ГьоIкуматын экономиква гьаIракатеехъа адчуй, инсанаршин ешайиш вахарий хъыхьай йаIххъаршикед аIслыда водун. ЙаIхъбышихъадыд джурабы водунбы: пиадана, поштина (машнена), йивана (поездна), хаIйбышеен, хьинена. ЙаIхъбышил' инсанар ивий кар, мал, одхьанан, аляъан кар тIашмишаъа.

ЙаIхъбышил' манбы тIашмишаъассе гьихъа, цIедда йаIхъбы аляъас ыккан.
ГьаIдис вобна: «Ненкъвейий йаIхъбы, йыIгъар, гармабы аляъы, манбыше хаIдын суваабодун къазамишаъа, джосда йаIхъ дженнетехъана аляааъа. Нимеегайий ман йаIхъбы, йыIгъар, гармабы инсаныс хайирыс ишлемишхье, гьаманкийлхъамее манбы аляуйнбышис суваабы ихьес».
Шахъаб, цIаIхбышихъаб йаIххъаршин устадар районее, республике, гьоIкуматни гьарджура вилаетбышил', чIакIни шагьарбыше вухьайнбы ва гьаIшдед ман аIдатбы йишди джегьилерше хаIдхъаъа водунбы.
Вахтале- вахталхъа ши манбышди гьаIкIее, манбыше гьаъыйни ва гьаъани ишбышди гьIкIее «Нур» кIазете ойкIанан, цIаIхни мизел'ни телеверлишбышее гьаагва.
Къийни йишди макьалейна кьаIгьраман - МаскIавни АО «МИСК» ташкилатни участокна хааIрна Наврузов Бегьрам ГьыIджранна дих ворна.
Бегьрам Наврузов едике ыхьана 1989 сенни августни 18-чил' Рутул районни Муслагъни хивее . Манкъуна дек' – Наврузов ГьыIджран Сулейманна дих, ед' - Наврузова Эл'мира Байрамна йиш вобунбы. Бегьрамыхъаб чоджарыб йичибыб вобунбы.
Гьыджран чоджее ва Эл'мира баджее гьувойн къык, тербие, насигьаIт манбыше къелик авхъа гьувы деш. Манбышике хизаныс ва йишди миллетис хайир гьелен инсанар хъигъебчIу.
Бегьраме Муслагъын йыIкьнекин мактаб итаамаъы. 2009 сен мана иккечIуна хъаIдхъас МаскIавни девлет тикинтийни университетехъа. Ман университете аIкьананче хъарыйни сувахъане югун ацIаал'бы алетIу. Конкурсыле хъийгъа , манкъун гьаIракатбы ва ацIаал'бы къадже МаскIавни инженерно – аляъани компаниейн ( АО «МИСК») джосхъа ишлемишхьес алертIу.
АО «МИСК» - россиейн тикинтийн хаIдын ташкилат водун. Ман гнерал'ный подрядчик хьинне аляъани рынке ишлемишехьи ва манчин гьаIшдийни аляуйн тIабалбы гозетяъы гьар джурайны дагъамын бинаабы, йаIхъбы аляъа.
Махъа гядакIванбы инсанар ешемишебаххьен, промышленный, хивни тассаруфатын объектбы.
Манчиле гъайре, мани ташкилатын машнен йаIххъар, йигъар аляъа ва тезелемишаъа; хьянбы цIыцIаъа ва канализациебы хъаъа; мактаббы, алвераъан базарбы, дуканб ва манчини гьихъийаллан учебы ва майдамбы, паркбы аляъа. ДжитIада манбыше югын ешайиш гьаъасын шарааитбы яратмишаъа.
Б. Наврузов мани ташкилатее цIерра фегьлена ишлемишехьи гиргъыл'. Манкъун баджарагъ къаде йаIхъбы аляъани участокна хааIрнана гиххьы. Гьел'бедти манкъухъаб джуни гьаммазаршини, ташкилатни регьбераршини ахтына гьуIрмат вобна. Мана, умуд ва инам гьаъанбы, къуллухни кьыIтершике агъалла илхъечIесда. Манчини меега Бегьрамыхъад еттыгъын гьаIракатыт, гьавасы, ацIаалид водун.
Мани ишил' ишлемишехьенкъаI МаскIавни АО «МИСК -ни», МаскIавни тикинтийни департаментыни сураке мукафатбышис , дипломбыши, грамртабышис лайикьаъы.
Нарузов Бегьраме ГьыIджранни духее АО « МИСК-ын» аляуйн ёкьыдле чIакын объектбы гьоIкуматни ыIгьтеехъа хъеленкъаI иштыракаъы. Ман объектбы, аIсас йаIхъбышиква багълыданан , МаскIавни мере Сергей Семёнович Собянине кьабыляъы. Мани гьоIкуматни балансеехъа хъувойни объектбы аляъанкъаI хаIдын заIгьматбы йишди миллетни са дихее – Бегьраме гьаъы.
МаскIавни хааIрункъе С. Собянине ман объбектбы аляуйни инженарршис, фегьлебышис ахтына кьиймат гьувы ва манбышис угъурбы аIрзуламишаъы.
Б. Наврузовыхъаб джуна хизан вобна.. Хьунаще- Наврузова Зул'фия Гьарунна йиш МаскIавни шагьрее дохтур - педиатрна ишлемишеехьи. МIанкъее ушахаршис маалиджебы гьаъа. Аллагьыле хъийгъа, ушахаршин джан сагъхъаъа.
Бегьрамейий Зул'фие йишди адаббышиква, тербиейква гьалални къыкыл' кьоIйре ушах чIакIыхъааъа вобунбы.
Манбыше джона Ватаныб кIеливханааъа деш. Гьар сен Мусагъахъа едисахъайий деккисчахъа абаленбы.
«Нур» кIазетни редакциейн йишди цIаIхбышди джегьил' инженерыс джанана сагъвалла, баракат хизанее ва угъурбы ишее аIрзуламиашаъа. МаIгьбын игитер шахъаб хаIбба вухьенбы.