ЦIаIхни халкьын до гьаммаше игит джаванарше ахтыхъау. Манбыше джони гьаIракатыква, баджаругъуква, аIкIеликва дюнйейлхъа миллетын до ашкарау. Мани сардан хаIбна иш йишди СВО воохьени гадебыше къавджу. Гьар йигъыс манбыше ши гьаагуйни игитийваллайс гьувойни наградабышиква шадааъанбы. 

СВО менни миллетбышди эл'чершиква янашеба цIаIхни халкьын джомард духйебыб вурушмишоохьи. Манбышди джаргее хаIбба муслагъбышин джаванарыб вобунбы. Гьайни йигъбышее манбышике кьоIйре Россиейни Федерациейни Президентни Владимир Путинни указыква Суворовни медалыс лайикьба къавджу. Манбы - прапорщик Наврузов Руслан Джелилна дих ва ГьаIдаев Мурад Бахтиярна дих.
Русланый Бахтияр СВО гидгъылни цIеддыйни йигъыле мааъаб вобунбы. Манбы хаIдданани дагъамни вурушбышин иштыракчер вобунбы. Эскерар вурушбышее растына хъавайлени дагъамийвал'бышихъа ил'дяакы, нишиледжаб хъыIдябкьыIн миллетчершина кок дагъылмишааъас чалышмишоохьи.
Муслагъбышин джомард джаванар 39-ъэсди джурайни гвардиейни мотострелковый бригадайн эскерар вобунбы. Къийна манбыше хидмат вуккеккани бригадайн Донецкни вилаете гунайлин торпахбы миллетчершике азадаъа.
Суворовни медалыс лайикьба къавджуйни джаванаршиква зас алаакьа аххъас кьисмат дехьайн. Манбы передовойль вухьайхъа гора, зенг адкIын деш. Манчихъа гора, зы Русланни деккиква, Джелил чоджуйква йишонхьа. Мана духайни наградайква табрикауйна. Гойне хьинне манкъуна вазият ваацIавхьа.
Русланни деккей Дж. Наврузове заквани ихтелете увгьойн: «Къийна йизда кьоIйре дих СВО ворна. Манбыше адамерше хьинне Ватан миллетчершике къорамишааъа. Зы нейинки йизди духйебышиле, мааъаб воохьени гыргыни эскераршиле гуянмишехьи. Манбыше гьаIшде гьаIкIена иш къооджи. ЗакIле ацIан, гьаIкIена гьаммаше гъамехьена. Гъамувхьай йишди сурал' водун. Йишин эскерар Аллагье гьуваадженбы. Гыргыба манбы сагъба-саламатба хайбышейхъа савкIалас кьисматхьен».
Русланыхъад ва Бахтиярыхъад СВО вурушбышее гьагуйни игитийвалис алятIуйн хаIдда наградабы водунбы. ГьаIшде манчина джарга Суворовни медалын уфтан хъааъас.
Йишди редакциейн Наврузов Русланый ГьаIдаев Мурад ва манбышин дёлесынбы гьокуIматни ахтыйни наградабышиква табрикааъанбы. Манбы, авхуйни СВО воохьени эскераршиква саджигей, сагъба-саламатба хайбышейхъа савкIалас аIрзаъа.