Инсанни йикIеенче едике ыхьайн, ушахыйвалла абкIынийн джига мысаджад айкIан деш. Няаъар ешемишхьейир, нимеега югун шарааитбынани джигее ешайиш гьаъа ыхьейид, Ватаныква барабархьес деш ман джига. Имканбы водхьее, сенее са элейсхьейир махъа оIххъас ыккан, хайирысын, суваабысын ишбы гьаъас ыккан. Йигъни баба-дидершини юрдыс хыл’уIвхас вуккан, йаIхъ-кьыIт’, йыгъар, вейхбы, гармабы аляъас, тезелемишаъас кьул’пеенче гехьан кумаг гьелес ыккан. Ман ишбы гьаъый хаIдын сувааб водун.
Сувал’на дера йишда Ватан вобна. АIхреени 30-40 сенбышди аIрее мааъад ешемишехьени джамаъаIтын сай къат-къатна кIыл’хъыхьа. Мааъаб ешемишоохьен инсанар джаб деш, хиварад кьаIсхъыхьа, сувабыд кьаIрахъыхьа. Сувал’ни дерайл’ ешемишехьен джамаъаIт са хивеехъа саъас эйхьи.
Гьалекийс маадын джамаъаIт хиваршее водни ташкилатбыше (мактабын, больницайн, клубын) гьуваджи водун. Манбыд адкIынее, мааъар ешемишехьена инсан яраб ахвее. Месала вобна: «Дама йиссейни чини архылхъа сивийкIалнаки». Таарыхее маIгьдын гьаIдисабы эйхьенбы. Инсаныс сабыр, саакитыйвалла Аллагье джос гьувойни джигее гьаммаше авайки.
Яраммишивхьайни маIгьабни вазиятыхъа ил’дяакы, йишди хиваршее юххьан хъыхьамее, имааджийбы илгъечIи. Шагьаре ешемишоохьен йишин чоджар гьабкIын хайбы аляъа. АIхреени вахтал’ маIгьдын умуд гьоолен хайирыкван ишбы ЦIаIхе, Хьойикке, Миххьейе, Гыл’мецIа, сувал’ни Калел’ гьаъы. Манчини гьаIкIее ши оIгийл’ одкIунийн. Ман ишбы къийнад имааджийбышиква гьаъа водунбы.
Сабара йигъбына гьихъа ЦIаIхни администрациее депутатаршикван джамаъаIтын горуш илгъечIу. Мааъад гьиджо ишбыйий гьайни дёлесийвале гьаъас ыккан, ихтелет’ ыхьа. МислягьаIтеехъа хъабыйнбы, хиваршини джамаъаIтыс ( сувал’ ва шагьарбышее) хабар гьевлес ва садибда ман ишбы имааджийбышиква гьаъас.
Гьайни дёлесийвале ЦIаIхеени Шейх МаIгьмыд’ни зияратна гьаваа (чардах) бадалавъу. Манчис тезе йива ыIхы. ГьаIшде зияратеени някьвбышиле оодын кьоIбле кьуббабы бадалаъас аху водунбы. Манчисын харджийбы шаваа гьаъый шакIле ацIа деш, амма ман ишбы НезирмаIгьаммад АIгьмадовнийий Шихмирза РаIгьымовни регьберийваликва хивни джамаъаIтын гьаъы. Шаца гьаманбыше джад суваабысын ишбы, заIгьматбы манзик абрелхъа хъааъанкъаI, ХаIбни Ватанни даIвъийни ветеранаршис ва медни даIвъийбышди иштракчершис гьаIйкал гивийхьенкъаI, ЦIаIхеехъа аIккяаIни джиге аабида аляаъанкъаI гьаъы. Гьел’бедти, мани ишбышее хаIдын кумаг хивни джамаъаIтын ва хивеенче хъигъебчIуйни джегьилерше гьаъы.
ОIт’мишивхьайни вуза суваабысда иш Мишлешни хивее джуни харджийква СВО-ни иштыракчее Рустам ГьаIсанове гьавъу. Манкъвее хивее, Самурни дамайни гIалеедын дагъамын джига гьаIсареехъа алетIу. АIсас мани джигайке къорху мактабни ушахаршисний, больницейхъа ивийкарни инсанаршисний ва хивеехъа хъооIни машинбышисний хъоотIа. ГьаIшде мани джигайке инсанаршис зиян хъетIасда къорху дешда.
ХаIдын суваабыс окIанасын заIгьматбы Гыл’мецIни хивни джегьилерше гьаъы. Манбыше Сувани къома, гадигее , мал къыIлина гьуваджени джигее, пешекараршисын хав аляъы. Ман аляъасын осан ыIгьтадж, акка-къул’, шифер аIмалершиква, хивни джегьилерше йыIкIал’ ман алхъищы.
АIсадуллагь Рамазановни увгьойква, мана джуна, хивни джамаъаIтна мураадний вобна. ГёгъуйнанкъаI, пырадананкъаI сувал’ пешекар дюгыл’хьесын джига дешдий. ГьаIшде мани хааъад гыргын лазымын пешекарысын шарааитбы водунбы. Палтар къурухъаъасын, хораг хъоххьарасын, хаIм саакитба къаагьасын, истирагьаIт гьаъасын имканбы водунбы. Мааъад быхараб, фенерыб, пешекарна быIхалиб водунбы.
Сабара сенбына гьихъа калел’быше джона Сувал’ни маIгьалыл’на Калел’на хив аляаъа гибгъыл. Махъа машнена йаIхъ, токIан ишыгъ, хьян цIыцIаъы, хайбы аляъасын майдам ачмишауа, гьабкIынийн имааджийбышис инсанар аахвасын вагон гиххьы , манзик аляаъа гибгъыл. Гьел’бедти, ман ишбы гьаъасдимее гьоIкуматни сураке хаIдын кумаг гьелес ыккан. КIыл’ни инсанаршини хусусы харджийбышиква ман ишбы быкыраъас дагъамда ихьес. Манбышис кумаг лазымда водун. Гьаманчини гьаIкIее депутат ихьес ыкканна фыкырамишхьес ыккан. Садджу депутатын мандат алетIу, джуни хизаныс ва джибыс деш ишлемишхьес ыккан.
Хивни, Ватанни меега джан гийхьени , заIгьматбы гьаъани инсанаршис Аллагье джанана сагъвалла, баракат , сувааббы гьеленбы!
