Ватан дареенанкъаI, манчис мыга гьувой гьар инсанын бордж водун. Ватан инсан едике ыхьайн джига ва гъу ешемишехьен гьоIкумат водун. ЦIаIхбышда кIыл’на Ватан Рутул районеена Сувал’на маIгьалый АIранеедын Закаталайний Къахын районбы водунбы. Анджах Дагъыстанее ешемишоохьени цIаIхбышда хаIбна Ватан Россия вобна, АIранее ешемишоохьени цIаIхбышда хаIбна Ватан Азербайджан вобна. Манчихъа гора ши кьоIбле Ватанан са миллет водун. Россияйс къабни душманаршике къорхунанкъаI, Россиейл ешемишоохьен цIаIхбы мана душманыке къорамишааъас сугъооца. Азербайджан къорамишаъас шааъаб ешемишоохьен цIаIхбы сугъооца. ШакIле ман гьаIшде къеджи водун. Сабара сенбына гьихъа Азербайджанни меега Къарабагъни даIвъийе хаIббанани джегьилерше джанбы гиххьы.
Россиейн Украине СВО алгъайгьен хьебыдле сеныле гьеххада водун. Мааъад Россиейн даIвъий Украинайни халкьыква деш вуккекка вобна. Россиейн джон инсанар фашистаршике, укранацистаршике къорамишааъа вобунбы. Эгьес эйхьи, Украинайни торпагъыл’ Россиейква Магъриб вурушмишехьи водун. Къийна айгьен, къудойкIалан маадын ярах хаариджий йишди душман оIлкабышиле хъадыйн водун. Ярахыле гъайре йишди эскераршиква наемникар, НАТО-ни оIлкабышин инстукторар ва офицерар йишди эскераршиква вурушмишоохьи вобунбы. Къийна мед йишди эскерарше нацистаршин, фашистаршин оIги водын аххъы. Мана хастаала дюнйелхъа еймишивхьес гьидяасар вобна.
Гьел’бедти, даIвъийн акьва кIарын водун. Манчин хизанбышеехъа ярабыйий нагъбы адайли. СВО къийна медни миллетбышди джегьилершиква саджигее цIаIхбышин джегьилераб кIылба дешобунбы. Манбышин хаIббананбы гьоIкуматни орденбышис, медалбышис лайикьавъу вобунбы. Анджах манбышди аIрее Ватаныс джан гьувойнбыб вобунбы. Манбы миллетни фыкреенче, йикIбышеенче мысаджаб ааIс деш.
ДаIвъийе иштырак гьаъанбышин маIгькамын далы ши — тылылин инсанар вобунбы. Къийна хааIрна-кIыл’на манбышди къайгъвее авхъу вобунбы. Фронтеехъа одхьанни каракван, аляъани къуIмани палтарыкван ва эскерыс лазымехьени дарманбышикван басиркIабы ва медын ыIгьтаджбы, дезгагьбы оIтираъа.
Гьелени ва оIтираъани кумагбышди гьаIкIее ши гьихъа «Нур» кIазете одкIунийн. Гьаарункъве джуни кьул’пеенче гехьан кар оIтираъан. Гьаммаше хаIбна хыл’ авхъаахъанбышди аIрее «Шукыр» ташкилатын (манчина хааIрна муслагъалий ШаIъбан Мамедов) , «Нур» кIазет, ЦIаIхни хивни джегьилершини фондын ( манчина хааIрна Фаик АIзизов), мебель гьаъан чоджар- цIаIхбы Сулеймановар, Фахруддин АIгьмадов, джамаIатчий Эл’брус ЫIмаров, журналист Рамил’ АIбдуллаев ва мебынбы вобунбы. Ши манбышди гыргынбышиква танышба дешобунбы, манчихъа гора манбышин добы цIыIдяъа. Вахт хъабыйнкъаI , гыргын ашкархьайнкъаI, ин ша Аллагь манбышди заIгьматни гьаIкIейид эгьесын. Ман ооъаб увгьойн йишин сабара чубара машинбышиква гуманитарный юкыка джахъа фронтеехъа гьабкIын.
СыкIылIна гаф йишин кIазет хъаIдаххъанбышис ишкарни АIгьмадов ДжуIма Исакьни дихни гьаIкIее гьааъас вуккан. ХаIббанани цIаIхбышикIле мана югра ацIа ворна. Мебеликва маIшкьулебаххьенбышда цIеррыйнбышда сайир мана ыхьа. Волгоградни шагьарее манкъвее цIедда кIылин мебель гьаъан цех ачмишаъы. Гойне ман хаIдни фабрикайлхъа садкIыл. Мааъаб ваIщеле агъаллана инсан ишлемишхьа. Гьел’бедти, маъаад къазанмишаъыйни доннухыква ваIщеле агъаллан хизанбы доланмишхьа. Гойне мебель масса гьелен дуканбы манкъвее шагьарбышее ачухаъы. Маайид иш джигабы ва югун доннухбы гьувы. ЗакIле къайиххьын мааъаб ишлемишоохьени инсанаршике, хыл’ ачухна, инсанни заIгьматыс кьиймат гьоолена мебельшикаршин са ДжуIма АIгьмадов ворна.
Манчиква барабарда Д. АIгьмадове хайирхагь ишбы къеджи. Украине СВО гидгъылыйле хъийгъа, манкъвее йишди джегьилерше къуллухааъани частбышилхъа хьуленихье элейс машинбышиква гуманитарный кумаг оIтираъу. Манкъуни гьаIракатбышис, кумагбышис военный частьбышди командирарше ахтыйна кьиймат гьувы.
Гьайни делесийвале са частини командирыле полковник В. Синицыныле ДжуIма АIгьмадовни дойилхъа сагъул-варул эйгьен кагъыз хъады. Чика сана манкъус медаль «За содействие в СВО» хъады.
Ши йишди миллетна дих, хыл’ ачухна ишкар ДжуIма АIгьмадов манчиква миллетни дойиле табрикаъа! Манкъус джанана сагъвалла аIрзуламишааъа. Гьасре маIгьбын игит’ духйе йишди миллетыхъаб хаIбба вухьеджин!
