Сабара йигъбына гьихъа Мишлешни йыIкьнекни мактабе цIаIхни миллетни аIдатбышис, адаббышис, маIънийбышис къабсырна хаIбна маджлис илгъевчIу.Сабара йигъбына гьихъа Мишлешни йыIкьнекни мактабе цIаIхни миллетни аIдатбышис, адаббышис, маIънийбышис къабсырна хаIбна маджлис илгъевчIу.
Мана маджлис алгъаагьасда мислягьаIт 7 сыныфни регьбере (руководителе) Эл’зара Софиевае 7-8 сыныфбышди ушахаршиква къавдже. Маджлис алгъаагьас йигъбына гьазирувхьа. Манбыше йиссейн йишди баба-дидершин палтарбы гьазирау; йишди миллетын хорагбы хъодхьур, хъеджу; маIънийбы гьазираы; хаани аIрайл’ ишлемишаъан йиссейн къаб-къашукь, ыIгьтаджбы гёку.
Мани йигъыл’ ушахаршини гьаIракатбышиле тамашебы гьаъас маъаIллимар, шигыртар сабы. Мана маджлис маIънийква «Ай, чобан!» ачмишавъу. Мана маIъний цIаIхни мизел’ гьоокIу. Гойне Эл’зара маъаIллимае маджлисеехъа сабыйнбышис цIаIхни миллетни гьаIкIеедын маIълумат гьувы: няайий манбы ешемишоохьи, манбышин сай, манбышди мизехъад нен лугъадбыйий вод, гьиджоо аIдатбыйий, нишиквайий манбы оIгийл’ маIшкьулоохьи вухьа, шавайий манбышин таарых, адабиятна миз’, адабият, фольклор одкIун, манбыше ыIбаадат гьаъан дин нений ва медын миллетиква багълыданан суалбы къалхымишаы.
Эл’зара маъаIллима математикайна ва физикайна саIнаъаткар йихьейир, маIнкъее джени миллетин аIдатбы, адаббы гьувадженбы. Сабара едини мизеке илгъечIени конкурсбышее, олимпиадабышее шасыд кумагаъан.
Маджлисее ушахарше тамашейс йишди миллетын йиссейн мыкIар, йиссейн палтарбы аляу гьагву, цIаIхни миллетни шааираршин шечIбы ватанни, муIгьубни, йихъийаллани дюнйейни гьаIкIеедын хъаIдхъы. Манбышди аIрее Мишлешни хивее едике ыхьайни шааирын Сиражутдин Кьурбановын шечIбы ыхьа. Манкъуни шечIбышикван маIънийбы гьекIу. АIсас джига маджлисее йишди миллетни хорагбыше авхъу. Ман хорагбы гьазираъас ушахаршис кумагбы мактабни маъаIллимабыше, едяарше гьаы. Мани йигъыл’ истолылхъа тIуб гивхьесда джига вухьа деш. Суфра ярашугъеехъа гырцбыше, плавын, гьаIлвайн, кьуцерше, маххьварабыше, хинкIалбыше, богъалерше, къурунни чурыйн, инчIинавурарше , иттуни къеджийни кIетулерше ва медынче адчы. Гыргынчин добы ши гьале аIлядхъы деш. Манчин шакIле гьагван, нимеега хаIдда, болда хорагбыйий шахъад. ДжитIада, маъаIллимара, ушахарше мани байрамыс аIдатыйба гьазирувхьайий.
Тамашейхъа иляакыйле хъийгъа, мани маджлисыс югна кьиймат мактабни директоре Арсен Мурадове ва организаторе ЫIсмаыл’ Мамедове гьувы. Манбыше джони чыхышбыше маIгьадни маджлисбышда вааджибыйвалла агъмишавъы ва хааишаийн геледжагъыл’ зарада-зарада маIгьдын йигъынджагъбы алгъагьас. Мана маджлис къурмишавъуйни Эл’зара маъаIллимыс ва джес кумагауйни маъаIллимабышис, ушахаршис ташакурыйвалла агъмишавъу ва сагъулва увгьы.
Мани йигъыл’ гыргынбы къаджейнчиле, къайиххьыйнчиле, одхьунийнчиле разийба авху.
Шинад, редакциейн, манбышикIле Ма ша Аллагь, — эйгьи.
