Августни вузани 27-чиле 30-чилхъамее республике гьар сенийн телерадиоверлишбы гьаIзираъани ташкилатбышин «Евразиейн сес'» фестивал' илгъечIу.

 Ман Дагъыстанни хаIрынкъве, Правительствайн ва ВГТРК ташкилатын санад алгъайгьен тадбыр водун. Гьини элеесди фестивале йигIцIалиле агъаллани Россиейни джурабаджурайни регионбышейнче абыйни журналистарше, компаниебышди вукIлелинбыше иштыракау.

ГьаIшдийн «Евразиейн сес» фестивал' республике алгъайгьен йихьыдъэсын ыхьа. Ман Россиейни алгъайгьен халкьбышди садибийваллайни сенис къадсырыйн ыхьа. Махъа сабыйнбыше Россиейл' ешемишоохьени миллетбышди достваликва, манбышди садибийваликва, маданиятыква, аIдатбышиква ва доланаджагъыква багълыданан телерадиоверлишбы гьагу. Югун джигабы аххъыйни материалбышис пайбы ва наградабы гьуво.
Фестивал'ни аахъе Халкьни Маджлисни хаIрынкъуна кумагчийе Камил Давдиеве, сабара гагьна республикайни ракьамбышди инкишафни , маIълуматни ва чапни министрын ишбы ыккеккани Юрий Гьамзатове иштыракау. Манбыше мани йигъыл' махъа сабыйнбы республикайни хаIрынкъуни Фёдор Щукинни ва Халкьни Маджлисни спикерни Заур Аскендеровни доюле табрикавъу. Манчиле гъайре чыхышгьаъанбыше фестивал'ни иштыракчершис угъурбы аIрзау.
ГТРК «Дагъыстан» ташкилатни хаIрынкъе Луиза Алихановае джени чыхышее абыйни мигьманаршис хошгел'ди гьавъуйле хъийгъа, увгьойн: «Евразиейн сес'» фестивал' инсанар саджигейхъа сааъан хаIдын йигъынджах водун. Манчихъа гора, сениле-сенилхъассе фестивале иштыракаъанбышин сай хаIдхъехьи. Гьайни сен Россиейни тезе регионбышейнче - Луганскни ва Донецкни республикабышейнче абыйни мигьманаршед иштыракаъа. Зы фестивалейхъа сабыйнбышис вахт тIабалавъу Дагъыстанэйхъа абыйхъа гора, сагъулва эйгьи. Шос угъурбы аIрзаъа».
ВГТРК «Россия» ташкилатни хаIрынкъуни кумагчийе Рифат Сабитове Дагъыстанни регьбераршис «Евразиейн сес'» алгъаъас кумаг гьувойхъа гора миннатдарийвалла агъмишавъу. Манкъуни увгьойка, мани саягъылин фестивал' Дагъыстанэй алгъайгьен хаIдда сенбы водунбы. Къийна Дагъыстан Россиейл' хаIдда миллетбы ешемишоохьен регион водун. Манчиныд йишди фестивалыс ярашугъ гьели. ВГТРК ташкилатын гьар йигъыс 57 мизелин верлишбы гьаIзираъа. Манчика багълыда Дагъыстаныхъад джурайн таарых водун. ГТРК «Дагъыстанын» гьар йигъыс 14 мизел' телерадио верлишбы эфирейхъа гьели. Мани карее ши коллективни ишис ахтына кьиймат гьооли».
Фестивал'ни кьоIдъэсди йигъыл' абыйн мигьманар Дагъыстанни уфтанни джигабышиква дёлесвалейнче танышувхьесдимее сафарейхъа хъигъебчIы. Манбы Дербентни шагьаре йиссейна таарыхна абида «Нарын-къалайни» таарыхыква, гьекIвани фонтаныква танышувхьа. Журналистар мааъад къаджейнчиква къайиххьыйнчике разийба авху.
«Евразиейн сес'» фестивал'ни аIхырейни йигъыл' хаIдда марахукван тадбырбы илгъечIу. Манчини аIрайл' кьомана джига екунбы ыккеккани маджлисын авхъу. Мааъад республикайни правительствайни вице-прмьере Рамазан ДжаIфарове иштыракау. Манкъве республикайни хаIрынкъуни Фёдор Щукинни доюле хъадыйн кагъыз хъаIдхъы. «Фестивалин Россиейни хаIдданани субъектбышейнче абыйн журналистар саджигейхъа сааъа. Манбышди аIрайл' вобна доствалла гуджлемишааъа. МаIгьдыни йигъынджагъбышин Россиейн миллетбы сыкIылбаб дёлес хъааъа».
Манчиле хъийгъа фестивалей иштыракауйнбышис ва югун джигабы аххъыйнбышис наградабыйий пайбы гьуво. Манбышди аIрайл' энки ахтыни наградабышис ГТРК «Дагъыстан» лакбышди мизел' радио ва телеверлишбы гьаIзирауйн Балхар. Вейбайква ипликейхъа сауйн аIдатбы ва ГТРК «Татарстанын» 27 сенеени Тукайна кIыл'на ыIмыр» донани радиотелеверлишбышин авхъу. Манчиле савагьийда фестивалын финалистар дипломбышис лайикьба къавджу.
«Евразиейн сес'» фестивал' маIъныйбышиквайий мыкIаршиква таамхьа. Махъа сабыйнбы геледжагъыл' ман меед Дагъыстанэй алгъаъасди кьарарейхъа хъабы.