ХаIдни гьоIкуматын хурун миллетбы
Ноябрьни йихьынчил' МагьаIчкъале, Расул Гьамзатовни дойил'ни миллетни китабханее, поэзиейн конкурс «ХаIдни оIлкайн хурун миллетбы» илгъечIу.
Ман адабиятын йигъынджагъ Миллетбышди садибийвал'ни Йигъыс къадсыр ва ман къурмишаъыйн Дагъыстанни хъаIдхъийни ва ыIлимни министерствайн. Конкурсна спонсор ыхьана ишкар-меценат Нариман ГъазаIлиев. Поэзиейни конкурсе иштыракаъас ва джон друстда хъаIдхъийн гьаIракатбы гьагвас са чуIт гьар миллетни чIакIни сыныфбышин шыгыртар абы.
Маджлис саламыква Дагъыстанни хъаIдхъийни ва ыIлимни министре Ягьйя Бучаеве ачухавъу. Гойне манкъвее джуни чыхыше увгьойн: «Россия саджигеехъа 200 агъаллани миллетбыше сааъа. Манбышике 100 миллетбышин эл'чера садджу Дагъыстанееджаб асырбына муIгьуббатыква ешемишоохьи. Министрыни увгьойква, йишин республика эле гьар миллетбыше са джигеехъа саъы ва манбыше ман гьар дагъамни вахтал' гьуваджы. Ши дагъыстанлыбыше гьаммаше аIдатбы ва адаббы гьувадженбы. Шахъад йишин маданият водун. Гыргын югун аIдатбы гьуваджес ыккан ва гьар миллетна гьуIрмат барабарба сана-санбыше авхъас вуккан….». Гойне манкъвее кIылин маъаIлумат Дагъыстанни хъаIдхъийни къурлышикен гьуво ва гьиджо ишбыйий мани сардан гьаъас аIхы ва нишиле оойий ишлемишоохьи вобунбыва увгьо.Чыхышни аIхрее министре конкурсни спонсорыс Н. ГъазаIлиевыс миннатдарийвалла агъмишавъу.
Манчиле хъийгъа маджлис аххъыйни пIланыква абкIын.
Поэзиейни конкурсе иштыракаъас Дагъыстанее ешемишехьеи 14 миллетбышин шыгыртар абы. Манбышиква махъа джон маъаIллимар ва дёлесын инсанар абы. Маджлис вуккекканкъе дойийква чичихъаб хъигьна майдамеехъа шечIбы друстда йикIекIе хъаIдхъас гьар миллетын элчера хъобтIл. Манбыше джони едини мизяаршил джони миллетни шааирарше одкIунийн шечIбы хъаIдхъы. Конкурсе иштыракаъас йишди цIаIхни мизел шечI хъаIбхъас Камбулатни йыIкьнекни мактабна 8 сыныфна шыгырт Мамедова Айша Идрисна йиш ары. МаIнкъыни сыныфна регьбер УIмаров ГьуIсейн Кьурбанна дих ворна. МаIнкъыс цIаIхни мизекен ва адабиятыкен дарсбы Мамедов Валий маъаIллиме гьели. Айша республикайни марказеехъа Валий маъаIллимыквайий джени едиква ары. МаIнкъыс йикI'бы гьелес джен МаIгьачкъалее ешемишоохьен йичибыб китабханеехъа абы.
Поэзиейни маджлисее Айша Мамедовае Диляра Насибовае (Къубалыевае) обкIунна шечI: «МаъаIллимаршин байрам» йикIеке друстба хъаIбхъы. МаIнкъее хъаIбхъына шечI гыргынкъус кьабыливхьана ва хыллийн гапара гьаъы.
Айша Мамедовайс министре ва ишкаре хъаIдхъийни ва ыIлимни министерствайна диплом, айпат ва Кь Омахановын китаб « ЙикIеедын сирбы» пайис гьувы ва едигарыс саджигеедын шикыл'бы цIыцIаъы.
Мани йигъыл цIаIхни мизеле гъайре, аварни, агъулни , даргинни, лезги, кумыкни., лакни, табасаранни, ногъайни, рутулни, татни, азербайджани, чеченни, урусни мизяаршил шечIбы джони шааираршин хъаIдхъы. Манбышисыд дипломбы ва айпатбы гьуво.
Поэзиейна маджлис таамувхьайле хъийгъа, китабханайни магьаIлле саджигеедын шикыл'бы цIыцIаъы.
«Нур» кIазетни редакциейн Айша Мамедова ва Камбулатын йыIкьнекин мактаб мани гъамхьайква табрикаъа ва гьалед чIакIын