Гьар сен, апрел’ни 7-чил’ быкырни дюнйейл’ джанана сагъвалла гозетяаъан Йигъ алгъайгьи. Мани йигъыл’ джурабаджур майдамбышее мани йигъыс къадсырыйн маджлисбы, оIюнбы, форумбы, конференциебы илгъечIи.
Дагъыстанее гьар сен джанана сагъвалла гозетяаъан Йигъ гьаIракатыква алгъайгьи. Гьайни сен ман йигъ коронавирусыква вуккеккани мубаризайква алакьа гьаы. Мани йигъыл’ республикайни шагьарбышее, районбышее, хиварше коронавирусни чIырвал’ни гьаIкеIеедын маIълумат гьели. Инсанар нягьаIбый манчике къорамишивхьес ва чIыры хъувхьее нягьаIдый маалидже гьаъас ыкканва хаIбхъааъа. Дагъыстанее гьар сен джанана сагъвалла гозетяаъан Йигъ гьаIракатыква алгъайгьи. Гьайни сен ман йигъ коронавирусыква вуккеккани мубаризайква алакьа гьаы. Мани йигъыл’ республикайни шагьарбышее, районбышее, хиварше коронавирусни чIырвал’ни гьаIкеIеедын маIълумат гьели. Инсанар нягьаIбый манчике къорамишивхьес ва чIыры хъувхьее нягьаIдый маалидже гьаъас ыкканва хаIбхъааъа. Джанани сагъламийвалис къадсырыйн йигъ республикайни марказее, Елена Исинбаевайни дойил’ни «Труд» стадионе илгъечIу. Мани садибни йигъынджагъее иштырак гьаъас республикайн чIакIын къуллухчера, министерствабышин эл’чера, дохтурар, спортсменар, динэгьлер, журналистар, аали мактаббышин телябабы ва мебын инсанар сабы. Манбышди аIрее ДР-ни Минспортна хааIрна Сажид Сажидов, ДР-ни сагъламийвалла гозетяаъани министерствайна хааIрна Татьяна Беляева вухьа. Манбыше майдамахъа абыйни инсанаршини гьийд чыхышбы гьау ва гыргыба дюнйейни сагъаламийвал’ни йигъыква табрикавъу. Мани ыхьайни маджлисбышее джурабаджур ваджибын , джанани сагъваликва, ешайишиква, одхьунийква багълыданан суалбы къалхымишаы ва манчисын джаваббы тIабалаы. Нени дагъамийвал’бышиквайи растына хъабайли ашкараы. Энки хаIдын алхыш джанани сагъвалика багълыда. Инсаныс эн гранын ва аIзизын кар джун джан водун. Джан ыкIаранкъаI ваяхуд манчис са зиян ыхьайнкъаI, инсанни улекIле не вар-девлет’, не пыл, не иш къедженбы деш. ЦIеррыйке, гьар инсан джуни джанана йесси ворна. Манчина сагъламийвалла инсане вуккеккани ыIмреке ва гьаъани ешайишике аIссылыба. Дагъыстан гуджнака спортыква машкьулехьен Россиейн субъект гьыIсабехьи. Йишин джегьилер аIсас гьичIоокарни ва сачаахарни спортыква маIшкьулоохьи. Республике хаIбба олимпиадайн, дюнйейн, авропайн, гьоIкуматын чемпионар вобунбы. Манбыше джо йыIкьале вуIххъани джегьилершис чечнайс гивийхьи. Джегьилерше манбышилхъа сент аххъаххъа . Гьел’бедти, мани дагъыстанлыбышди аIрее йишин цIаIхбышин джегьилерыб вобунбы. АIхреени сенбышее республике джурабаджур спортын майдамбы, утагъбы ачмишау. Джегьилершихъаб имкан вобна нени спортни оIюнылхъайий гьавас, манчиква маIшкьулхьес. Манчиле гъайре шахъад югун тренераршин мактаб водун. Агар профессинонал спортуква гыргына маIшкьулхьесын имканбы дешхьее, санабни спортыква гыргына ихьес ыккан. Спорт джанани сагъламийваликва алаакьан кьар водун. Нимеега хаIбба спортыква маIшкьулоохьен джегьилер вухьее, гьаманимеега миллет джанас маIгькамын ихьес, лазым дешди, нягьаIкьни ишбышиква марахламишивхьес деш.Республике спортни оIюнбышин медын джурабыд (лёгкая атлетика, тяжелая атлетика, уз’мишивхьай, велоспорт, баскетбол, регби ва мед. ) артымишаъас ыккан. Джан тавул’ ихьесди меега, гьаммаше джан гьаIракатее ыккан. Эн рагьаIтын усул джан гьаIракатее аххъый — ийкырий водун. Инсан гьам ийкарас ыккан, гьам хылеббышиква ишлемишхьес. Джанана сагъламийвалла спортыле гъайре, вукеккани ыIмрекеб, одхьанни каракеб, гьаваакеб, гьихъийаллани дюнйейкеб аIслыба. Дюнйейлхъа коронавирусна чIырвалла еймишивхьайн кьоIдъэсын сен водун. Къийнад манчин оIги быкырда къацIадкIун дешодун. Йигъыс дюнйейл’ мани чIырвалике аазырбышиква инсанар гьабатIа. ГьаIшде дохтурарше манчиква эксина даIвъий вуккекка вобна. Мани чIыривалике инсанар къорамишааъасди меега, вакцина гьааъа. Сабара экспертбышди увгьойбышиква, Россиейл’ Къооккана вакцина эн маIгькамна, джанас зиян гьиделена вобна. Инам гьаъас ыкканий!Гыргынкъуни джанас сагъвалла гьевлена! Спортука машкьулувхье, темизин кар охьне, хъаIлбы гьимаъа!
