Дюнйейни таарихе джурабаджур бадалхьайбы эйхьи. АIсас ман багълыда водун ыкеккани сиясатыке. Вахтале–вахталхъа дюнйейна кIарта бадалоохьена. Варкарыкван, девлетикван, гьуджумыкан оIлкабы гьыIгъайкар. Манчини джигеехъа медынбы къурмишехьи. Сабара асырбышиле манбыд веранхьа аху, манчини каджарбишике медын вилаетбы къурмишехьи. Анджах гьар миллетис Аллагье са Ватан гьуво. 

Мани ватаныл' дюнйейлхъа арайли, мани ватаныл' ешайиш къурмишаъа ва мани ватанылир аIхратылхъа айкIан. ШакIле таарыхын гьагван аIмалыква,гьуджумыква алеетIуйн джигабы , мысахье чини ессийсахъа сийкIаланбыки. ЦIаIхбишихъаб мисала вобна : « Дама чини йиссейни архылхъа сивийкIалнаки».
Ши, цIаIхбы Дагъыстане , Урсиятыл', Азербайджан ешайиш гьаъан миллет водун. Урсиятылхъа ешемишивхьес аIлгьааI гибгъылна хаIбба вахт дешда, амма манчихъа ил'дяаку мааъаб гьаIшде хил'дже цIаIхбы ешемишоохьи вобунбы. Манбышин хаIбананбыб джегьилер вобунбы. Махъа кочмишоохьена сабаб шакIле ваацIана – хизан гуд'мишааъасын къазындж заIгьматыква тIабалауй. Махъа абкIынийнбишди аIрее бейкарба ивийкаранбы шахъаб лап сейракба вобунбы. Гьаарункъве вукIул' кIебчу джуна иш гьааъа.
ЦIахбышис хаIдын зиян Кавказыл' 19 асырее вухьайни даIвъийн, гойне октябрьин инкылавын, хъийгъад Советни девырыл' хъетIу. Гьел'бедти , манке шавниджад фыкреехъа хъады деш Совет гьоIкумат дагъылмишехьива. Советни девурын йишди миллетын улепбы ачмишаъы. Манке кьаIран хъадхъий, медицина ва медын ыIмрес лазымехьен шаараитбы яратмишаъы. Анджах мани кьоIни асырни аIрее цIедда миллет вай-веранылхъа авгьу, къийгъад кьоIнахъаы. Аллагье шас гьувона Ватан Сувал'на маIгьалый Алазанын дюз ( Гал ыхьа). Ши няааъб ешемишоохьихье ацIахьес ыккан мана йишда ватанобна , ва мани торпахыл' цIаIхбышин нафас , миз лампайн иших ва бугъарайн кума таамхьес ыккан деш.
Къийна эн дагъамна вазият мани сардан Сувал'ни дерайл' вобна. Манчини гьаIкIее ши хьулехьее одкIуныйн. Манчин метлеббыд ашкараъыйнбы ва гьиджойи гьаъас ыккан хивар гьуваджесдимее джурабаджур мислягьаIтбы къаджейнбы. Анджах къийнийни йигъыл' гьалекийс кочмишивхьай даянмишхьа дешодун. Хьони – йицIни сенни аIрее саджу 6-7 мактабджад , ушахар дешва, утIумхьа.
Манчихъа ил'даккы Ватаныхъа гьаIкIедад йикI гёдхьанан инсанар вобунбы. Манбы чалышмишоохьенбы , цIеддыйке джони бабадидершин хиваршеедын хайбы тезелемишаъас, йаIхъ-кьыт' , гарма , йигъаIр хъаъас, манзикбы аляъас, зияратбы абрелхъа адчес.
Мани сардан хаIдда хайирхагь ишбы Атталини, Калел'ни, Муслагъни, Хьойикни, Миххьейни, ХыIягъни, Гыл'мецIни, Къурдулни хиварше къадже. Масалан, гьайни 2026 сен Аттални хивни джамаъаIтын токIан трансформатор бадалаъы. Мани ише манбышис кумаг республикайни токIбышди идарабышее ишлемишоохьени йишди миллетни чоджарше гьаъы. Сувал'ни Калел'ни хивее манзик алявъу. ДжамаъаIтна мураад хив тезел'бан алявъуй вобна. Шагьарбышее ешемишоохьени муслагъбыше джони хивее хайбы хъаъа ва аляъа гибгъыл. Хьойикни хивее манзик тезелемишавъу, хайбы аляъы ва аляъа водунбы.
Гьайни сен хаIдда ишбы ЦIаIхни хивее ыккы. Манзик абрелхъа хъаваляаъас чалышмишивхьа. Сура сен водун йишди миллетын Шейх МаIгьмыдин зиярат хъаъан. Мани зияратын чардах ва къуббабы тезелемишаъы. Манчин ЦIаIхна дераджаб ярашугъеехъа абчы. Манчиле гъайре хивна авгъани булахна гьаIвуз тезелемишавъу. ХъооIн хьянбы мани гьаIвузехъа саъы. Манче шланг гармайлхъа цIыцIаъы. Гел'бедти, ман ишбы гьаъый джамаIт кIыл'данани джигее вахарийна иш дешобна. Манчиле гъайре, дагъайни маIгьаллехъа хъооIн хьинен шлангбы бадалаъы. Гьайни сен ЦIаIхее кьоIдле хав аляъа гигъыл, ходле хайбы тезелемишааъа водунбы.
Рагьматтыгъ Рашид маIъллимее увгьойн: «…ЦIаIхий вухьана, вобна, мебыб вухьесда…». ЦIаIхее ва шагьарбышее ешемишоохьени ман хивеенче хъигъебчIуйни инсанарше гьаарункъвее джуке аIхан кумагбы гьаъыйнбы. Ман ишбы гьаъас кумагыс МаIгьачкъалеенче къылина джегьилер гьабкIын.
Гьел'бедти, хаIбна заIгьмат мани ишбышее АIгьмадов НезирмагьаIммаде, РаIгьимов Шихмирзе, Бабаев Айдыне гьаъву. Мед зы эйгьен , манбышис кумаг джигайл'ни ва гьабкIынни инсанарше гьаъы.
Ненкъвейи хайирысди ишбышее иштырак пылыква, заIгьматыква, мислягьаIтыква кумаг гьаъы, Аллагье манбышди джибыс баракат, къел'-хылес къуват ва джанана сагъвалла гьевлена.
Миххьейни хивеейид гьани сен хайбы аляъы ва тезелемишаъы.
Гьайни сен мани хивна чодж цIаIхбышике Дагъыстанни маджлисеехъа депутана сечмишхьа. Хивынбышихъаб, йишди миллетыхъаб умуд вобна, манкъве джуна къуллух миллетни хайирыс ишлемишаъас.
Лека ХаIбни Ватанни ветеранаршис къабсырна гьаIйкал гивхьу ва медын ишбы гьаъы.
Манчин эйгьен , Сувал'ни дерайл' цIаIхбышин нафас мейид водун. Ман гьааъан ишбы, ин ша Аллагь хаIдни тикил'тибышилхъа сакIалас.