьава увгьо. Манкъве джуни ихтелете хаIбна фыкыр ушахаршини хаIбхъавъуйс, тербиейква багълыдани месалабышис гьуво. Манкъуни джуваббышихъа гора, хизанее ушахар йишди халкьыни аIдатбышиква, гивъур-сугъоцыйс фыкыр гьувойка чIакIы хъааъас лазымба. МанбышикIле ацIахьес ыккананки, декий ед’на дараджа гьаммаше ахтывале вухьес вуккан.
Муса Къубалыеве ушахаршини тербиее вааджибна джига исламни динын авхъаахъава агъмишау. «Гьар йигъыл’ни хьони элеесди кубын инсанын йикI’ темизяъа, нягьаIкьни ишбышис аман гьооли деш. Йишда макьсад шас къаховуйни динни шариатбышиква ешемишивхьай вобна. Гьаммаше югвалла гьааъас вуккан ва мана Оорункъве валеб камааъас деш» — манкъве увгьо.
Йизди чыхышее зы миллетна саламатыйвалла, садибыйвалла хъаIдаххъани адабиятыке, кIазетбышикеб аIслыба вобна увгьо. Манчини кумагыка инсанар халкьни шааираршиква, язычершиква, аалимаршиква, медни пешебышди йессибышиква танышоохьи, джурбаджурайлин хабарбы ацIахьи. Манчини аллад, зы «НУР» кIазет одкIуний теклифау.
Ислам Шихбиядове къийнийни йигъылин турнир тешкиляъас хыл’ авхъуйни Малик Сафаровыс ва мебни йишди элинбышис йикIеенчен хошун джуваббы увгьо. Хъийгъа летти, манкъве турнире иштырак гьаийни гыргынкъукIле сагъулва увгьо.
Спортна маджлис чейбы илёдгъуйка таамувхьа.
