ИнсаныкIле ацIехьи деш къийхъийн йигъ нягаIд джулхъа хъалес ыхьай. Сасса вахтал’ Аллагье инсанын хасиятбы ёхламишаъа, нягьаIрий вудже вудж дагъамийвалеехъа гирхьуйнкъаI ыккекка, ваяхуд дагъамийвалее къаджейни инсаныс манкъвее хыл’авхъааххъае. ЫIмрее инсанни вукIлелхъа джурабаджур дагъамивал’бы ва шадвал’бы хъадайли. Манчике илгъечIес аIхас ыккан. Манчиле хъийгъа, инсанылхъан ыIгьтибар ацIахьи. Мысаджар чешбашхьес ыккан деш, сабырыле къаъайхьас ыккан деш. АIхани джиге кумаг гьелес ыккан. Месала вобна: «Гъу чалышмишхье кумагаъас, кьадир ваацIавхьее ваацIоохьи, дяцIавхье дамалхъа гьувоохьре. Балугъан мана алебтIасда». Гыргыда ши гьаъан югун ишбы ОорункъукIле къеджи водунбы.
Къийнийна йишда макьале ламусакани, гъиръятыквани цIаIхбышди игитни Улуханов Рамазан Байрамни дихни гьаIкIеена вобна. Манкъуна кок Калел’ни хивеенчена вобна. ГьаIшде мана Къызларни районе ешемишехьи. Сабара йигъбына гьихъа манкъвее богъмишехьена инсан хьинеенче гьыIдтирхы.
Рамазан машнеква Къызларгъанче Бабаюртхъа хъооI ыхьа. ЙаIххъа манкъукIле илёбзур, нишилемы тамаше гьааъани инсанаршина десте къавдже. Машин даянмишаы, мана хъигъечIу иляккана, хьинеква гявцIуйни кIаналеехъа машинод къаъайдхьу. Инсанарше манод хьинеенче гьыIдидаIхха. Рамазанна ул’ машнени ар ахуйни инсанылхъа хъабы. Мана гьаIлале аркIыний. Рамазан нишихъа джар ил’дяккы, къоркIул’на кIаналеехъа. Машнен акка ачмишаы, серсямхьана инсан манчеенче хъыгъавгьу, кьоIни гьамбазаршиква хьинеенче къурулхъа хъыгъайшу. Манбыше телесюгра акьвакIена хъау, манкъуни гIаленче хьян хъыгъау ва нафасылхва хъаляу. СыкIылбаб гедживхьайнбыхьий, манкъвее нафас гьелесынний. Богъмишехьена инсан джулхъа хъарыйле хъийгъа, махъа хъотIулыйн «Скорая помощь» хъады гьидхьыр. Гьинбыше гьина алертIу машнеехъа гиххьы дёлесни больницехъа хъыккы.
Рамазанни увгьойква, нягьаIдый манкъун машин кIаналеехъа къаъайдхьуй, мана ненчена ыхьай ва до гьиджо ыхьай манке ацIахьа деш. Йизди фыкрее манке са кар ыхьа, нягьаIрий мана богъмишехьени джигеенче къадтихьанаый.
Гьел’бедти, Рамазане джуна адамийвалла гьаагу ва сувааб къазанмишаы. Рамазан хьиннен джегьилер цIаIхбышихъаб вухьайнбы, вобунбы, вухьесынбы. МаIгьбын игитер шахъаб воб летти, ши архайнба вухьес. Рамазаныс хыллийна шадна ыIмыр аIрзуламишааъа ва Ма ша Аллагьва эйгьи!
