Украинее СВО аIлгъаан сений сура водун. Анджах манчин аIхир шакIле гьале къеджи деш. Мани военный операциее иштыракаъани эскераршини аIрее хаIбба цIаIхбышин джегьилер вобунбы. Манбыше джона игитийвалла мааъад аIлгъааIни вурушбышее гьаагва.
Iббанани йишди джегьилершис гьоIкуматын наградабы : орденбы , медалбы гьувы. Манбышди гьаIракатбышис, хъыIдябкьыIнийс ва гивхьуна гьихъа месала гьаIллавъуйс ахтыйна кьиймат джони командирарше гьооли. Душманыле хъаIркьын, Ватан масса гьувойнбы, цIаIхбышди джегьилершини аIрее дешинбы. СВО садджу йишин эскерарджаб дешобунбы , мааъад иштыракаъанбышди аIрее йишди элин офицерарыб вобунбы. Манбышди гьаIкIеедын верлишбы федерал телеканалбышеенче гьагу. Миноборонайни, Росгвардиейни контрактникаршиле гъайре къийна мааъаб мобилиъзованныйбыб, добровольцараб вобунбы.
Ши чалышмишоохьенбы, гьар чапыке хъыIгъаани «Нур» кIазетни варакьбышее йишди джегьил’ чоджаршини гьаIкIее окIанас. Къийна манбыше йишда саакитыйвалла гьувааджи вобна ва джон джан манчинимеега гийххьи. Гьел’бедти , гьар миллетикIле джона кьаIгьраман ацIахьес ыккан. Къийнийни макьалейна сабабкар мишлешелий Мурадов АIлибег Уруджна дих ворна.
Мана едике Ставрополни крайни Новоселицкни районни Чернолесское хивее 22.06.1995 сен едике ыхьа. Манкъуна дек махъа Мишлешни хивеенче кочмишхьа хъары. ХаIббанан манбышин гогьарбы гьаIшдеб Мишлешни хивее ешемишоохьи вобунбы. Чернолесскойни хивее МОУ №2 СОШ таамау. Мактабни маъаIллимаршини, директорни увгьойква, АIлибег тербиейквана, югда хъаIдаххъана, спортыква маIшкьулехьена гаде ыхьа. Джуни гьамбазарше манкъуна гьуIрмат гьувааджи вухьа. Манкъвее гьаммаше хъобкувалла гозетявъу ва тахсирдешди заыIфни ушахаршин тераф аххъаххъа ыхьа.
Мактаб таамауйле хъийгъа, манкъвее джус эскерын санаъаIт сечмишаы. 2019 сен АIлибегее контракт одкIун , эскерна къуллух гьааъа Къарачаево-Черкессие гиргъыл’. Украинее СВО гидгъылни 2022 сенни февральни 24 –ъэсди йигъыле АIлибег Мурадов мааъар ворна. Манкъвее Запорожьейни вилаетыл’ аIлгъаани укранацистаршиквани вурушбышее иштыракаъы. МаIгьадни са вурушее 28. 07. 2023 сен АIлибег йыIкьра яраламишхьана: кьоIни сана къел’бышис гуллейн тикабы хъетIу ва контузия ыхьа. ГьаIшде мана маалидже гьаъа госпитале къалирхьу ворна.
ИлгъечIуйни вурушее игитийвалла гьавгуйс мана гьоIкуматни наградабышис лайикьыъы ворна.
Къийна манкъуни деккейий едее, джуни маъаIллимарше, гьамбазарше , хивынбыше са диляг Аллагьыке гьеххъа : мана хъуваркау къелилхъа оза хъауй.
Къийна Украинее аIлгъаани СВО АIлибегни джанакени чоджейид иштыракаъа водун . Манкъусыб ши джанана сагъвалла гьоохъа ва душманни гуллейке гьувадженава эйгьи.
АIлибег хьиннен игит’ джегьилер йишди миллетыхъаб хаIбба вобунбы. Инам гьаъан, манбышин сувахъанын рыIгь шавукеджад гьакьвараъас аIхас деш. Ши аIрзаъан ман гыргынбы сагъба –саламатба джони хизанбышеехъа хъавалес кьисматхьен. Аамин!
