МаIгьачкъалэй «Журналистни чубаваллайн Кубок» республикайн мини-футболун турнир илгъечIу. Мани турнире йихьни камандайн иштыракау. Манбы регионални ва федерални СМИ-бышди ишчершике ибааратда ыхьа.
ОIюнбы гигъалассе гьихъа, турнирын тентенейкван ачмишхьай ыхьа. Манчини иштыракчершис Дагъыстанни ХаIрынкъуни ва ГьоIкуматни Администрациейни регьберни маIъвыне - ДР-ни ХаIрынкъуни хабарни сиясатни ва пресс-къуллухни Управлениейни башчийе Марат Лугуеве, ДР-ни таIгьсилни ва ыIлимни Министерствайни РДЮСШ-ни директоре Александр Маркарове, Дагъыстанни ЦУР-ни регьбере Исрафил Исрафилове, Дагъыстанни идманни шоIгьратни музейни хаIрынкъве Мурад Канаеве хошгел'ди гьавъу.
Турнире цIеббыйна джига «ННТ» камандайн авхъу.Манбы финални оIюне РДЮСШ ва достар» камандайле 2:1 гьIсабука гъамувхьа.Капширын медалбы Дагъыстанни пресс-къуллухбышди камандайс кьисматхьа. Мани камандайни таркибе йишда ватанэгьлий, хьойиккелий Арсен АIбдуллаев гьуваагы.Гъамувхьайнбышис ва ахтыйн джигабы аххъыйнбышис кубокбы, медалбы ва кьийматнан пайбы гьуво. Чемпион-камандайс пайис маIгьачкъалайни «Динамойни» оIюнчершини къолбышиквана топ гьуво.
Турнир Дагъыстанни таIгьсилни ва ыIлимни Министерствайни РДЮСШ-ни, Дагъыстанни ЦУР-ни ва ДР-ни ХаIрынкъуни хабарни сиясатни ва пресс-къуллухни Управлениейн тешкиляу. Ман оIюнбы алгъавгьуйниме хаIдын кумаг республикайни Халкьни Маджлисни депутате ГьаIджимурад Малаеве гьуво.
«Журналиснит чубаваллайн Кубок» турнир далбадал илгъечIен кьоIдъэсын сен водун. Манчина макьсад республикайни медиаджамиятын саIнаъатыква багълыданан ва доствалин алаакьабы утIумаий вобна.